އައިލެންޑް ބެވަރެޖް މޯލްޑިވްސް (އައިބީއެމް)އަށް ލޭބާ އެކޮމޮޑޭޝަނެއް ހޯދުމާ ގުޅޭ އެއްބަސްވުން ބާތިލުކުރުމަށް މާލޭ ވޯޓާ ސުވަރޭޖް ކޮމްޕެނީ (އެމްޑަބްލިއުއެސްސީ)އިން އަންގައިފިއެވެ.
އެގޮތަށް އަންގާފައި ވަނީ އެ އެއްބަސްވުމުން ކޮރަޕްޝަނަށް މަގުފަހިވާ ކަމަށް ބުނެ ސޯޝަލް މީޑިއާގައި ފެންމަތިވި މައްސަލައަކާ ގުޅިގެންނެވެ.
އައިބީއެމްއިން ލޭބާ އެކޮމޮޑޭޝަން މީގެ ކުރިން ކުއްޔަށް ނަގާފައި ހުރީ މަހަކު 60،000 ރުފިޔާއަށެވެ. ނަމަވެސް އެ އެއްބަސްވުން ބަދަލުކޮށް އައު އެއްބަސްވުން ހަދާފައި ވަނީ ބިޑުކުރުމެއް ނެތި މަހަކު 200،000 ރުފިޔާ ދައްކާ ގޮތަށް ކަމަށް، ސޯޝަލް މީޑިއާގައި ދައުރުކުރަމުންދާ އެއްބަސްވުމުން ދައްކައެވެ. އެއީ ފަސް އަހަރަށް ބަލާއިރު 12 މިލިއަން ރުފިޔާއެވެ.
އެކަމުގެ ކަންބޮޑުވުން ފާޅުކުރަމުން ދަނިކޮށް، އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން އެކްސްގައި ކުރެއްވި ޕޯސްޓެއްގައި ވިދާޅުވީ އައިބީއެމްއަށް ލޭބާ އެކޮމޮޑޭޝަނެއް ހޯދުމުގެ މަރުހަލާތަކާއި އަގުތަކާ ގުޅޭ ޝަކުވާއެއް މީގެ ދުވަސްކޮޅެއް ކުރިން ލިބިފައިވާ ކަމަށެވެ.
އަދި އެކަން ކުރިޔަށް ގޮސްފައިވާ ގޮތާއި އަގުތައް، އެ ކުންފުނީގެ އިންޓާނަލް އޮޑިޓް ޓީމުން ބެލުމަށްފަހު އެމްޑަބްލިއުއެސްސީގެ ބޯޑުގައި މަޝްވަރާކުރުމަށްފަހު އެކަމާ ގުޅިގެން އަޅަންޖެހޭ ފިޔަވަޅުތައް އެޅުމަށް މިހާރު އައިބީއެމްއަށް އަންގާފައިވާނެ ކަމަށް ވެސް މަތީން ވިދާޅުވިއެވެ.
އެގޮތުން މަތީން ވިދާޅުވީ މިހާރުގެ އެއްބަސްވުން ބާތިލުކޮށް، ލޭބާ އެކޮމޮޑޭޝަން ހޯދުމުގެ މަސައްކަތް އަލުން ކުރިއަށް ގެންދިޔުމަށް އައިބީއެމްއަށް އަންގާފައިވާ ކަަމަށެވެ.
ސޯޝަލް މީޑިއާގައި އާންމުން ދަނީ އެއީ ކޮރަޕްޝަންގެ އަމަލެއް ކަމަށް ބުނެ ކަންބޮޑުވުން ފާޅުކުރަމުންނެވެ. އައިބީއެމްއިން އެކޮމޮޑޭޝަން ބްލޮކް ފަސް އަހަރު ދުވަހަށް ކުއްޔަށް ނެގީ ޓެލެ މޯލްޑިވްސް ކިޔާ ކުންފުންޏެއް މެދުވެރިވެގެން ކަމަށް އެ ލިޔެކިޔުންތަކުން ދައްކައެވެ.