މިދިޔަ ނޮވެމްބަރު މަހުގެ ހަތްވަނަ ދުވަހު ހުޅުމާލޭ ދެވަނަ ފިޔަވަހީގެ ހިޔާ ފުލެޓެއްގައި މީހަކު ރަހީނުކުރި މައްސަލައިގައި ހައްޔަރުކުރި 12 މީހުންނަށް ދައުވާ ކުރަން ފޮނުވުމަށް ފަހު އެމީހުން ދޫކޮށްލައިފިއެވެ.
މިކަމާ ގުޅިގެން ފުލުހުން ބުނީ، މި މައްސަލައިގެ ތަހުގީގު ނިންމައި ދައުވާ ކުރުމަށްޓަކައި ޕްރޮސެކިއުޓާ ޖެނެރަލްގެ އޮފީހަށް ފޮނުވާފައި ވަނީ، މިދިޔަ ހޮނިހިރު ދުވަހު ކަމަށެވެ.
އަދި އެ މައްސަލައިގައި ހައްޔަރުގައި ތިބި މީހުން ކޯޓުން ދުކޮށްލާފައި ވާކަމަށް ވެސް ފުލުހުން ބުންޏެވެ.
މި މައްސަލައިގައި ހައްޔަރުކޮށްފައި ވަނީ:
- އަލްމާން އަލީ ޚާލިދު، 22އ، ގދ. ވާދޫ/ ވެހި
- މުޙައްމަދު އިޒްކާން، 18އ، މ. ހަތިކަނޑު
- އިޒާން އަހުމަދު، 18އ، މ. ހަތިކަނޑު
- އަހުމަދު ޒާހިދު، 36އ، ށ. ފޯކައިދޫ/ ދަންމަރު
- އާދަމް ހުސައިން، 48އ، ލ. މާވަށް/ ޖަމީލާ މަންޒިލް
- އިބްރާހީމް ނަޝީދު، 34އ، ލ. އިސްދޫ/ ހިޔާލީގުލްޝަން
- އަހުމަދު ސަމީހު، 22އ، ބ. ގޮއިދޫ/ ނައިޓްސްޓާ
- އިސްމާއީލް ވިޝާމް މުހައްމަދު، 29އ، ވ. ގާމާ
- ވިޝަމް މުހައްމަދު، 23އ، ގދ. ވާދޫ، ޗިޗަންޑާގެ
- ވިސާން މުހައްމަދު، 30އ، ހުޅުމާލެ ހިޔާ 3-17-14
- މުސްތާގު ޝާކިރު، 37އ، ގދ. ވާދޫ، ޖަނަވަރީގެ
- ހަސަން ގާލިބް، 38އ، މ. ކޮޅުފުށި، އާރެސް
މީގެ ކުރިން ފުލުހުން ބޭއްވި ނޫސްވެރިންގެ ބައްދަލުވުމެއްގައި ސުޕްރިންޓެންޑެންޓް އޮފް ޕޮލިސް އަހުމަދު ސާމީ ވިދާޅުވީ އެ މައްސަލައިގެ މައުލޫމާތު ފުލުހުންނަށް ލިބުމާއެކު ފުލުހުން ހަރަކާތްތެރިވެ، އެ ހާދިސާ ހިނގި ނުވަ ވަނަ ޓަވަރުގެ ސީސީޓީވީ ފުޓެޖު ބަލައިގެންނާއެކު އެޕާޓްމެންޓު ހޯދި ކަމަށެވެ.
އެ އެޕާޓްމެންޓަށް ފުލުހުން ވަދެ ބެލިއިރު، ބެލްކަނީ ކައިރީ ބިންމަތީގައި އަނިޔާ ލިބުނު މީހުން އިން ކަމަށާއި އޭނާގެ ބޯ ބާލައިފައި ހުރި ކަމާއި، އިސްތަށިތައް ބިންމަތީގައި ހުރި މަންޒަރު ފެނުނު ކަމަށް ސާމީ ވިދާޅުވިއެވެ.
އެ މައްސަލައިގެ އިތުރު ތަފުސީލު ދެއްވަމުން، ފުލުހުންގެ ސީރިއަސް އެންޑް ހައި އިމްޕެކްޓް ކްރައިމްގައި އިސްކޮށް ހުންނަވާ އަލީ އިސްމާއިލް ވިދާޅުވީ އަނިޔާ ލިބުނު މީހާ އެތަނަށް ގެންދިޔައީ ފައިސާގެ މައްސަލައެއްގައި ބިރުދައްކައިގެން ކަމަށެވެ.
"ފުލުހުންނަށް އެ އެޕާޓްމެންޓަށް އެ ގަޑީގައި އާދެވުނީ އޭނާގެ އިނގިލިތައް ބުރިކުރާނެ ކަމަށް ބުނެ އިންޒާރެއް ދީފައި ވަނިކޮށް ކަމަށް ވިކްޓިމް ބުނެފައިވަނީ،" އޭނާ ވިދާޅުވިއެވެ.
އަލީ އިސްމާއިލް ވިދާޅުވީ އެ އެޕާޓްމެންޓަކީ މަސްތުވާތަކެތި ބޭނުންކޮށް ވިޔަފާރި ކުރާ ތަނެއްކަން ފާހަގަކުރެވި މީގެ ކުރިން ބަލައި ފާސްކޮށްފައި ހުރި ތަނެއް ކަމަށެވެ. އަދި ހުޅުމާލޭ މެޖިސްޓްރޭޓް ކޯޓުގެ އަމުރެއްގެ ދަށުން އެޕާޓްމެންޓް ބަލައި ފާސްކުރިއިރު މަސްތުވާތަކެތި ކަމަށް ލަފާކުރެވޭ ތަކެތި އަޅައިފައިވާ ޕެކެޓުތަކާއި ބިޔަރު ދަޅުތައް ފެނުނު ކަމަށް އޭނާ ވިދާޅުވިއެވެ.
އެ މައްސަލައިގައި ފުލުހުން ވަނީ 12 މީހަކު ހައްޔަރުކޮށް އެ މީހުންގެ ވަނަވަރު ވެސް ހާމަކޮށްފައެވެ.
މި މައްސަލައިގައި އެ ފުލެޓުގެ ވެރިފަރާތް ވެސް ފުލުހުން ހައްޔަރު ކުރިއެވެ.