ވާޗުއަލް ޕްރައިވެޓް ނެޓްވޯކް (ވީޕީއެން) ބޭނުންކޮށްގެން މަނާކޮށްފައިވާ ވެބްސައިޓްތަކަށް ވަދެ އުޅޭ މީހުން ޖޫރިމަނާ ކުރުމުގެ ވިސްނުމެއް ނެތް ކަމަށް ރަޝިއާގެ މީޑިއާ ރެގިއުލޭޓަރު ކަމުގައިވާ ރޮސްކޮމްނާޒޯރުން ބުދަ ދުވަހު ހާމަކޮށްފިއެވެ.
ވީޕީއެންއަކީ ބޭނުންކުރާ މީހުންގެ އައިޕީ އެޑްރެސް ފޮރުވައި، ފަޔަވޯލްތަކާއި ބްލޮކްތައް ފަހަނައަޅައި ދިއުމަށް މަގުފަހިކޮށްދޭ ޓެކްނޮލޮޖީއެކެވެ.
މި މަހުގެ ކުރީކޮޅު ރޮސްކޮމްނާޒޯރުން ވަނީ ޓެލެކޮމް އޮޕަރޭޓަރުތަކުން މަނާކޮށްފައިވާ ވެބްސައިޓްތަކަށް ވަދެ އުޅޭ އިންޓަނެޓް ބޭނުންކުރާ މީހުންގެ މަޢުލޫމާތު އެ އިދާރާއަށް ފޯރުކޮށްދިނުމަށް އެދި ޑްރާފްޓް އަމުރެއް ނެރެފައެވެ.
ނަމަވެސް، ބުދަ ދުވަހު ހައި-ޓެކް މެއިލް ނިއުސް އައުޓްލެޓުން ރިޕޯޓުކުރި ގޮތުގައި މި އަމުރުގެ ދަށުން ވީޕީއެން ބޭނުންކުރާ ފަރާތްތަށް ޖޫރިމަނާ ކުރެވިދާނެ ކަމަށް އައިޓީ ތަޖުރިބާކާރުން ބުނެފައިވެއެވެ.
ޓީކިއުއެމް އައިޓީ ކުންފުނީގެ ބާނީ ޔޫރީ ގިޒަޓުލިން ބުނި ގޮތުގައި ރޮސްކޮމްނާޒޯރަށް މިކަން ކުރުމުގެ ޓެކްނިކަލް ވަސީލަތްތައް ލިބިފައިވީ ނަމަވެސް، މިފަދަ ފިޔަވަޅުތަކަކީ ޑޭޓާ ޕްރައިވަސީއާ ގުޅޭ ގޮތުން "ސުވާލުތަކެއް" އުފެދިދާނެ ކަމެއް ކަމަށް ފާހަގަކުރިއެވެ.
އެހެންނަމަވެސް، ރޮސްކޮމްނާޒޯރުން ބުނެފައިވަނީ ވީޕީއެން ބޭނުންކުރާ ފަރާތްތަށް ޖޫރިމަނާ ކުރުމުގެ އެއްވެސް ނިޔަތެއް ނެތް ކަމަށެވެ.
"މިފަދަ ލަފާތަކަކީ ވަރަށް ބޮޑު އޮޅުމެކެވެ،" އެ އިދާރާއިން ބުނެފައިވެއެވެ.
ވީޕީއެންތަކަށް އަމާޒުކޮށްފައިވާ އެ އިދާރާގެ ޑްރާފްޓް އަމުރުގައި "ޖޫރިމަނާ ތަޢާރަފުކުރުމެއް ނެތް އަދި ތަޢާރަފު ނުކުރެވޭނެ" ކަމަށް ވެސް ބުނެފައިވެއެވެ.
ސްޓޭޓް ޑޫމާގެ އިންފޮމޭޝަން ޕޮލިސީ، ޓެކްނޮލޮޖީ އަދި ކޮމިއުނިކޭޝަންސް ކޮމިޓީގެ މެންބަރު އެންޓޮން ނެމްކިން ވެސް މި ރިޕޯޓު ދޮގުކޮށްފައިވެއެވެ.
މި ޚަބަރު ފެތުރުމާ ގުޅިގެން ރަޝިޔާގެ އިންޓަނެޓް ބޭނުންކުރާ މީހުންގެ މެދުގައި ކަންބޮޑުވުން އުފެދިފައިވެއެވެ. ނަމަވެސް، ރަސްމީ ފަރާތްތަކުން މި މަޢުލޫމާތު ދޮގުކޮށްފައިވުމާ އެކު، ގިނަ ފަރާތްތަކުން މިހާރު ވަނީ ހިތްހަމަޖެހިފައެވެ.
ރަޝިޔާގައި ވީޕީއެން ބޭނުންކުރުން އާންމުވެފައިވަނީ ސަރުކާރުން ބައެއް ވެބްސައިޓްތައް ބްލޮކްކޮށްފައިވުމާ ގުޅިގެންނެވެ. ގިނަ ފަރާތްތަކުން ވީޕީއެން ބޭނުންކުރަނީ މިފަދަ ބްލޮކްތައް ފަހަނައަޅައި ދިއުމަށާއި، އިންޓަނެޓް ބޭނުންކުރުމުގައި އިތުރު މިނިވަންކަމެއް ހޯދުމަށެވެ.
ރޮސްކޮމްނާޒޯރުގެ މި ބަޔާނުން ދޭހަވަނީ، މި ވަގުތަށް ރަޝިޔާގައި ވީޕީއެން ބޭނުންކުރުމަކީ ޤާނޫނީ ގޮތުން މައްސަލައެއް ނެތް ކަމެއްކަމެވެ. ނަމަވެސް، ކުރިއަށް އޮތްތަނުގައި މިކަމާ ގުޅޭގޮތުން އިތުރު ބަދަލުތަކެއް އަތުވެދާނެކަމަށް ބައެއް ފަރާތްތަކުން ލަފާކުރެއެވެ.