ޕްރޮޑިއުސަރު ކަރަން ޖޯހަރުގެ ފިލްމު ކުންފުނި ދަރުމާ ޕްރޮޑަކްޝަންސް އާއި ނަމާހް ޕްރޮޑަކްޝަންސް ގުޅިގެން 18 މިލިއަން ޑޮލަރުގެ ބަޖެޓަކުން އުފައްދާ ލޯބީގެ ހެއްވާ މަޖާ ފިލްމަކަށް އެކްޓަރު ކާތިކް އާރްޔަން ސޮއިކޮށްފައިވާ ކަމަށް ރިޕޯޓުތައް ބުނެފިއެވެ.
ސަމީރު ވިދުވަންސް ޑައިރެކްޓްކުރާ މި ފިލްމުގެ ނަމަކީ "ތޫ މެރީ މޭ ތެރާ މޭތެރާ ތޫ މެރީ"ކަން މި ފިލްމު ގެނެސްދޭ ދެ ޕްރޮޑަކްޝަން ކުންފުނިން ވަނީ އިއުލާނުކޮށް ފިލްމުގެ ހެއްވާ މަޖާ ޓީޒާއެއް ވެސް އާއްމުކޮށްފައެވެ.
މި ފިލްމުގައި ކާތިކް ފެންނާނީ މަންމަގެ ބަސް އަހައިގެން, ލޯބީގެ ގޮތުން ގުޅޭ އަންހެން ކުދިންނާ ވަކިވުމަށް މެދުވެރިވާ ސަބަބު އިތުރަށް ތަކުރާރު ނުކުރުމަށް މަސައްކަތް ކުރާ, މަންމައަށް ކުރާ ވައުދުތައް ފުއްދުމަށް ކޮންމެފަދަ ގުރުބާނީއެއް ވެސް ވުމަށް ތައްޔާރަށް ހުންނަ ފިރިހެން ދަރިއެއްގެ ރޯލްއިންނެވެ.
ކާތިކް ބަތަލާ ކިއާރާ އަދުވާނީއާ އެކު ފިލްމު "ސަތިޔަ ޕްރޭމްކީ ކަތާ"ގެ މަންޒަރެއްގައި--ފޮޓޯ/ޕިންކްވިލާ
މި ހުރިހާ ކަންތައްގަނޑެއްގެތެރޭ ހިނގާ ހެއްވާ މަޖާ ހާދިސާތަކުގެ ސަބަބުން ބެލުންތެރިން ހެއްވާލުމަށް މީގެކުރިންވެސް ކޮމެޑީ ރޯލްތަކުން ފެނިފައިވާ އެކްޓަރު އަންނަނީ ތައްޔާރުވަމުންނެވެ.
މި ފިލްމުގައި ކާތިކްއާ އެކު ބަތަލާގެ ރޯލްއިން ފެންނާނީ ކޮން ފިލްމީ ތަރިއެއްކަން އަދި ހާމަކޮށްފައެއް ނުވެއެވެ.
މި ފިލްމު 2026ވަނަ އަހަރު ރިލީޒްކުރާނެކަމަށް ދަރުމާއިން ބުނެފައިވާއިރު މިއީ ޖުމްލަ 150 ކްރޯޑު ރުޕީސްގެ ބަޖެޓަކުން އުފައްދާ ފިލްމެކެވެ. ދަރުމާއިން އުފައްދާ ފިލްމަކަށް ކާތިކް ސޮއިކޮށްފައިވާއިރު މީގެކުރިން ވެސް އެކްޓަރު ވަނީ ދަރުމާގެ ފިލްމަކަށް ސޮއިކޮށްފައެވެ.
އެއީ ބަތަލާ ޖާންވީ ކަޕޫރު ހިމަނައިގެން އުފައްދަން ނިންމި ފިލްމު "ދޯސްތާނާ"ގެ ސީކުއަލް ފިލްމެކެވެ. މި ފިލްމު އުފައްދާނެކަމަށް ރިޕޯޓުތަކުން ބުނެފައި ވަނިކޮށް ކަރަން އާއި ކާތިކްއާ ދެމެދު ގުޅުން ގޯސްވެ ފިލްމުގެ މަސައްކަތް ވަނީ ކުރިއަށް ނުގޮސްފައެވެ.
ކާތިކްގެ އެންމެފަހުން ރިލީޒްކުރި ފިލްމަކީ މިދިޔަ ނޮވެމްބަރު މަހު ރިލީޒްކުރި ފިލްމު "ބޫލް ބުލައްޔާ 3"އެވެ.