މާލޭގެ ލޯކަލް މާރުކޭޓު ސަރަހައްދުގައި ބިދޭސީންގެ ބާރު އޮންނަ ކަމުގެ މައުލޫމާތު ލިބިގެން، މޯލްޑިވްސް އިމިގްރޭޝަނުން އެ ސަރަހައްދުން 148 ބިދޭސީން ބަލައި ފާސްކޮށްފިއެވެ.
އިމިގްރޭޝަނުން އެކްސްގައި ކުރި ޕޯސްޓެއްގައި ބުނީ, އިމިގްރޭޝަން ވޮޗްއަށް ލިބިފައިވާ މައުލޫމާތަކާ ގުޅިގެން އެ ޚިދުމަތުގެ ޓާސްކްފޯހުން މިއަދު ފަތިހުން ފެށިގެން މެންދުރާ ހަމައަށް ލޯކަލް މާރުކޭޓު ސަރަހައްދުގައި ބޮޑު ރެއިޑް އޮޕަރޭޝަނެއް ކުރިއަށްގެންދިޔަ ކަމަށެވެ.
އެ އޮޕަރޭޝަންގައި އެ ސަރަހައްދުގައި އަޅާފައިވާ އުޅަނދުފަހަރާއި، އެ ސަރަހައްދުން ލަފާ، ފުރާ އުޅަނދުފަހަރު ވެސް ބަލައި ފާސްކުރި ކަމަށް އިމިގްރޭޝަނުން ބުންޏެވެ.
"އެގޮތުން ޖުމްލަ 148 ބިދޭސީން ބަލައި ފާސްކޮށް، ގަވާއިދާ ޚިލާފަށް އުޅޭ ބިދޭސީ 22 ފިރިހެނަކާއި 01 އަންހެނަކު ވަނީ އިމިގްރޭޝަންގެ ބެލުމުގެ ދަށަށް ގެނެސްފައި،" އެ ޚިދުމަތުން ބުނެފައިވެއެވެ.
އިމިގްރޭޝަން ޓާސްކްފޯހުން މާރުކޭޓު ސަރަހައްދުގައި: އެ ސަރަހައްދުގައި ބިދޭސީންގެ ކޮންޓްރޯލް އިތުރުވުމުގެ ޝަކުވާ ލިބިފައިވާ ކަމަށް އެ ޚިދުމަތުން ބުނޭ -- ފޮޓޯ/ އިމިގްރޭޝަން
މީގެ ކުރިން ވެސް އިމިގްރޭޝަނުން މަސް މާރުކޭޓު ސަރަހައްދު ބަލައި، ގަވައިދާ ޚިލާފަށް އުޅެމުން ދިޔަ ބިދޭސީންތަކެއް އަތުލައިގެންފައިވެއެވެ.
މާލޭ ސަރަހައްދުގެ މާރުކޭޓު ގޮޅިތަކުގައި ވިޔަފާރިކުރަން ބިދޭސީން ތިބުމުގެ މައްސަލައަކީ މީގެ ކުރިން ވެސް އިމިގްރޭޝަންގެ ސަމާލުކަމަށް އައިސް، ފިޔަވަޅު އަޅައިފައިވާ މައްސަލައެކެވެ.
ހޯމް މިނިސްޓަރު އަލީ އިހުސާން މީގެ ކުރިން ވަނީ، ގަވާއިދާ ޚިލާފަށް ރާއްޖޭގައި އުޅޭ ބިދޭސީން ދެނެގަނެ، އެ މީހުން ގަވާއިދަށް ފެއްތުމުގެ މަސައްކަތް ތިން އަހަރު ތެރޭގައި އެއްކޮށް ނިންމާލެވޭނެ ކަމަށް ވިދާޅުވެފައެވެ. އަދި އިމިގްރޭޝަނުން ކުރިއަށްގެންދާ އޮޕަރޭޝަންތަކުގެ މައިގަނޑު މަގުސަދަކީ ބިދޭސީން ހައްޔަރުކޮށް ޑީޕޯޓުކުރުން ނޫން ކަމަށާއި، ގަވައިދާ އެއްގޮތަށް ހުއްދަ ދެވެން ތިބި މީހުންނަށް ހުއްދަ ދިނުން ކަމަށް ވެސް މިނިސްޓަރު ވިދާޅުވިއެވެ.