ކުރީ ސަރުކާރުން ތައާރަފުކުރި "ބިންވެރިޔާ" ސްކީމަކީ ގާނޫނީ ގޮތުން އުފެދުމުގައި ވެސް ބާތިލު ސްކީމެއް ކަމަށް ކުރީގެ ޕީޖީ އަދި ރައީސް އޮފީހުގެ ކްރިމިނަލް ޖަސްޓިސް އެޑްވައިޒަރެއްގެ މަގާމު އަދާކުރެއްވި މުހުތާޒު މުހުސިން މިއަދު ވިދާޅުވެއްޖެއެވެ.
އޭނާ މިފަދައިން ވިދާޅުވީ، ސޯޝަލް މީޑިއާގައި ކުރެއްވި ޕޯސްޓެއްގައެވެ.
މިކަމާ ގުޅިގެން، "ސަން"އަށް މައުލޫމާތު ދެއްވަމުން މުހުތާޒު ވިދާޅުވީ އޭނާ "ބިންވެރިޔާ" ސްކީމަކީ ތަފާތުކުރުންތައް ބޮޑު ސްކީމެއް ކަމަށް އޭނާ ގަބޫލުކުރައްވާ ކަމަށެވެ. އަދި އެއީ ބިމާބެހޭ ގާނޫނު ދަންނަ ގޮތަކަށް އެކުލަވައިލާފައިވާ ސްކީމެއް ވެސް ނޫން ކަމަށް މުހުތާޒު ވިދާޅުވިއެވެ.
ދައުލަތުގެ ކުންފުންޏެއްގެ މިލްކުވެރިކަމުގައި އޮތް ބިންތަކެއް މަދު ރައްޔިތުންތަކަކަށް ބަހައިލުމަކީ ވަރަށް ބޭއިންސާފު ކަމެއް ކަމަށް މުހުތާޒު ވަނީ ސިފަ ކުރައްވާފައެވެ. އޭނާ ވިދާޅުވީ ހުޅުމާލޭގެ މިލްކުވެރިކަން އެޗްޑީސީއަށް އޮންނައިރު، އެ ތަނުގެ ބިންތަކުގައި ހުރިހާ ރައްޔިތުންގެ ހައްގު އެކުލެވޭ ކަމަށެވެ.
"ބިންވެރިޔާ" ސްކީމްގެ ދަށުން ހުޅުމާލޭގެ އިތުރުން، ގުޅީފަޅާއި ގިރާވަރުފަޅުން ވެސް ވަނީ ގޯތި ދޫކޮށްފައެވެ. މިކަން ފާހަގަކުރައްވައި މުހުތާޒު ވިދާޅުވީ، އެ ތަނުން ގޯތި ލިބޭ މަދު ބައެއްގެ ހައްގުގައި، ދައުލަތުގެ ބަޖެޓުން ބޮޑު ޚަރަދުކޮށްގެން ދެ ފަޅު ހިއްކުމަކީ، އެހެން ރައްޔިތުންނަށްވެވޭ ވަރަށް ބޮޑު ބޭއިންސާފެއް ކަމަށެވެ.
"...ހުޅުމާލޭގެ ބިމުގެ ވެލިއު އަޅުގަނޑަށް ހިސާބުތަކުން ދައްކާ ގޮތުން 80 ބިލިއަނަށްވުރެ މަތިވާނެ. މުޅި ޖުމްލަ މި ހަތަރު ހާހެއްހައި މީހުންނަށް ދައުލަތުން ޚަރަދުކުރާވަރު. އެއީ ހަމަހަމަ ކަމެއް ނޫނޭ އަޅުގަނޑު މި ދަންނަވަނީ" މުހުތާޒު ވިދާޅުވިއެވެ.
މާލޭގެ ރައްޔިތުންނަށް ވެސް ބޯހިޔާވަހިކަން ލިބެންޖެހޭކަން ފާހަގަކުރައްވައި މުހުތާޒު ވިދާޅުވީ މައްސަލައަކީ ގޯތި ދިނުމުގައި ގެންގުޅެފައިވާ އުސޫލުތައް ކަމަށެވެ.
މުހުތާޒު ސިފަ ކުރައްވާ ގޮތުގައި ބިންވެރިޔާ ސްކީމަކީ ބޯހިޔާވަހިކަމަށް ބޭނުންޖެހިފައިވާ ރައްޔިތުންނަށް ކޮށްފައިވާ މަލާމާތެކެވެ. އެ ސްކީމްގެ ދަށުން ގޯތިދޭއިރު، އެ ކަމާ ގުޅޭ ޕްލޭންތައް ވެސް އެކަށީގެންވާ ގޮތެއްގައި އެކުލަވައިލަން ޖެހުނީ މި ސަރުކާރަށް ކަމަށް އޭނާ ވިދާޅުވިއެވެ.
"...ލޭންޑް ޔޫސް ޕްލޭނެއް އެއްވެސް އެއްޗެއް ރަނގަޅު ގޮތުގައި ހަދައިފައެއް ނެތް. އިޖުތިމާއީ ބޭނުމަށް ދޫކުރާ ބިންތަކެއް ނެތް. މިސްކިތް، ސްކޫލްތައް އަޅާނެ ބިންތަކެއް ނުބާއްވައި، އެއްކޮށް ރައްޔިތުންތަކެއް ތޮއްޖައްސައިލާ ގޮތަށް ސްކީމް މި އޮތީ. އެހެންވީމާ އަޅުގަނޑު މި ދަންނަވަނީ އެއީ މާލާމާތެކޭ. ރަނގަޅު ޕްލޭނައާ އެކު ކުރީ ސަރުކާރުން އެކަން ކުރިނަމަ، އަޅުގަނޑު ބުނާނަން އެ ރަނގަޅޭ" މުހުތާޒު ވިދާޅުވިއެވެ.
ބިންވެރިޔާ ސްކީމުގެ ދަށުން ގަވާއިދާ ޚިލާފަށް ނުހައްގުން ގޯތިތަކެއް ދިންކަމަށް ތުހުމަތުކުރެވޭ މައްސަލައެއް މިފަހުން ވަނީ ފެންމަތިވެފައެވެ. މި މައްސަލައިގައި އެންމެ ބޮޑު ތުހުމަތެއް ކުރަނީ އެޗްޑީސީގެ މެނޭޖިން ޑިރެކްޓަރަކަށް ހުންނެވި އިބްރާހީމް ފަޒުލް ރަޝީދަށެވެ.
ތަހުގީގަށް ފުރުސަތު ދިނުމަށް ފަޒުލް މިހާރު ވަނީ އިސްތިއުފާ ދެއްވާފައެވެ. މި މައްސަލައިގައި ގިނަ ކަންބޮޑުވުންތަކެއް ހުރިކަން ފާހަގަކުރައްވައި މުހުތާޒު ވިދާޅުވީ، އެ މައްސަލަ ވެސް ބަލަމުން ގެންދާކަމަށެވެ.
މުހުތާޒުގެ ޕޯސްޓަށް ކުރީގެ ޕީޖީ އަހްމަދު މުއިއްޒު ވެސް ވަނީ ރައްދު ދެއްވާފައެވެ. އޭނާ ވިދާޅުވީ، ހުޅުމާލެއިން ގޯތި ދޫކުރުމަކީ ގާނޫނާ ޚިލާފު ޣައިރުޒިންމާދާރު ކަމެއް ކަމަށެވެ.
"ރައްޔިތުންގެ ތާއީދު ގެއްލިދާނެތީ އެއްވެސް ރިޔާސީ ކެންޑިޑޭޓަކަށް އެކަމާ ދެކޮޅު ހަދާކަށް ނުކެރުން. އެ މައްސަލައަކީ ސަރުކާރުންނާއި ރައްޔިތުންގެ މަޖިލީހުން ބަލަންޖެހޭ ބޮޑު މައްސަލައެއް،" މުއިއްޒު ލިޔުއްވާފައި ވެއެވެ.
ކުރީ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ނިންމައިފައިވެއެވެ. އެ ގޯތިތައް ދޫކޮށްފައިވަނީ ހުޅުމާލެއާއި ގުޅީފަޅާއި ގިރާވަރުފަޅުންނެވެ.