ކޮންމެ އަހަރެއް ފެށޭނީ ތަފާތު އެކި ގޯލުތަކެއް ކަނޑައަޅައި އެ ގޯލުތައް ކާމިޔާބުކުރުމުގެ އުންމީދުގައެވެ. މި އަހަރު ވެސް ފެށުނީ އެތައް ބައެއް ތަފާތު ގިނަ ގޯލުތަކަކާ އެކުގައެވެ. ނަމަވެސް، މިހާރު އަހަރު ނިމެން ދުވަސްކޮޅަކަށް ވެފައިވާއިރު މިއިން އެއްވެސް ގޯލެއް ހާސިލުވިހެއްޔެވެ؟
ކޮންމެ އަހަރެއް ފެށޭއިރު ވެސް އެންމެ ގިނަ ބަޔަކު ކަނޑައަޅާ އެއް ލަނޑުދަނޑިއަކީ އާ އުންމީދަކާ އެކު ޖިމަށް ދާން ފެށުމެވެ. ގަވާއިދުން ޖިމަށް ދިޔުމުގެ ގޯލަކީ އެތައް ބަޔަކު ކާމިޔާބުކުރަން ބޭނުންވާ ގޯލަކަށްވާއިރު އަހަރު ނިމޭއިރު ގިނަ ބަޔަކަށް އެ ގޯލަށް ދެވޭ ގޮތެއް ނުވެއެވެ.
"ކޮންމެ އަހަރެއް ފެށޭއިރު ޖެނުއަރީގެ ކުރީކޮޅު ޖިމް ހަމަ ވަރަށް ބޮޑަށް ފުރިފައި އޮންނަނީ. އެކަމު ދުވަސްކޮޅެއް ވާއިރަށް މީހުންތައް މަދުވާން ފަށާނެ. މި އަހަރު ވެސް ހަމަ އެ ކަހަލަ ގޮތަކަށް ދިޔައީ،" މާލޭގެ ޖިމެއްގައި މަސައްކަތްކުރާ ޕާސަނަލް ޓްރެއިނަރެއް ބުންޏެވެ.
އޭނާ ބުނި ގޮތުގައި ގިނަ ބަޔަކު ޖިމަށް ދިޔުން ހުއްޓާލި ނަމަވެސް ގިނަ އަދަދެއްގެ މީހުން މި އަހަރު ޖިމަށް އަލަށް ގުޅި ގަވާއިދުން ޖިމަށް ދިޔަ ކަމަށް ވެސް ފާހަގަކުރިއެވެ.
ނަމަވެސް، އާ އަހަރާ އެކު ޖިމަށް ދިޔުމުގެ އިތުރުން ވެސް ތަފާތު އެކި ކަހަލަ ގޯލުތައް ކަނޑައަޅައެވެ. އޭގެ ތެރޭގައި ކެއުމުގެ އާދަތައް ރަނގަޅު ކުރުމާއި އާ ހުނަރެއް ދަސްކުރުމުގެ އިތުރުން އާއިލާއަށް އިތުރަށް ވަގުތު ދިނުން ފަދަ ކަންތައް ހިމެނެއެވެ.
"މި އަހަރު ފެށުނުއިރު އެންމެ ފުރަތަމަ ވެސް ހިތަށް އެރުވީ އާއިލާއާ އެކު ހޭދަކުރާ ވަގުތު ގިނަ ކުރާނަމޭ. އެއާ އެކު ވަޒީފާއިން ކެނޑިގެން ރަށަށް ގޮސް ކުޑަ ކެފޭ އެއް ހިންގަން ފެށީ. މިއީ އަންހެނުން ވެސް ބޭނުންވި ގޮތް،" މާލެއިން އަތޮޅު ތެރެއަށް ދިރިއުޅުން ބަދަލުކުރި 26 އަހަރުގެ ޒުވާނަކު ކިޔައިދިނެވެ.
ދެ މީހުން ވެސް ބޭނުންވީ މާލެއިން ދުރަށް ދިޔުމަށް ކަމަށްވާތީ މި ނިންމުން ވެގެން ދިޔައީ ފަސޭހަ ނިންމުމަކަށް ކަމަށް އޭނާ ބުނެއެވެ. މިހާރު ދަރިފުޅާއި އަންހެނުންނާ އެކު ހޭދަކުރާ ވަގުތު އިތުރު ކުރެވިއްޖެ ކަމަށާއި އާ ގޯލެއް ހާސިލުކުރެވިއްޖެ ކަމަށް އޭނާ ބުންޏެވެ.
އަހަރުގެ ގޯލަކީ ބޮޑު ގޯލަކަށް ކޮންމެހެންވާކަށް ނުޖެހެއެވެ. އެ ގޯލަކީ ތިމާގެ ދިރިއުޅުމަށް ކުޑަ ނަމަވެސް ރަނގަޅު ބަދަލު އަންނަ ގޯލަކަށްވާނަމަ އެއީ ރަނގަޅު ގޯލެކެވެ. އެހެންވީމާ، މި އަހަރު ކަނޑައެޅި ގޯލުތަކުން ކިތައް ގޯލު ކާމިޔާބުވި ހެއްޔެވެ؟ އަދި އެއާއެކު އާ އަހަރަށް ކަނޑައެޅުމަށް ވިސްނާފައިވަނީ ކޮން ކަހަލަ ގޯލުތަކެއް ހެއްޔެވެ؟