މަސްތުވާތަކެއްޗާ އެކު ހައްޔަރުކުރި މީހަކު އެއީ އޭނާގެ ބައްޕަގެ ތަކެތި ކަމަށް ކޯޓުގައި ބުނެފިއެވެ.
މި މައްސަލައިގައި ހައްޔަރުކޮށްފައިވަނީ އުމުރުން 23 އަހަރުގެ ދިވެހި ފިރިހެނެކެވެ. އޭނާގެ މައްޗަށް ކުރަނީ މަސްތުވާތަކެތި ބޭނުންކުރުމާއި، ގެންގުޅުމާއި، ޓްރެފިކްކުރުމުގެ ދައުވާއެވެ.
އޭނާގެ އަތުން ގިނަ އަދަދެއްގެ މަސްތުވާތަކެއްޗާއި، މަސްތުވާތަކެތި ބަންދުކުރަން ބޭނުންކުރާ ކަމަށް ބެލެވޭ ތަކެތި ފެނިފައިވެއެވެ.
ކްރިމިނަލް ކޯޓުގެ އަމުރުގައި ބުނެފައިވަނީ އޭނާގެ ފަރާތުން ތުހުމަތަށް އިންކާރުކޮށް، އޭނާގެ އަތުން ފެނިފައިވާ މަސްތުވާތަކެއްޗަކީ އޭނާގެ ބައްޕަގެ ތަކެތި ކަމަށް ބުނެފައިވާ ކަމަށެވެ. ނަމަވެސް، ސީނުގައި އެއީ ބައްޕަގެ ތަކެތި ކަމަށް ބައްޕަ ބުނެފައިނުވާ ކަމަށް އިންވެސްޓިގޭޓިވް އޮފިސަރު ފާހަގަކުރެއްވި ކަމަށް ކޯޓު އަމުރުގައިވެއެވެ.
ނަަމަވެސް، ސީނަށް ދިޔަ ފުލުހުންގެ ބަޔާނާއި، ސީން އޮފް ކްރައިމް އޮފިސާސް ރިޕޯޓާއި، މަސްތުވާތަކެތި ތަހުލީލު ރިޕޯޓާއި، ކުޑަކަމުދާ ތަކެތީގެ ތަހުލީލު ރިޕޯޓަށް ބަލާއިރު، ތުހުމަތުކުރެވޭ މިންވަރަށް ހެކި ހުރިކަމަށް ބެލެވޭ ކަމަށް ކޯޓު އަމުރުގައި ވަނީ ބަޔާންކޮށްފައެވެ.
އެހެންވެ، އޭނާގެ މައްޗަށް ކްރިމިނަލް ކޯޓުން ވަނީ އިއްޔެއިން ފެށިގެން އަންނަ މަހުގެ 27 ވަނަ ދުވަހުގެ ނިޔަލަށް، 30 ދުވަހުގެ މުއްދަތަށް ބަންދުގެ މުއްދަތު ޖަހައިފައެވެ.
އޭނާ ބަންދުގައި ބަހައްޓަން ޖެހެނީ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާވެދާނެ ކަމަށް ފެންނާތީ ކަމަށް ވެސް ކޯޓު އަމުރުގައި ބުނެފައިވެއެވެ.