މި ދުވަސްވަރަކީ ރާއްޖޭގެ ފަތުރުވެރިކަމުގެ ޕީކް ދުވަސްވަރެވެ. ފިނި މޫސުމުގެ މި ދުވަސްވަރު، ގިނަ އަދަދެއްގެ ފަތުރުވެރިން ރާއްޖެ އަންނަނީ އަހަރު ފާހަގަކުރުމަށާއި، ކްރިސްމަސް ފާހަގަކުރުމަށެވެ. ޚާއްސަކޮށް ބޭރުގެ މަހުޖަނުން ވެސް ރާއްޖެއަށް ގިނަ އަދަދަކަށް އަމިއްލަ ޖެޓުތަކުގައި އާދެއެވެ.
އެއާއެކު ވެލާނާ އިންޓަނޭޝަނަލް އެއާޕޯޓުގައި މިހާރު ގިނަ އަދަދެއްގެ ޕްރައިވެޓް ޖެޓު ވެސް ޕާކުކޮށްފައި އެބަހުއްޓެވެ. އެ މަންޒަރު ހުޅުމާލެއާއި، ބްރިޖު ގުޅުވައިދޭ ހައިވޭއިން ދަތުރުކުރާއިރު ވަރަށް ކައިރިން، މިހާރު ފެންނަން ވެސް އެބަހުއްޓެވެ.
"ސަން"އާ ވާހަކަދައްކަވަމުން އެމްއޭސީއެލްގެ އިސް އޮފިޝަލަކު ވިދާޅުވީ، މި ވަގުތު ވެސް އެއާޕޯޓުގައި 30 ޕްރައިވެޓް ޖެޓު ޕާކުކޮށްފައި އެބައޮތް ކަމަށެވެ. އަދި ޖެޓް މޫވްމަންޓުތައް ވެސް މި އަހަރު އިތުރުވިއިރު، މި މަސް ފެށިގެން، އިއްޔެގެ ނިޔަލަށް 148 ޖެޓް މޫވްމަންޓްސް ރެކޯޑުކުރެވިފައިވާ ކަމަށް ވިދާޅުވިއެވެ.
މިއީ މިދިޔަ އަހަރުގެ ޑިސެމްބަރު މަހުގެ 28ވަނަ ދުވަހުގެ ނިޔަލަށް ރެކޯޑުކުރެވުނު 137 މޫވްމަންޓާ އަޅައިކިޔާއިރު، 11 މޫވްމަންޓު އިތުރުވުމެކެވެ. އެެހެންކަމުން މި އަހަރުގެ އަދަދަކީ އަށް ޕަސެންޓުގެ އިތުރުވުމެއް ކަމަށް އޮފިޝަލް ފާހަގަކުރެއްވިއެވެ.
އޮފިޝަލް އިތުރަށް މައުލޫމާތު ދެއްވި ގޮތުގައި މިދިޔަ އަހަރު، ޑިސެމްބަރު 28ވަނަ ދުވަހުގެ ނިޔަލަށް ރެކޯޑުކުރެވިފައިވަނީ 2،107 މޫވްމަންޓް ކަމަށެވެ. ނަމަވެސް މި އަހަރު، މިހާތަނަށް 2،326 ޖެޓު މޫވްމަންޓު ރެކޯޑުކުރެވިފައިވާއިރު މިއީ 10 ޕަސެންޓް އިތުރުވުމެއް ކަމަށް ފާހަގަކުރެއްވިއެވެ.
މީގެ އިތުރުން ކޮންމެ އަހަރެއްގެ މި ދުވަސްވަރުގައި ވެސް ޖެޓު އަންނަ މިންވަރު އިތުރުވާތީ، އެއާޕޯޓުގެ ތިން ސަރަހައްދެއްގައި ޖެޓު ޕާކުކުރެވޭނެ އިންތިޒާމު ހަމަޖައްސައިފައި އޮތްކަމަށް އޮފިޝަލް ވިދާޅުވިއެވެ. އެގޮތުން އެއާޕޯޓުގެ އުތުރާއި، އިރު، އަދި ދެކުނުން ޖުމްލަ 68 ޖާގަ ޖެޓު ޕާކިންއަށް ޚާއްސަކޮށްފައިވެއެވެ.
އާ އަހަރާ ދިމާކޮށް ވެލާނާ އިންޓަނޭޝަނަލް އެއާޕޯޓުގެ އޮޕަރޭޝަންތަކަށް ވެސް ވަރަށް ބޮޑަށް ވަނީ ބިޒީވެފައެވެ. ނަމަވެސް ހުރިހާ މުވައްޒަފުންގެ އެއްބާރުލުމާއެކު މުޅި އެއާޕޯޓުގެ އޮޕަރޭޝަން ވަރަށް އަމާންކޮށް ކުރިއަށްދާކަމަށް އޮފިޝަލް ވިދާޅުވިއެވެ.