ދިވެހިރާއްޖޭގެ ޒަކާތު ފަންޑުގެ އެހީތެރިކަމާއެކު ފަލަސްތީނުގެ ހާލުގައި ޖެހިފައިވާ ރައްޔިތުންނަށް ބޯފެން ފޯރުކޮށްދީފިއެވެ.
މިދިޔަ މަހުގެ 27ގައި ރާއްޖޭގެ ޒަކާތު ފަންޑުން ޣައްޒާގެ ރައްޔިތުންނަށް ހަދިޔާކުރުމަށް ނިންމާފައިވާ އެއްލައްކަ ޑޮލަރު، ގަތަރު ރެޑް ކްރެސެންޓް ސޮސައިޓީއާ ހަވާލުކުރުމަށް އިސްލާމީ ކަންތައްތަކާ ބެހޭ ވުޒާރާއާއި ގަތަރު ރެޑް ކްރެސެންޓް ސޮސައިޓީއާ ދެމެދު އެއްބަސްވުމެއްގައި ސޮއިކުރިއެވެ.
އިސްލާމީ ކަންތައްތަކާ ބެހޭ ވުޒާރާއިން ބުނީ ޒަކާތު ހައުސްގެ ފަރާތުން ފޮނުވާ އެއް ލައްކަ ޑޮލަރު ޚަރަދުކުރުމަށް ހަމަޖެހިފައިވަނީ ޣައްޒާގެ ރައްޔިތުންނަށް ސާފު ބޯފެން ފޯރުކޮށްދިނުމަށް ގަތަރު ރެޑްކްރެސެންޓް ސޮސައިޓީން ކުރިއަށް ގެންދާ މަޝްރޫއަށް ކަމަށެވެ.
އެ މަޝްރޫއުގެ ދަށުން ބޯފެން ބެހުމުގެ މަސައްކަތް މި ފަހުން ޣައްޒާގައި ވަނީ ފަށާފައެވެ.
އެގޮތުން ޣައްޒާގެ އަލްޝިފާ ހޮސްޕިޓަލާއި އަލް ހަޔާތު ހޮސްޕިޓަލުގައި ހާލު ޖެހިފައިވާ މީހުންނަށް މިހާތަނަށް 6،000 ކޭސް ފެން ބަހާފައިވާ ކަމަށް ގަތަރު ރެޑް ކްރެސެންޓުން ވަނީ ބުނެފައެވެ.
އަދި ހާލުގައި ޖެހިފައިވާ 60،000 ރައްޔިތުންނަށް ޒަކާތު ހައުސްގެ އެހީގައި 50،000 ކޭސް ފެން ބެހުމަށް ނިންމާފައިވާ ކަމަށް ވެސް ގަތަރު ރެޑް ކްރެސެންޓުން ބުންޏެވެ.
އިސްލާމީ ކަންތައްތަކާ ބެހޭ ވުޒާރާއިން މީގެ ކުރިން ބުނި ގޮތުގައި މިއީ ޒަކާތު ފަންޑުން ރާއްޖޭން ބޭރުގެ ފަރާތަކަށް އެހީތެރިކަން ފޯރުކޮށްދޭ ފުރަތަމަ ފަހަރެވެ.
އަދި ފަލަސްޠީނު ރައްޔިތުންނަށް އެހީވުމަކީ ރައީސް ޑރ. މުޙައްމަދު މުޢިއްޒުގެ އިރުޝާދުގެ ދަށުން ކުރިއަށް ގެންދާ ކަމެއް ކަމަށްވެސް އެ ވުޒާރާއިން ވަނީ ބުނެފައެވެ.
ޒަކާތު ހައުސްގެ ނަމުގައި ވަކި އިދާރާއެއް އުފެއްދީ މި ސަރުކާރުންނެވެ. އެއީ، ޒަކާތާ މެދު މީހުން އަހުލުވެރިކުރުވައި ލޯބި ޖެއްސުމުގެ ބޭނުމުގައި ކުރި ކަމެއް ކަމަށް އިސްލާމިކް މިނިސްޓްރީން މީގެ ކުރިން ވަނީ ބުނެފައެވެ.
މީގެ ކުރިން, 'ފަލަސްތީނާ އެކު ދިވެހީން' ނަމުގައި ދައުލަތުގެ މީޑިއާ، ޕީއެސްއެމުން ކުރިއަށް ގެންދިޔަ ޓެލަތޯނަކަށް 19 މިލިއަން ރުފިޔާ ލިބިފައިވެއެވެ. ފޮރިން މިނިސްޓްރީން ވަނީ އެ ފައިސާ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުވާ)އާ ހަވާލުކޮށްފައިވާ ކަމަށް ބުނެފައެވެ.