ހުޅުމާލެ ފުރަތަމަ އަދި ދެވަނަ ފިޔަވަހީގެ އެކި ސަރަހައްދުތަކުގައި ގަވާއިދާ ޚިލާފަށް ވެހިކަލް ދޮވެ ސާފުކުރުމުގެ މަސައްކަތް ކުރަމުންދިޔަ އަށް ބިދޭސީން އިމިގްރޭޝަނުގެ ބެލުމުގެ ދަށަށް އިއްޔެ ގެންގޮސްފިއެވެ.
އިމިގްރޭޝަނުން މިއަދު އެކްސަައި ކޮށްފައިވާ ޕޯސްޓެއްގައި ވަނީ ހުޅުމާލޭގެ ދެ ފިޔަވަހީގެ އެކި ސަރަހައްދުތަކުގައި ގަވާއިދާ ޚިލާފަށް ވެހިކަލް ދޮވެ ސާފުކުރުމުގެ މަސައްކަތް ކުރަމުންދާ ބިދޭސީންނަށް އަމާޒުކޮށް އިއްޔެ ރެއިޑު އޮޕަރޭޝަނެއް ހިންގާފައިވާ ކަމަށެވެ.
އެގޮތުން ސައްހަ ވިސާއެއް ނެތި އުޅުނު އަށް ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އިމިގްރޭޝަނުން ބުންޏެވެ.
ހުޅުމާލޭގައި ހިންގާ ރެއިޑް އޮޕަރޭޝަންތަކުގައި މިދިޔަ އާދިއްތަ ދުވަހު ވަނީ 26 ތަނެއް ބަލައި ފާސްކޮށް ހަތަރު ބިދޭސީން އިމިގްރޭޝަނުގެ ބެލުމުގެ ދަށަށް ގެންގޮސްފައެވެ. އަދި ދެވަނަ ފިޔަވަހީގެ ހިޔާ ފުލެޓުތަކުގައި ހިންގަމުންދާ ވިޔަފާރިތަކަށް ޚާއްސަކޮށް މިދިޔަ ހޮނިހިރު ދުވަހު ކުރިއަށް ގެންދިޔަ ރެއިޑް އޮޕަރޭޝަނުގައި 13 ތަނެއް ބަލައި ފާސްކޮށް، ގަވައިދާ ޚިލާފަށް އުޅޭ ތިން ބިދޭސީއަކު ވަނީ އަތުލައިގަނެފައެވެ.
މި ސަރުކާރުގެ އަމާޒަކީ ގަވައިދާ ޚިލާފަށް އުޅޭ ބިދޭސީންގެ މައްސަލަ ފުރަތަމަ ތިން އަހަރުގެ ތެރޭގައި ހައްލުކުރުން ކަމަށް ހޯމް މިނިސްޓަރު އަލީ އިހުސާން ވަނީ މީގެ ކުރިން ވިދާޅުވެފައެވެ.
އެ އަމާޒަށް ވާސިލުވުމަށް ޓަކައި އިމިގްރޭޝަނުން ގެންދަނީ ނުގަވައިދަށް އުޅޭ ބިދޭސީން ދެނެގަނެ، އެ މީހުން ގަވާއިދުގެ ތެރެއަށް ފެއްތުމަށް މަސައްކަތްކުރަމުންނެވެ. އޭގެތެރެއިން ބައެއް ބިދޭސީން ގައުމަށް ޑީޕޯޓު ވެސް ކުރެއެވެ.
އިމިގްރޭޝަނުން މީގެ ކުރިން ވަނީ، މި އަހަރުގެ އަމާޒަކީ ގަވާއިދާ ޚިލާފަށް އުޅޭ 5،000 ބިދޭސީން ފޮނުވައިލުން ކަމަށާއި އެ އަމާޒަށް މިދިޔަ މަހު ވާސިލުވެފައިވާ ކަމަށް ބުނެފައެވެ.
ބިދޭސީންގެ މައްސަލަ ހައްލުކުރުމަށް ކުރާ އިތުރު މަސައްކަތަކީ ބިދޭސީންގެ މައުލޫމާތު އެއްކުރުމަށް ކުރިއަށްގެންދާ "އޮޕަރޭޝަން ކުރަނގި"އެވެ. އެ އޮޕަރޭޝަނުގައި މިހާތަނަށް 18،000 އަށް ވުރެން ގިނަ ބިދޭސީންގެ ބަޔޯމެޓްރިކް ޑޭޓާ އެއްކޮށްފައިވެއެވެ.