މާލޭ ރަށްވެހިންނަށް ބޯހިޔާވަހިކަން ދިނުމަށް މިދިޔަ ސަރުކާރުން ހިންގި "ބިންވެރިޔާ" ސްކީމުގެ ދަށުން ނުހައްގުން ބަޔަކަށް ގޯތިދިންކަމަށް ތުހުމަތު ކުރާ މައްސަލައިގައި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު ދިރިއުޅުއްވާ ގެ، ރޭގެ ވަގުތެއްގައި ފުލުހުން ބަލައި ފާސްކޮށްފިއެވެ.
މިކަމާ ގުޅިގެން ފުލުހުން ބުނީ، އޭނާގެ ގެ ބަލައި ފާސްކުރީ ކޯޓު އަމުރެއްގެ ދަށުން ކަމަށެވެ.
"ބަލައި ފާސްކޮށް ތަހުގީގަށް ބޭނުންވާ ބައެއް ތަކެތި ވަނީ ފުލުހުންގެ ބެލުމުގެ ދަށަށް ގެނެސްފަ،" ފުލުހުންގެ މެސެޖުގައި ވެއެވެ.
ފުލުހުން ބުނީ ފުލުހުންގެ ބެލުމުގެ ދަށަށް ގެނެވުނު ބައެއް ތަކެތީގެ ތެރޭގައި އިލެކްޓްރޯނިކް ސާމާނު ހިމެނޭ ކަމަށެވެ.
ނުހައްގުން ގޯތި ދިން މައްސަލައިގައި އެންމެ ބޮޑު ތުހުމަތެއް ކުރަނީ އެ ކުންފުނީގެ މެނޭޖިން ޑިރެކްޓަރަކަށް ހުންނެވި އިބްރާހީމް ފަޒުލް ރަޝީދަށެވެ. މި މައްސަލައިގައި ނުހައްގުން ގޯތި ލިބުން މީހުންގެ ތެރޭގައި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދުފަޒީލް ރަޝީދު ހިމެނެއެވެ.
މި މައްސަލައާ ގުޅިގެން އެޗްޑީސީގެ ގިނަ މުއައްޒަފުންތަކެއް ސަސްޕެންޑް ކޮށްފައި ވާއިރު ފަޒުލް ވަނީ މިދިޔަ ހޮނިހިރު ދުވަހު މަގާމުން އިސްތިއުފާ ދެއްވާފައެެވެ. އޭނާ މަގާމުން އިސްތިއުފާ ދެއްވީ ތަހުގީގަށް ފުރުސަތު ދިނުމަށް ކަމަށް ބުނެއެވެ.