ގިނައިން ހޮލީވުޑް ފިލްމުތަކުން މިހާރު ފެންނަ އިންޑިއާގެ މަޝްހޫރު ބަތަލާ ޕްރިޔަންކާ ޗޯޕްޅާއަށް ދެން ކުޅޭ ބޮލީވުޑް ފިލްމަކީ ކުޅަދާނަ ޑައިރެކްޓަރު އެސްއެސް ރާޖާ މޮލީގެ ފިލްމެއް ކަމަށް ރިޕޯޓުތައް ބުނެފިއެވެ.
ޕްރިޔަންކާއާއެކު ލީޑް އެކްޓަރެއްގެ ގޮތުގައި ސައުތު ސިނަމާގެ އެންމެ ނުފޫޒުގަދަ އެއް އެކްޓަރު މަހޭޝް ބާބޫ ފެންނާނެ މި ފިލްމާ ގުޅޭ މަޝްވަރާތައް ނިމި ބަތަލާ ފިލްމަށް އެއްބަސްވެފައި މިވަނީ ހަ މަސް ދުވަހުގެ މަޝްވަރާތަކަކަށް ފަހު ކަމަށް ފިލްމީ ޚަބަރުތައް ބުނެއެވެ.
ފިލްމުގެ ސްކްރިޕްޓްގެ ވަރަށް ބޮޑު ބައެއް ނިމިފައިވާއިރު މި ފިލްމުގެ މަސައްކަތް ކުރިއަށް އޮތް އަހަރުގެ އޭޕްރިލް މަހު ފަށަން ތައްޔާރުވަމުން އަންނަ ކަމަށް ރިޕޯޓުތައް ބުނެއެވެ.
ބޮކްސް އޮފީހުގެ ރެކޯޑުތައް މުގުރާލާފައިވާ ގިނަ ފިލްމުތަކެއް އުފައްދާފައިވާ ރާޖާމޮލީގެ ފިލްމުގެ ބަތަލާއަކަށް ބޭނުންވީ ގްލޯބަލް އައިކަންއެއް ކަމަށާއި އިންޑިއާއަށް ނިސްބަތްވާ ބަތަލާއެއް އެ ރޯލަށް ހޯދުމުގެ މަސައްކަތް ފެށިއިރު އެންމެ ފުރަތަމަ ވެސް ރާޖާމޮލީއަށް ސިފަވީ ބަތަލާ ޕްރިޔަންކާ ކަމަށް ރިޕޯޓުތައް ބުނެއެވެ.
ބަތަލާ ޕްރިޔަންކާ ޑައިރެކްޓަރު އެސްއެސް ރާޖާމޮލީ އަދި މަގުބޫލު މިއުޒިކް ކޮމްޕޯސަ އެމްއެމް ކީރާވަނީއާ އެކު--ފޮޓޯ/
ފިލްމީ ޚަބަރުތައް ގެނެސްދޭ ޕިންކްވިލާގައި ބުނެފައިވާ ގޮތުގައި ޕްރިޔަންކާއަށް މި ފިލްމުގެ ސްކްރިޕްޓް ވަރަށް ބޮޑަށް ކަމުގޮސްފައިވާއިރު ބަތަލާ އަންނަނީ ފިލްމުގެ މަސައްކަތް ފެށުމަށް ތައްޔާރުވަމުންނެވެ.
ފިލްމު "ބާހޫބަލީ" އަދި "އާރްއާރްއާރް"ފަދަ ފިލްމުތަކުން ބައިނަލްއަޤްވާމީ އޯޑިއަންސްގެ މަގުބޫލުކަން ހޯދާފައިވާ ތަޖުރިބާކާރު ޑައިރެކްޓަރު އެސްއެސް ރާޖާމޮލީ އަލަށް އުފައްދަން ތައްޔާރުވަމުން އަންނަ މި ފިލްމު އުފައްދަން ނިންމާފައި ވަނީ ޑިޒްނީ އަދި ސޮނީގެ އިންޓަނޭޝަނަލް ޕާޓްނަރުންނާއެކު ކަމަށް ރިޕޯޓުތައް ބުނެއެވެ.
ޕްރިޔަންކާ ބޮލީވުޑްގެ ފިލްމުތަކުގައި މަސައްކަތް ކުރާނެކަން ދާދިފަހުން އިއުނާލުކުރިއިރު ބަތަލާ ހިމަނައިގެން ޑައިރެކްޓަރު ފަރުހާން އަހްތަރު ވަނީ "ޖީ ލޭ ޒަރާ"ގެ ނަމުގައި ފިލްމެއް އުފައްދަން ނިންމިކަން ކުރިން އިއުލާނުކޮށްފައެވެ.