ޑަބްލިން (23 ޑިސެންބަރު 2024): ޔޫރަޕްގެ ގައުމެއް ކަމަށްވާ އަޔަލޭންޑްގެ ވެރިރަށް ޑަބްލިންގައި ހުންނަ އިސްރާއީލުގެ އެންބަސީ ބަންދުކޮށް އެތަނުގައިވާ އިސްރާއީލުގެ ދިދަ ތިރިކުރުމުން އަޔަލޭންޑްގެ އެތައް ބަޔަކު އެކަމާ އުފާފާޅުކޮށް އިސްރާއީލުގެ އަނިޔާވެރިކަމާ ދެކޮޅަށް އަޑުއުފުލައި ފަލަސްތީނުގެ ދިދައާއި ފަލަސްތީނުގެ މިނިވަންކަމަށް ތާއީދުކުރުމުގެ ޝިއާރުތައް އުފުލައިފިއެވެ.
ޑަބްލިންގައި ހުންނަ އިސްރާއީލުގެ އެންބަސީ ބަންދުކުރީ އިސްރާއީލު އަމިއްލައަށެވެ. އެއީ އަޔަލޭންޑްގެ ސަރުކާރުން ފަލަސްތީނުގެ ހައްގުތަކަށާއި މިނިވަންކަމަށް ތާއީދުކޮށް އަޑުއުފުލާތީ އާއި އިސްރާއީލުން ފަލަސްތީނުގެ އާންމުންނާ ދެކޮޅަށް ޣައްޒާގައި ހިންގާ ގަތުލުއާންމުތަކާއި ނަސްލު ނައްތައިލުމުގެ ލާއިންސާނީ ޖަރީމާތައް ކުށްވެރިކޮށް އިސްރާއީލުގެ އަނިޔާވެރިކަމަށް ފާޑުކިޔާތީއެވެ.
ޑަބްލިންގައި ހުންނަ އިސްރާއީލުގެ އެމްބަސީ ބަންދުކޮށް އެ ތަނުގައިވާ އިސްރާއީލުގެ ދިދަ ތިރިކުރުމުން އެކަމާ އުފާފާޅުކުރި އަޔަލޭންޑްގެ ރައްޔިތުން ބުނީ އިސްރާއީލު ފަދަ އަނިޔާވެރި ޖައްބާރު އަދި ކުޑަކުދިން މަރާ އަދި ފަލަސްތީނު ރައްޔިތުން މިނިވަން ކަމަށް ކުރާ މަސައްކަތްތައް އަނިޔާވެރިކަމާއެކު ހުއްޓުވުމަށް ޖަރީމާތައް ހިންގާ އިސްރާއީލުގެ އެމްބަސީ އެއް ހުރުމަކީ އަޔަލޭންޑަށް ކުރިމަތިވާ ހުތުރެއްކަމުގައެވެ.
އަޔަލޭންޑްގެ ސަރުކާރުން ދައުލަތެއްގެ ގޮތުގައި ފަލަސްތީނަށް އިއުތިރާފުވުމަށްފަހު ބައިނަލްއަގްވާމީ މަހްފަލްތަކުގައި ގެންދަނީ އިސްރާއީލުގެ އަނިޔާވެރިކަމާ ދެކޮޅަށް އަޑުއުފުލައި ފަލަސްތީނުގެ މިނިވަންކަމަށް ވަކާލާތު ކުރަމުންނެވެ.
އަޔަލޭންޑްގެ ބޮޑުވަޒީރު ސައިމޮން ހަރިސް --
ޑަބްލިންގައި ހުންނަ އިސްރާއީލުގެ އެމްބަސީ ބަންދުކުރަން އިސްރާއީލުގެ ސަރުކާރުން ނިންމީ މި މަހުގެ ކުރީކޮޅުގައެވެ. ނަމަވެސް އެ ތަނުގައިވާ އިސްރާއީލުގެ ދިދަ ބާލައި ރަސްމީގޮތެއްގައި އެތަން ބަންދުކޮށްފައިވަނީ އިއްޔެ ގައެވެ. އަޔަލޭންޑްގެ ސަރުކާރުންވަނީ ޑަބްލިންގައި ފަލަސްތީނުގެ އެމްބަސީ އެއް ހުޅުވުމުގެ ފުރުސަތު ވެސް ތަނަވަސްކޮށްދީފައެވެ. މިއީ ވެސް އިސްރާއީލު އިންތިހާއަށް ރުޅި ގަދަވެގެން ދިޔަކަމެކެވެ.
މި ކަމާ ދެކޮޅަށް އަޔަލޭންޑްގެ ސަރުކާރަށް ފިއްތުންތައް ކުރިމަތިކޮށް އަޔަލޭންޑްގެ އަގު ވައްޓާލުމަށް ޓަކައި އިސްރާއީލާއި އިސްރާއީލަށް ވާގިވެރިވާ ޔޫރަޕްގެ ޔަހޫދީ ޒަޔަނިސްޓް ޖަމިއްޔާ ޖަމާއަތްތަކުންވަނީ ވަރުގަދަ ކޭންޕޭނެއް ފަށައިފައެވެ.
މި ކޭންޕޭން އަމާޒުކޮށްފައިވަނީ އަޔަލޭންޑަކީ ޔަހޫދީންނާ ޖައްސާލައިގެން އުޅޭ އަދި ޔަހޫދީންނަށް ނަފްރަތުކުރާ (އެންޓި ސެމިޓިޒަމް) ގައުމެއްކަމަށް ސިފަކޮށް އަސްލު މައްސަލަ ކަމަށްވާ އިސްރާއީލުގެ އިސްތިއުމާރާއި އިސްރާއީލުގެ ޖަނަވާރުކަމާއި އަނިޔާވެރި ކަމުގެ ހަގީގަތް ފޮރުވުމުގެ މައްޗަށެވެ.
މިއީ އިސްރާއީލުގެ އަނިޔާވެރިކަމާ ދެކޮޅަށް އަޑުއުފުލާ ކޮންމެ ގައުމަކާ ދެކޮޅަށް އިސްރާއީލާއި އިސްރާއީލަށް ވާގިވެރިވާ ހުޅަނގުގެ ޔަހޫދީ ޒަޔަނިސްޓް ޖަމާއަތްތަކުން ގެންގުޅޭ ނުރައްކާތެރި އުކުޅެކެވެ.
އިސްރާއީލުގެ އަނިޔާވެރިކަމާއި އިސްތިއުމާރަށް ވާގިވެރިވާ އެމެރިކާއާއި އިނގިރޭސިވިލާތް އަދި ޖަރުމަނު ފަދަ ޒަޔަނިސްޓުންގެ ނުފޫޒު ގަދަ ހުޅަނގުގެ ބޮޑެތި ގައުމުތަކަކީ ވެސް އިސްރާއީލުގެ އަނިޔާވެރިކަން ހިމާޔަތް ކުރުމަށްޓަކައި މި ހަރުކަށި ސިޔާސަތު ގެންގުޅޭ ގައުމުތަކެކެވެ.
އިސްރާއީލުން ފަލަސްތީނާ ދެކޮޅަށް ހިންގާ މީހުން މެރުމާއި ގަތުލުއާންމުތަކަށް ފާޑުކިޔާ ގައުމެއް ނުވަތަ ފަރުދެއް ނަމަވެސް އެމެރިކާއާއި އިނގިރޭސިވިލާތް އަދި ޖަރުމަނު ފަދަ ޒަޔަނިސްޓުންގެ ނުފޫޒު ގަދަ ހުޅަނގުގެ ބޮޑެތި ގައުމުތަކުން އެ ފަރާތެއް ސިފަކުރާނީ އެއީ ޔަހޫދީންނަށް ނަފްރަތުކުރާ (އެންޓި ސެމިޓިޒަމް) ގައުމެއް ނުވަތަ ފަރާތެއް ގެ ގޮތުގައެވެ. މިއާއެކު އެ ގައުމަކާ ނުވަތަ އެފަރާތަކާ ދެކޮޅަށް ދަތިކުރުމުގެ ފިޔަވަޅުތައް އަޅައި އިސްރާއީލާ އިދިކޮޅު އަޑުތައް ކަނޑުވާލަން މަސައްކަތްކުރެއެވެ.
އަޔަލެންޑްގެ ބޮޑުވަޒީރު ސައިމޮން ހަރިސް ވަނީ އިސްރާއީލާއި އިސްރާއީލުގެ އަނިޔާވެރިކަން ދިފާއުކުރާ ޒަޔަނިސްޓް ލޮބީ ގްރޫޕްތަކުން ކިތަންމެ ވަރަކަށް މަސައްކަތްކުރި ނަމަވެސް ފަލަސްތީނުގެ ހައްގުތަކަށް ގޮވާލާ އަޔަލޭންޑުގެ އަޑު ކަނޑުވާނުލެވޭނެ ކަމަށް ވިދާޅުވެފައެވެ.
ޔޫރަޕްގެ ގައުމުތަކުގެ ތެރެއިން އަޔަލޭންޑްގެ އިތުރުން ބެލްޖިޔަމް، ސްޕެއިން، ސްލޮވީނިއާ، އަދި ނޯވޭ ވެސްވަނީ ފަލަސްތީނަކީ ދައުލަތެއްކަމަށް ރަސްމީކޮށް އިއުތިރާފްވެފައެވެ.