މި ހަފުތާ ބަންދުގައި ރާއްޖޭގެ ހުރިހާ ހިސާބަކަށް ވެސް މޫސުން ގޯސްވާނެ ކަމަށް ލަފާކުރެވޭތީ، ހުރިހާ ފަރާތްތަކުން ސަމާލުވުމަށް މޫސުމާބެހޭ ގައުމީ އިދާރާ، މެޓުން އިލްތިމާސްކޮށްފިއެވެ.
މިއަދު މިއީ ދެވަނަ ޓާމުގެ މިޑް ޓާމް ބްރޭކަށް ސްކޫލްތައް ބަންދުވީ ދުވަހެވެ. ސްކޫލު ބަންދު ދުވަސްވަރަކީ ކަނޑުމަގުންނާ ވައިގެ މަގުން ވެސް ރާއްޖޭގެ އެކި ސަރަހައްދުތަކުން ގިނަ ދަތުރުތަކެއް ކުރާ ދުވަސްވަރެކެވެ. އަދި ކުރިއަށް އޮތް ހަފުތާ ބަންދުގައި ގިނަ ބަޔަކު ދަތުރުކުރާނެ ކަމަށް ބެލެވެއެވެ.
އެހެން ނަމަވެސް މޫސުން ގޯސްވެ، މި ވަގުތު ވެސް މެޓުންވަނީ ރާއްޖޭގެ ބޮޑު ބަޔަކަށް ހުދު ސަމާލު ނެރެފައެވެ. ސަމާލު ނެރެފައި އޮތީ ގަޑިއަކު 19އާ 24 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި އަދި ކަނޑުތައް ވެސް ގަދަވާނެ ކަމަށް ލަފާކޮށް ބ. އަތޮޅުން ފެށިގެން އައްޑޫ ސިޓީއަށެވެ.
މެޓުން ބުނީ، އެކިހިސާބަށް ވިއްސާރަ ކުރުމާއެކު ގުގުރައި، އަދި ބައެއް ރަށްތަކަށް ގަދަ ވަޔާއެކު ބޯކޮށް ވާރޭވެހުން އެކަށީގެންވާ ކަމަށެވެ. ހުޅަނގުދެކުނާއި ހުޅަނގުން ގަޑިއަކު 17އާ 27 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކޮށްފައިވާއިރު، ގަޑިއަކު 50 މޭލަށް ވައިގަދަވެދާނެ ކަމަށް މެޓުން ބުނެއެވެ.
ކަނޑުތައް ވިލާގަނޑުގައި ވަރަށް ގަދަވުން އެކަށީގެންވާ ކަމަށް ބުނެފައިވާއިރު، ރާޅުގެ އުސްމިން ހުންނާނެ ކަމަށް އަންދާޒާކޮށްފައި ވަނީ ހަތް ފޫޓާ ނުވަ ފޫޓާ ދެމެދުގައެވެ. މެޓުން ބުނި ގޮތުގައި ދިޔަވަރު ބޮޑުވާ ގަޑިތަކުގައި މެދުރާއްޖެތެރޭގެ އަތޮޅުތަކަށް އުދައިގެ އަސަރު ކުރުން ވެސް އެކަށީގެންވެއެވެ.
އެހެން ކަމުން ދަތުރުކުރާއިރު ހުރިހާ ފަރާތްތަކުން ވެސް މޫސުމަށް ސަމާލުވުމަށް އެ އިދާރާއިން އެދެއެވެ.