އިމިގްރޭޝަނުން ހުޅުމާލޭގެ ދެވަނަ ފިޔަވަހީގެ ހިޔާ ފުލެޓުތަކުގައި ހިންގަމުންދާ ވިޔަފާރިތަކަށް ޚާއްސަކޮށް އިއްޔެ ކުރިއަށް ގެންދިޔަ ރެއިޑް އޮޕަރޭޝަނުގައި 13 ތަނެއް ބަލައި ފާސްކޮށް، ގަވައިދާ ޚިލާފަށް އުޅޭ ތިން ބިދޭސީއަކު ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން އެކްސްގައި ކުރި ޕޯސްޓެއްގައި މިއަދު ބުނީ އިއްޔެގެ ރެއިޑު އޮޕަރޭޝަންގައި އަށް ފިހާރައާއި، ހަތަރު ކެފޭ، ރެސްޓޯރަންޓު، ބޭކަރީ އަދި ސެލޫނެއް ބަލައި ފާސްކޮށްފައިވާ ކަމަށެވެ.
އޭގެ ތެރެއިން ދެ ތަނެއްގައި ގަވާއިދާ ޚިލާފަށް މަސައްކަތް ކުރަމުންދިޔަ ތިން މީހަކު އިމިގްރޭޝަންގެ ބެލުމުގެ ދަށަށް ގެނެވިފައިވާ ކަަމަށް ވެސް އިމިގްރޭޝަނުން ބުންޏެވެ.
މި ސަރުކާރުގެ އަމާޒަކީ ގަވައިދާ ޚިލާފަށް އުޅޭ ބިދޭސީންގެ މައްސަލަ ފުރަތަމަ ތިން އަހަރުގެ ތެރޭގައި ހައްލުކުރުން ކަމަށް ހޯމް މިނިސްޓަރު އަލީ އިހުސާން ވަނީ މީގެ ކުރިން ވިދާޅުވެފައެވެ.
އެ އަމާޒަށް ވާސިލުވުމަށް ޓަކައި އިމިގްރޭޝަނުން ގެންދަނީ ނުގަވައިދަށް އުޅޭ ބިދޭސީން ދެނެގަނެ، އެ މީހުން ގަވާއިދުގެ ތެރެއަށް ފެއްތުމަށް މަސައްކަތްކުރަމުންނެވެ. އޭގެތެރެއިން ބައެއް ބިދޭސީން ގައުމަށް ޑީޕޯޓު ވެސް ކުރެއެވެ.
އިމިގްރޭޝަނުން މީގެ ކުރިން ވަނީ، މި އަހަރުގެ އަމާޒަކީ ގަވާއިދާ ޚިލާފަށް އުޅޭ 5،000 ބިދޭސީން ފޮނުވައިލުން ކަމަށާއި އެ އަމާޒަށް މިދިޔަ މަހު ވާސިލުވެފައިވާ ކަމަށް ބުނެފައެވެ.
ބިދޭސީންގެ މައްސަލަ ހައްލުކުރުމަށް ކުރާ އިތުރު މަސައްކަތަކީ ބިދޭސީންގެ މައުލޫމާތު އެއްކުރުމަށް ކުރިއަށްގެންދާ "އޮޕަރޭޝަން ކުރަނގި" ކަމަށެވެ.
އެގޮތުން މިހާތަނަށް 18،000 އަށް ވުރެން ގިނަ ބިދޭސީންގެ ބަޔޯމެޓްރިކް ޑޭޓާ އެއްކޮށްފައިވެއެވެ.
އޮޕަރޭޝަން ކުރަނގީގެ މައިގަނޑު މަގުސަދަކީ ދިވެހިރާއްޖޭގައި ޤަވާއިދާ ޚިލާފަށް ދިރިއުޅެމުންދާ ބިދޭސީ މަސައްކަތްތެރިންގެ މައްސަލައަށް ދާއިމީ ހައްލެއް ހޯދުމެވެ.