މި އަހަރުގެ މިހާތަނަށް ޒަކާތު ފަންޑަށް 98 މިލިއަން ރުފިޔާ ލިބިފައިވާއިރު، އެއީ ރެކޯޑް އަދަދެއް ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
ޝަހީމް މީޑިއާތަކާ ހިއްސާކުރެއްވި މެސެޖެއްގައި ވިދާޅުވީ، މިއަދާ ހަމައަށް ޒަކާތު ފަންޑަށް 98 މިލިއަން ރުފިޔާ ލިބިފައިވާއިރު މިއީ ރާއްޖޭގެ ތާރީޚުގައި އެންމެ ގިނަ އަދަދަކަށް ޒަކާތަށް ފައިސާ ލިބުނު އަހަރު ކަމަށެވެ.
އޭނާ ވިދާޅުވީ މިނިސްޓްރީގެ އަމާޒަކީ އަހަރަކު މަދުވެގެން 100 މިލިއަން ޒަކާތު ފަންޑަށް ޖަމާކުރުން ކަމަށެވެ.
"އަދި ޝަރުޢީ އަސާސްގެ އަލީގައި ޒަކާތުގެ ޙައްޤުވެރިންނަށް ފުޅާދާއިރާއެއްގައި އެހީތެރިވުން. މިއީ ރައީސް ޑރ. [މުޙައްމަދު] މުއިއްޒުގެ ސަރުކާރުން ޒަކާތުގެ ޚާއްޞަ އިދާރާއެއްގެ އުފެެއްދުމުގެ ހެޔޮ ނަތީޖާ،" ޝަހީމް ވިދާޅުވިއެވެ.
ޒަކާތު ފަންޑުން މިސްކީނުންނާއި ފަގީރުންގެ ބޭސްފަރުވާއަށް ޚަރަދު ކުރުމުގެ އިތުރުން، ފަލަސްތީނުގެ ހާލުގައި ޖެހިފައިވާ ރައްޔިތުންނަށް ވެސް މި އަހަރު އެހީ ފޯރުކޮށްދީފައިވެއެވެ.
އެގޮތުން ގަތަރު ރެޑް ކްރެސެންޓް ސޮސައިޓީ މެދުވެރިކޮށްގެން ރާއްޖޭގެ ފަރާތުން ފަލަސްތީނަށް 50،000 ކޭސް ފެން ބެހުމަށް ހަމަޖެހިފައިވެއެވެ.