ފައިގެ ނުކުޅެދުންތެރިކަމެއް ދިމާވެ ހިނގުމަށް އުޒުރުވެރިވާ މީހުން ހިނގުމަށް އެހީވެދޭ ރޮބޮޓެއް ދެކުނު ކޮރެއާއިން އުފައްދައިފިއެވެ.
ދެކުނު ކޮރެއާގެ ދިރާސާކުރާ ފަރާތްތަކުން ލުއި ރޮބޮޓެއް އުފައްދާފައިވާއިރު، މި ރޮބޮޓަކީ ނުހިނގޭ މީހުންގެ ގާތަށް އަމިއްލައަށް ހިނގާފައި ގޮސް، އެ މީހުންނާ ގުޅި، ހިނގުމަށާއި، ސިޑިން އަރަން އެހީތެރިވެދޭ ރޮބޮޓެކެވެ.
ކޮރެއާ އެޑްވާންސްޑް އިންސްޓިޓިއުޓް އޮފް ސައިންސް އެންޑް ޓެކްނޮލޮޖީ (ކައިސްޓް) ގެ އެކްސޯސްކެލެޓަން ލެބޯޓްރީގެ ޓީމުން ބުނީ އެ މީހުންގެ މަޤްޞަދަކީ ނުކުޅެދުންތެރިކަން ހުންނަ މީހުންގެ ދިރިއުޅުމާ ގުޅިލާމެހިފައިވާ ރޮބޮޓެއް އުފެއްދުން ކަމަށެވެ.
ކައިސްޓްގެ ޓީމުގައި ހިމެނޭ، އަދި އަމިއްލައަށް ފައިގެ ބޭނުން ނުކުރެވޭ ކިމް ސޭންގް-ހްވާން މި ރޮބޮޓް ތަޖުރިބާކޮށް ދައްކާލިއެވެ. މި ރޮބޮޓްގެ އެހީގައި އޭނާއަށް ގަޑިއަކު 3.2 ކިލޯމީޓަރުގެ ސްޕީޑުގައި ހިނގައި، ސިޑިން އަރައި، އަދި އަރިއަށް ހިނގާފައި ގޮސް ބެންޗެއްގައި އިށީނދެވުނެވެ.
"މިއީ ވަރަށް ތަފާތު ރޮބޮޓެއް. އަހަރެން ވީލްޗެއާގައި އިނަސް އަދި ކޮޅަށް ހުއްޓަސް، މި ރޮބޮޓަށް އަހަރެންގެ ގާތަށް އާދެވޭ. އަދި އަހަރެން ތެދުވުމަށް އެހީތެރިވެދޭ،" ކިމް ބުންޏެވެ.
"ވޯކްއޮން ސޫޓް އެފް1"ގެ ނަމުން ނަންދީފައިވާ މި ރޮބޮޓް ހަދާފައި ވަނީ އެލުމިނިއަމް އަދި ޓައިޓޭނިއަމް ބޭނުންކޮށްގެންނެވެ. މި ރޮބޮޓުގެ ބަރުދަނަކީ 50 ކިލޯގްރާމެވެ. އަދި މީހުން ހިނގާއިރު ގައިގެ ޖޮއިންޓްތަކުން ކުރާ ހަރަކާތްތައް ސިމިއުލޭޓްކުރުމަށް 12 އިލެކްޓްރޯނިކް މޯޓަރު ހަރުކޮށްފައިވެއެވެ.
ކައިސްޓްގެ ޓީމުގެ އަނެއް މެންބަރު ޕާކް ޖިއޯންގް-ސޫ ބުނީ އޭނާއަށް މި ޚިޔާލު ލިބުނީ "އަޔަން މޭން" ފިލްމު ބެލުމަށްފަހު ކަމަށެވެ.
"އައަން މޭން ބެލުމަށްފަހު އަހަރެން ހިތަށްއެރީ ޙަޤީޤީ ދުނިޔޭގައި ރޮބޮޓެއްގެ އެހީގައި މީހުންނަށް އެހީތެރިވެދެވުނިއްޔާ ކިހާ ރަނގަޅުވާނެ ހެއްޔެވެ،" އޭނާ ބުންޏެވެ.
ރޮބޮޓް ބޭނުންކުރާ މީހާ ހިނގާއިރު ބެލެންސް ހިފެހެއްޓުމަށްޓަކައި، ރޮބޮޓުގެ އަޑީގައާއި މަތީ ބައިގައި ސެންސަރުތަކެއް ހަރުކޮށްފައިވެއެވެ. މި ސެންސަރުތަކުން ސިކުންތަކު 1،000 ސިގްނަލް މޮނިޓާކޮށް، ރޮބޮޓް ބޭނުންކުރާ މީހާ ހަރަކާތްކުރަން ބޭނުންވާ ގޮތް ދެނެގަނެއެވެ.
ރޮބޮޓުގެ ކުރިމަތީގައި ހަރުކޮށްފައިވާ ލެންސްތަކަކީ ލޮލުގެ ގޮތުގައި މަސައްކަތްކުރާ އެއްޗެހިތަކެކެވެ. މި ލެންސްތަކުން ވަށައިގެންވާ މާޙައުލު ދިރާސާކޮށް، ސިޑީގެ އުސްމިން ދެނެގަނެ، ހުރަސްތައް ފާހަގަކުރެއެވެ. މިއީ ފައިގެ ބޭނުން އެއްގޮތަކަށްވެސް ނުކުރެވޭ މީހުންގެ ކިބައިން މަދުވާ ސެންސަރީ ޤާބިލުކަން ފޫބެއްދުމަށް ކުރާ ކަމެއްކަމަށް ޕާކް ބުންޏެވެ.
ކިމް ސޭންގް-ހްވާން ވަނީ "ވޯކްއޮން ސޫޓް އެފް1" ލައިގެން "ސައިބަތްލޮން 2024ގެ އެކްސޯސްކެލެޓަން ކެޓަގަރީން ރަން މެޑަލް ހޯދާފައެވެ. މި މުބާރާތުގައި ތަފާތު ނުކުޅެދުންތެރިކަން ހުންނަ މީހުން ބައިވެރިވެ، އެހީތެރިވެދޭ ރޮބޮޓުތައް އަށް ކެޓަގަރީއަކުން ދައްކާލިއެވެ.
"އަހަރެން ބޭނުންވީ އަހަރެންގެ ދަރިފުޅަށް ބުނަން. އަހަރެންނަށްވެސް ކުރިން ހިނގޭކަން. އަހަރެން ބޭނުންވީ ދަރިފުޅާއެކު ތަފާތު ތަޖުރިބާތައް ހިއްސާކުރަން،" ކިމް ބުންޏެވެ.
ފައިގެ ބޭނުން ނުކުރެވޭ މީހުންނަށް ހިނގުމަށް އެހީތެރިވެދޭ މި ރޮބޮޓަކީ އިންސާނުންގެ ދިރިއުޅުމަށް ފަސޭހަކަމާއެކު އެހީވެދީ، އެމީހުންގެ ދިރިއުޅުމުގެ ފެންވަރު މަތިކޮށްދޭނެ އާލާތެކެވެ.
މި ރޮބޮޓުގެ ސަބަބުން ނުކުޅެދުންތެރިކަން ހުންނަ މީހުންނަށް އިތުރު މިނިވަންކަމާއި އަމިއްލަ ޤާބިލުކަން ލިބި، އެމީހުންގެ ދިރިއުޅުމަށް އިންޤިލާބީ ބަދަލުތަކެއް އަންނާނެ ކަމަށް އުންމީދުކުރެވެއެވެ.