ކ. ގުރައިދޫގައި ނިޔާވި ތުއްތު ކުއްޖާގެ އޮޓޮޕްސީ ހެދުމަށްފަހު މާލެ ގެނެސް, މިއަދު ވަޅުލައިފިއެވެ.
އުމުރުން އެންމެ ހަތަރު މަހުގެ އެ ކުއްޖާ ވަޅުލައިފައި ވަނީ މިއަދުގެ އަސްރު ނަމާދަށްފަހު ހުޅުމާލޭ ސަހަރާގައެވެ.
އެ ކުއްޖާ ނިޔާވީ މިމަހުގެ 13 ވީ ހުކުރު ދުވަހުގެ ދަންވަރުގެ ވަގުތެއްގައެވެ. އޮޓޮޕްސީ ހެދުމަށް ތުއްތު ކުއްޖާގެ ހަށިގަނޑު ރާއްޖެއިން ބޭރަށް ފޮނުވީ އޭގެ ފަސް ދުވަސްފަހުންއެވެ.
ގުރައިދޫގައި ނިޔާވި އެ ކުއްޖާގެ ހަށިގަނޑު އޮޓޮޕްސީ ހެދުމަށްޓަކައި ފޮނުވަން ނިންމީ މަރުގައި ޝައްކުކުުރެވޭ ކަންތައްތަކެއް ހުރުމުން ކަމަށް ފުލުހުން ބުނެފައިވެއެވެ.
ގުރައިދޫ ކައުންސިލް މެމްބަރު އިބްރާހިމް ޝަލީޒް މީގެ ކުރިން "ސަން"އަށް ވިދާޅުވީ އެ ކުއްޖާ ޚަބަރު ހުސްވެފައި އޮތުމުން ސިއްހީ މަރުކަޒަށް ގެންދިޔައީ 13 ވަނަ ދުވަހުގެ ދަންވަރު 12:30 ހާއިރު ކަމަށާއި، ސިއްހީ މަރުކަޒަށް ގެންދިޔައިރު ވެސް ކުއްޖާ އޮތީ ނިޔާވެފައި ކަމަށް ޑޮކްޓަރު ވިދާޅުވެފައި ވާކަމަށެވެ.
މީގެ އިތުރުން ކުއްޖާގެ ނޭފަތުން ލޭ އައިސްފައި ހުރި ނަމަވެސް ބޭރުފުށުން އެއްވެސް އަނިޔާއެއް އެ ކުއްޖާއަށް ލިބިފައިވާ ތަން ފެންނަން ނެތްކަން އޭނާ ވަނީ ވިދާޅުވެފައެވެ.
ފުލުހުން ވަނީ އެ މައްސަލަ ތަހުގީގުކުރަމުން އަންނަ ކަމަށް ބުނެފައެވެ.