ބްލޮކްބަސްޓާ ހިޓު "އޮޕެންހައިމާ" އަށް ފަހު މަޝްހޫރު ފިލްމު ޑައިރެކްޓަރު ކްރިސްޓޮފާ ނޯލަން އާ ފިލްމެއް ނެރުމަށް ތައްޔާރުވެއްޖެއެވެ.
ނޯލަންގެ ފިލްމު އޮޕެންހައިމާ އަކީ މިދިޔަ މެދުތެރޭގައި ސިނަމާއަށް ނެރުނު ފިލެމެކެވެ. މި ފިލްމަކީ މިދިޔަ އަހަރުގެ އެންމެ ކާމިޔާބު ފިލްމުތަކުގެ ލިސްޓުގައި ހިމެނޭ ފިލްމެކެވެ. އެ ކާމިޔާބީ އަށްފަހު މިހާރު އޭނާ މަސައްކަތް ކުރަމުން އަންނަނީ މިތިކަލް އެކްޝަން ފިލްމެއް ނެރުމަށެވެ.
"ދަ އޮޑެސީ" ނަމަށް ކިޔާ ފިލްމަކީ އެ ނަމުގައި ނެރެފައިވާ ވާހަކަ ސީރީޒްގެ ފޮތަކަށް ބިނާކޮށް ތައްޔާރު ކުރާ ފިލްމެކެވެ. އެގޮތުން މި ފިލްމަކީ ގްރީކް މިތޯލޮޖީގެ ވާހަކައެއް ކިޔައިދޭނެ ފިލްމެއް ކަމަށް ބައެއް މައުލޫމާތުތަކުން ހާމަވެއެވެ. ނަމަވެސް އަސްލު ވާހަކައާ ކިހާ އެއްގޮތް ވާނެ ކަމެއް ހާމަވެފައެއް ނުވެއެވެ.
ފިލްމުގެ މަސައްކަތް ފަށައިގެން މިހާރު ކުރިއަށްދާއިރު މި ފިލްމު ރިލީޒް ކުރުމަށް ހަމަޖެހިފައިވަނީ 2026 ވަނަ އަހަރުގެ ޖުލައި 17 ގައެވެ. އައިމެކްސް ފޯމެޓަށް ތައްޔާރު ކުރުމަށް ހަމަޖެހިފައިވާ މި ފިލްމު ޝޫޓުކުރުމުގެ މަސައްކަތް ވަރަށް އަވަހަށް ފަށާނެއެވެ. އަދި ދުނިޔޭގެ އެކި ކަންކޮޅުތަކުގައި ފިލްމު ޝޫޓިން ކުރިއަށް ގެންދިޔުމަށް ވަނީ ހަމަޖެހިފައެވެ.
އޮޑެސީގެ ލީޑް ރޯލުން ފެނިގެންދާނީ މެޓް ޑޭމަން އާއި އޭން ހެތަވޭގެ އިތުރުން ޒެންޑާޔާ އަދި ޓޮމް ހޮލެންޑެވެ. މި އެކްޓަރުން ކުޅޭނެ ރޯލުތަކެއް އަދި ހާމަކޮށްފައެއް ނުވެއެވެ. ނަމަވެސް ފިލްމުގެ އިތުރު މައުލޫމާތުތައް ވަރަށް އަވަހަށް ހާމަކުރާނެ ކަމަށް ވަނީ ޕްރޮޑަކްޝަނުން ބުނެފައެވެ.