ބުރާސްފަތި ދުވަހުގެ ދަންވަރުގެ ވަގުތެއްގައި ހުޅުމާލެ ދެވަނަ ފިޔަވަހީގައި ސައިކަލަކާއި ފުލުސް ކާރެއް ޖެހި، ހިނގި އެކްސިޑެންޓުގައި އަނިޔާވި ޒުވާނާގެ ހާލު އަދިވެސް ކްރިޓިކަލް ކަމަށް އައިޖީއެމްއެޗުން މިއަދު ބުނެފިއެވެ.
އެ އެކްސިޑެންޓް ހިނގީ ހުޅުމާލޭ ދެވަނަ ފިޔަވަހީގެ ގުލްއަލްމާ މަގުގެ އިރުން ހުޅަނގަށް ނިރޮޅު މަގު ހުރަސްކުރަމުންދިޔަ ފުލުހުންގެ ކާރެއްގައި، ނިރޮޅު މަގުން ބާރު ސްޕީޑުގައި ދުއްވާފައި ދިޔަ ސައިކަލެއް ޖެހިގެން ކަމަށް ފުލުހުން ބުނެއެވެ.
އެ އެކްސިޑެންޓުގައި އަނިޔާވި 18 އަހަރުގެ ޒުވާނާގެ ހާލު ސީރިއަސްވުމުގެ ސަބަބުން ހުޅުމާލޭ ހޮސްޕިޓަލުން ފަރުވާ ދިނުމަށް ފަހު، އައިޖީއެމްއެޗަށް ބަދަލުކުރީ ހުކުރު ދުވަހެވެ. އެ ޒުވާނާއަށް ފަރުވާ ދެމުން އަންނަނީ ވެންޓިލޭޓަރުގައެވެ.
"ސަން"އަށް މައުލޫމާތުދެއްވަމުން އައިޖީއެމްއެޗްގެ މީޑިއާ އޮފިޝަލަކު ވިދާޅުވީ، އެ ޒުވާނާއަށް އަދިވެސް ފަރުވާ ދެމުންދަނީ ވެންޓިލޭޓަރުގައި ކަމަށެވެ.
އެ މައްސަލައާ ގުޅިގެން ފުލުހުން ނެރުނު ބަޔާނެއްގައި ވަނީ ސައިކަލު ދުއްވީ، އެއްގަމު ދަތުރުފަތުރުކުރުމުގެ ގާނޫނާ ޚިލާފުވެގެން މި މަހުގެ 21 ގައި ލައިސެންސް ހިފަހައްޓާފައިވާ މީހެއް ކަމަށް ތުހުމަތުކޮށްފައެވެ.
ނަމަވެސް، އެ ޒުވާނާގެ ބައްޕަ އިބްރާހިމް ޝިހާމް އިއްޔެ "ސަން"އަށް ބުނީ، ދަރިފުޅު ލައިސެންސް ހިފެހެއްޓީ މޮޑިފައިކޮށްފައިވާ ސައިކަލެއް ދުއްވި މައްސަލައެއްގައި ކަމަށެވެ. އެއީ، ކުއްޖާގެ އެކުވެރިއެއްގެ ސައިކަލެއް ކަމަށާއި އެ ސައިކަލު ފުލުހުން ޓޯކޮށްފައިވާ ކަމަށް ޝިހާމް ބުންޏެވެ. އެ ސައިކަލު ޓޯކުރިކަމުގެ ލިޔުން ލިބުނު ނަމަވެސް، ދަރިފުޅުގެ ލައިސެންސް ހިފެހެއްޓިކަމުގެ ލިޔުމެއް ނުދޭ ކަމަށް އޭނާ ބުންޏެވެ.
ޝިހާމް ބުނީ، އެކްސިޑެންޓުގައި ކުއްޖާގެ ބޮލަށް ބޮޑެތި އަނިޔާތަކެއް ލިބިފައިވާ ކަމަށެވެ. އެހެންކަމުން މި ދަނޑިވަޅުގައި ދަރިފުޅު ބަދުނާމުވާ ގޮތަށާއި ހަގީގަތް އޮޅޭ ގޮތަށް އެއްވެސް ފަރާތަކުން މައުލޫމާތު ނުފެތުރުމަށް އޭނާގެ ބައްޕަ ވަނީ އެދިފައެވެ.
ފުލުހުން ވަނީ އެފަދަ ނުރައްކާތެރި އެކްސިޑެންޓްތައް ހިނގުމަކީ ކަންބޮޑުވާ ކަމެއް ކަމަށާއި އެކްސިޑެންޓްތައް ހުއްޓުވުމަށާއި މަގުމަތީގެ ރައްކާތެރިކަން ކަށަވަރުކުރުމަށް ގިނަ ވަސީލަތްތަކަކާ އެކު މަސައްކަތްތަކެއް ވެސް ކުރަމުން އަންނަ ކަމަށް ބުނެފައެވެ.
އެކްސިޑެންޓުވި ވަގުތު ކާރު ދުއްވަންއިން ފުލުސް މީހާގެ އެއްވެސް އިހުމާލެއް ވޭތޯ ބަލަން ތަހުގީގެއް ހިންގާނެ ކަމަށް ފުލުހުން ބުނެފައިވެއެވެ. އެ ކަމާ ގުޅިގެން އަދި މިހާތަނަށް ފުލުހުންގެ ބަހެއް ލިބިފައެއް ނުވެއެވެ.