ފެނަކައިގެ މެނޭޖިން ޑިރެކްޓަރުކަމުން މިއަދު އިސްތިއުފާ ދެއްވި މުއާޒް މުހައްމަދު ރަޝީދަށް ސޯޝަލް މީޑިއާގައި ކުރާ ކޮރަޕްޝަންގެ ތުހުމަތުތަކަށް އޭނާ ރައްދު ދެއްވައިފިއެވެ.
މުއާޒަށް ކޮރަޕްޝަންގެ ތުހުމަތުކޮށް ޓްވިޓާގައި ވަނީ ވާހަކަތަކެއް ދައުރުކޮށްފައެވެ. އެގޮތުން އޭނާ މިއަދު އިސްތިއުފާދެއްވީ ރައީސް ޑރ. މުހައްމަދު މުއިއްޒުގެ ޒީރޯ ޓޮލެރެންސް ޕޮލިސީގެ ދަށުން ކަމަށް ޓްވިޓާގައި ދައުރުކުރާ ޕޯސްޓުތަކުގައި ވެއެވެ.
މުއާޒް ވަނީ އޭނާގެ ރަސްމީ ޓްވިޓާ އެކައުންޓުގައި ކުރި ޕޯސްޓެއްގައި އެ ތުހުމަތުތައް ދޮގުކުރައްވައިފައެވެ. އަދި އެފަދަ އެއްވެސް ތުހުމަތެއް ކުރަން ވެސް މި ސަރުކާރުން ނޫޅޭ ކަމަށް މުއާޒް ލިޔުއްވާފައި ވެއެވެ.
"ހަގީގަތް އޮޅުވާލަން ނޫޅޭ. ލައްކަ ވާހަކަ އެބަހުރި ދައްކަން ޖެހިއްޖިއްޔާ ދައްކަން،" މުއާޒް ލިޔުއްވާފައި ވެއެވެ.
އޭނާއަށް ކުރާ ކޮރަޕްޝަންގެ ތުހުމަތުތަކުގެ ތެރޭގައި، ގާނޫނާ ޚިލާފު ޕްރޮކިއުމަންޓް އެކުލަވައިލުމާއި، މާލީ ކަންކަން އޮޅުވައިލުމާއި ގާތް މީހުން ވަޒީފާއަށް ނެގުން ފަދަ ކަންކަން ހިމެނޭ ސޯޝަލް މީޑިއާގައި ދައުރުވާ ޕޯސްޓުގައިވެއެވެ.
މުއާޒްގެ އިސްތިއުފާގެ ސިޓީގައި އޭނާ ވަނީ ފެނަކަ ހިންގުމަށް ހުރި ގޮންޖެހުންތަކާއި، އިސްތިއުފާދެއްވާ ސަބަބު ބަޔާންކުރައްވައިފައެވެ.
ކުންފުނިތަކަކީ ލިބޭ އާމްދަނީން ހިންގަންޖެހޭ ތަންތަން ކަމަށްވީ ނަމަވެސް، ފެނަކައިގެ މާލީ ހާލަތު އޮތްގޮތުން އެ ކަން އެހެން ކުރުމަކީ ނުވާނެ ކަމެއްކަމަށް މުއާޒުގެ ސިޓީގައި ވެއެވެ. އެއާއެކު މުއާޒު ވަނީ އެެހެން އެ ކަން ދިމާވާން މެދުވެރިވި ސަބަބުތައް ހިއްސާކުރައްވައިފައެެވެ.
- ކުންފުންޏަށް ބޭނުންވާ އަދަދަށްވުރެ އެތައް ގުނައެއް އިތުރަށް ވަޒީފާ ހަމަޖައްސަން ޖެހުން
- ކުންފުނީގެ މުވައްޒަފުންގެ އަދަދު މަދުކޮށް، ކުންފުންޏަށް ކަތާވަރަށް ހިންގުން ބަދަލުކުރުމަށް އިދާރާތަކުން އެކަށީގެންވާ އެއްބާރުލުމެއް ނުލިބުން
- ލިބޭ އާމްދަނީއަށްވުރެ ކުރަންޖެހޭ ޚަރަދު އިންތިހާއަށް އިތުރުވުން
ކުންފުނީގެ ޚިދުމަތް ފޯރުކޮށްދޭ ގިނަ ރަށްރަށުގެ ކަރަންޓާއި، ފެނާއި، ނަރުދަމާގެ ޚިދުމަތްތައް ފާއިތުވި އަހަރުތަކުގެ ތެރޭގައި އެކަށީގެންވާ ގޮތެއްގައި މެއިންޓެނެންސްކޮށް ނުބެލެހެއްޓުމުގެ ސަބަބުން ކުރިން އޮތް ބެކްލޮގް އެއްކޮށް ރަނގަޅު ކުރެވިފައި ނުވުން. - ކުންފުންޏާ ހަވާލުވީއިރު ދަރަނީގެ ގޮތުގައި 4.3 ބިލިއަން ރުފިޔާ އޮތުން
ހަމައެއާއެކު މި އަހަރުގެ އޮކްޓޯބަރު މަހާއި ނޮވެމްބަރު މަހުގެ މުސާރަ ވެސް، މަސް ފެށުނުއިރު ވެސް ޖަމާކޮށް ނުދެވުނު ކަމަށް ވަނީ ވިދާޅުވެފައެވެ. މީގެ އިތުރުން މާލީ ވުޒާރާގައި ވެސް އެތައް ފަހަރަކު ހައްލަކަށް އެދި ދެންނެވި ކަަމަށް މުއާޒު ވިދާޅުވިއެވެ.
އެއާއެކު މުއާޒު ވިދާޅުވީ، ކުންފުނީގެ ޚަރަދު ބޮޑުވެ، ދެމެހެއްޓެނިވި ގޮތެއްގައި އޮޕަރޭޝަން ފޯރުކޮށް ނުދެވޭނެ ހާލަތަކަށް ކުންފުނި ވެއްޓިފައިވާތީއާއި، އޭނާ ހުރެގެން އިތުރަށް އެ ކަން ރަނގަޅުކުރެވޭނެ މަގެއް ނުފެންނާތީ މަގާމުން އިސްތިއުފާ ދެއްވާކަމަށެވެ.
މުއާޒު މަގާމުން އިސްތިއުފާ ދެއްވުމާ އެކު މިއަދު ވަނީ އެ މަގާމަށް އާ ބޭފުޅަކު އައްޔަން ކުރައްވާފައެވެ. އެއީ މޭޖާ ރިޓަޔާޑް މުހައްމަދު ނަޖާހެވެ.
ފެނާއި ނަރުދަމާއާއި ކަރަންޓުގެ ޚިދުމަތްދޭ، ދައުލަތުގެ ހިއްސާ އޮންނަ ކުންފުނިތަކުގެ ތެރެއިން ފެނަކައަކީ ކޮރަޕްޝަނުގެ ގިނަ ތުހުމަތުތަކެއް މީގެ ކުރިން ވެސް އަމާޒުވެފައިވާ ކުންފުންޏެކެވެ. އެގޮތުން ކޮންޓްރެކްޓު ދިނުމުގައި އާއި މުވައްޒަފުން ނެގުމުގައި ކޮރަޕްޝަން ހިންގާފައިވާ ކަމުގެ ތުހުމަތުކޮށް، އޭސީސީއަށް ވެސް މައްސަލަތަކެއް ހުށަޙަޅައިފައިވެއެވެ.