ވިޒިޓް މޯލްޑިވްސް ކްލަބް (ވީއެމްސީ)އިން, ދިވެހިރާއްޖޭގައި ބާއްވާ އެންމެ ބޮޑު ސްޕޯޓްސް ފިޝިން މުބާރާތް، "ބުރުނު ބޮމަ"ގެ ނަމުގައި ރަސްމީކޮށް އިފުތިތާހުކޮށްފިއެވެ.
"ބުރުނު ބޮމަ" އިފުތިތާހުކޮށްފައި ވަނީ މިދިޔަ ހުކުރު ދުވަހު މާލޭ ޓޭބަލް ޓެނިސް ހޯލުގައި ބޭއްވި ރަސްމިއްޔާތެއްގައެވެ. މި ރަސްމިއްޔާތު ޝަރަފުވެރިކޮށްދެއްވީ ފިޝަރީސް މިނިސްޓަރު އަޙްމަދު ޝިޔާމެވެ.
ވީއެމްސީން އަންނަ އަހަރުގެ އޭޕްރީލް އަދި މެއި މަހު ބޭއްވުމަށް ހަމަޖެހިފައިވާ ބުރުނު ބޮމައަކީ މަސްވެރިކަމަށް ލޯބިކުރާ ބޭރު މީހުންނާއި ރާއްޖޭގެ ޓޫރިޒަމް އިންޑަސްޓްރީއަށް އަމާޒުކޮށްގެން ބާއްވާ މުބާރާތެކެވެ.
ފިޝަރީޒް މިނިސްޓަރު އަޙްމަދު ޝިޔާމް ވިދާޅުވީ މިއީ ރާއްޖޭގައި ކުޅިވަރު ފަތުރުވެރިކަން ކުރިއެރުވުމުގައި މުހިންމު ފިޔަވަޅެއް ކަމަށާއި ދެމެހެއްޓެނިވި މަސްވެރިކަމުގެ އާދަތަކަށް ރާއްޖެއިން ދޭ އަހައްމިއްޔަތުކަން ފާހަގަކޮށްދޭކަމެއް ކަމަށެވެ.
"މާލެ ސަރަހައްދަށް ބެލި ކަމުގައިވިޔަސް ސްޕޯޓްސް ފިޝިންގް ކޮމިއުނިޓީގެ ބައިވެރިވުން ވަރަށް ބޮޑު. އެހެންކަމުން، ބުރުނު ބޮމަ މިއީ ވަރަށް މުހިންމު އަދި ވަރަށް ބޮޑު މުބާރާތެއް. މި މުބާރާތުގެ ލޮކޭޝަންގެ ގޮތުގައި ހަމަޖައްސައިފައި މިއޮތީ ކްރޮސްރޯޑްސް. އެއީ އެތާގައި މެރީނާއެއް އޮތުމާ އެކީ. އެހެންވުމުން، މިގޮތަށް މެރީނާއެއްގައި ބާއްވާ ފުރަތަމަ ޓޯނަމަންޓަށް ބުރުނު ބޮމަ ވެގެންދާނެ. ބުރުނު ބޮމާގެ ސަބަބުން ރާއްޖެއަށް ސްޕޯޓްސް ފިޝިންގްއަށް ޒިޔާރަތްކުރާނެ ކަމަށް ޔަގީން،" ޝިޔާމް ވިދާޅުވިއެވެ.
އެމްއެމްޕީއާރުސީގެ ސީއީއޯ އަދި އެމްޑީ އިބްރާހިމް ޝިއުރީ ވިދާޅުވީ ރާއްޖޭގެ ފަތުރުވެރިކަމުގެ ސިނާއަތް ސިންދަފާތު ކުރުމުގެ ތެރެއިން މިއީ އަދި ފެށުމެއް ކަމަށެވެ.
"ބުރުނު ބޮމަ" އިފްތިތާހުކުރުމުގެ ރަސްމިއްޔާތުގެ ތެރެއިން --- ފޮޓޯ: އެމްއެމްޕީއާރުސީ
"މުބާރާތުގެ މެއިން އިވެންޓްގެ ކުރިން އަޅުގަނޑުމެން އެބަ ބާއްވަން ފޯރިގަދަ އެތައް އިވެންޓްތަކެއް. އިންޓަނޭޝަނަލް ސްޕޯޓްސް ފިޝިންގް ފެސްޓިވެލް އެއް ގޮތުގައި ކުރިއަށް އޮއްތާ މި މުބާރާތް ފެނިގެންދާނީ. އަޅުގަނޑުމެންގެ އަމާޒަކީ، ދިވެހިރާއްޖެއަކީ ސްޕޯޓްސް ފިޝިންއަށް ލޯބިކުރާ ފަރާތްތަކަށް އެންމެ އެދެވޭ މަންޒިލަކަށް ހަދައި، ބައިނަލްއަގުވާމީ ފަތުރުވެރިކަމުގެ ކަލަންޑަރުގައި ފާހަގަކޮށްލެވޭ ހަރަކާތެއްގެ ގޮތުގައި ހެދުން," ޝިއުރީ ވިދާޅުވިއެވެ.
ވިޒިޓް މޯލްޑިވްސް ކްލަބުގެ ރައީސް އަޙްމަދު ސާއިފް ވިދާޅުވީ މި މުބާރާތަކީ ކޮންމެ އަހަރަކު ވެސް ބާއްވަން ރާވާފައިވާ މުބާރާތެއް ކަމަށާއި، މިއީ ފަތުރުވެރިކަމުގެ ސިނާއަތުގެ މުހިންމު އިވެންޓެއްގެ ގޮތުގައި ކުރިއަށް ގެންދާނެ މުބާރާތެއް ކަމަށެވެ.
މި މުބާރާތުގައި ބޮޑަށް އަހައްމިއްޔަތުކަން ދެނީ "ކެޗް އެންޑް ރިލީޒް" އުސޫލަށެވެ. އެއީ މަސް ބާނާފައި ދޫކުރުމެވެ.