ނެޓްފްލިކްސްގެ އެންމެ ބޮޑު އެއް ޝޯ ކަމަށްވާ "ސްޓްރޭންޖާ ތިންގްސް"ގެ ފަހު ސީޒަންގެ ޝޫޓިން އެންމެ ފަހުން ނިންމާލައިފިއެވެ.
ސްޓްރޭންޖާ ތިންގްސްގެ ފަހު ސީޒަން ނުވަތަ ފަސްވަނަ ސީޒަންގެ މަސައްކަތް ފަށާފައިވަނީ މީގެ ދެ އަހަރު ކުރީންނެވެ. އެއަށް ފަހު އެކި ސަބަބުތަކާ ހުރެ ޝޯގެ ޝޫޓިން ޑިލޭވަމުން ގޮސް އެ ނިންމާލެވޭ ވަރުވީ އެތައް ބައެއްގެ ފާޑު ކިޔުންތައް ރައްދުވެފައިވާ ދަނޑިވަޅެއްގައެވެ.
ސްޓްރޭންޖާ ތިންގްސްގެ ފަހު ސީޒަން ޝޫޓިން ނިންމާލިއިރު ކާސްޓުންނާއި ކްރޫއިންނާ ދެމެދު ދެކޭ ދެކުން ވަނީ ވަރަށް ބޮޑަށް ބަދަލުވެފައެވެ. އޭގެ ތެރެއިން އެންމެ ފާހަގަކޮށްލެވޭ އެކަކަކީ ލީޑް އެކްޓަރެއް ކަމަށްވާ ނޮއާ ޝްނެޕެވެ.
އިޒްރާއިލަށް ސަޕޯޓުކޮށް ތަފާތު ވާހަކަތައް ދައްކައި އުޅުމުގެ ސަބަބުން އޭނާއަށް އާންމުންގެ ތެރެއިން ވަނީ ބޮޑު ފާޑު ކިޔުމެއް ރައްދުވެފައެވެ. ހަމަ އެއާ އެކު ކާސްޓާއި ކްރޫގެ އެތައް ބަޔަކު ވެސް މިފަދަ ވިސްނުމެއް ގެންގުޅޭކަން އެނގުމާ ގުޅިގެން ވެސް މީހުންގެ މެދުގައި ޝޯއަށް އޮތް ހިޔާލުތަފާތުވުން އޮތީ އިތުރުވެފައެވެ.
އެންމެ ފަހުން ޝޯގެ ޝޫޓިން ނިންމާލާފައިވަނީ ޝޯ ބޮއިކޮޓްކުރުމަށް ގޮވާލާފައިވާ ދަނޑިވަޅެއްގައެވެ. ސޯޝަލް މީޑީއާގައި އެތައް ބަޔަކު އަންނަނީ ސްޓްރޭންޖާ ތިންގްސްގެ އާ ސީޒަން ނެޓްފްލިކްސްއިން ނުބެލުމަށް ގޮވާލަމުންނެވެ.
އަދި، ދެ ސީޒަންގެ ދެމެދުގައި ގިނަ ދުވަސް ވާތީ ޝޯ މަތީން ފޫހިވާ ކަމަށް ވެސް އެތައް ބަޔަކު އަންނަނީ ބުނަމުންނެވެ.
ކޮންމެއަކަސް ޕްރޮޑަކްޝަނުން އެންމެ ފަހުން ބުނެފައިވަނީ އާ ސީޒަން ޝޫޓިން އެއްކޮށް ނިންމާލެވިފައިވާ ކަމަށެވެ. މި ސީޒަނުން ފެންނާނީ ދުވަހަކު ވެސް ހީވެސް ނުކުރާ ފަދަ ބޮޑެތި ޓްވިސްޓުތައް ކަމަށް ޕްރޮޑަކްޝަނުން ބުނެއެވެ. އާ ސީޒަން ރިލީޒްކުރާނެ ތާރީޚެއް ހާމަކޮށްފައިނުވި ނަމަވެސް އަންނަ އަހަރުގެ ފަހު ކޮޅުގައި ސްޓްރީމްކުރަން ފަށާނެ ކަމަށް ލަފާ ކުރެއެވެ.