ބޮލީވުޑް އެކްޓަރު އަޖޭ ދޭވްގަންގެ މުހިއްމު ރޯލް ކުޅެފައިވާ ރޮމޭންޓިކް ކޮމެޑީ ފިލްމު "ދޭ ދޭ ޕިޔާރު ދޭ"ގެ ދެވަނަ ބައި އަންނަ އަހަރުގެ ނޮވެމްބަރު މަހު ސިނަމާތަކަށް ގެންނަން ނިންމާފައިވާކަމަށް ރިޕޯޓުތައް ބުނެފިއެވެ.
އަންނަ އަހަރުގެ ނޮވެމްބަރު މަހުގެ 14 ވަނަ ދުވަހު ފިލްމު ސިނަމާތަކަށް ގެންނަން ނިންމާފައިވާއިރު މިއީ ވަރަށް ގިނަ ބަޔަކު އިންތިޒާރު ކުރަމުން އަންނަ ފިލްމެކެވެ. އަޖޭގެ އިތުރުން ބަތަލާ ރަކުލް ޕްރީތް ސިންގް އަދި ތައްބޫ މުހިއްމު ރޯލް ކުޅެފައިވާ މި ފިލްމުގެ ފުރަތަމަ ބަޔަށް ވެސް ބެލުންތެރިންގެ ބޮޑު މަގުބޫލުކަމެއް ވަނީ ލިބިފައެވެ.
މިއީ ކާމިޔާބު ފިލްމުތައް ކަމަށްވާ "ޕިޔާރު ކާ ޕަންޗްނާމާ"، "ސޯނޫ ކޭ ޓިއްޓޫ ކީ ސްވީޓީ" އަދި މިދިޔަ އަހަރު ރިލީޒްވި ފިލްމު "ތޫ ޖޫތީ މޭ މައްކާރު"ގެ ޑައިރެކްޓަރު ލަވް ރަންޖަންގެ ކުންފުނި ލަވް ފިލްމްސް އާއި ބޫޝަން ކުމާރުގެ ޓީ ސީރީސް ގުޅިގެން ގެނެސްދޭ ފިލްމެކެވެ.
އަޖޭ ބަތަލާ ތައްބޫއާ އެކު ފިލްމު "ދޭ ދޭ ޕިޔާރު ދޭ"ގެ މަންޒަރެއްގައި--ފޮޓޯ/ޕިންކްވިލާ
މި ފިލްމުގެ ޑައިރެކްޓަރަކީ އަލަށް ފިލްމު ޑައިރެކްޝަނަށް ތައާރަފްވާ އަންޝުލް ޝަރުމާއެވެ. ލަވް ރަންޖަން ސްކްރިޕްޓް ލިޔެ ތައްޔާރުކޮށްފައިވާ ފިލްމު "ދޭ ދޭ ޕިޔާރު ދޭ 2"ގެ ވަރަށް މުހިއްމު ރޯލަކުން ކުޅަދާނަ އެކްޓަރު އާރު މާދަވަން (މެޑީ) ފެންނާނެ ކަމަށް ވެސް ބައެއް ރިޕޯޓުތައް ބުނެއެވެ.
ނަމަވެސް އެކަން ރަސްމީކޮށް އެއްވެސް ފަރާތަކުން މިހާތަނަށް ކަށަވަރުކޮށްދީފައެއް ނުވެއެވެ. މި ފިލްމަކީ އަންނަ އަހަރު ރިލީޒްކުރާނެކަން މިހާތަނަށް އިއުލާނުކޮށްފައިވާ ފިލްމުތަކުގެ ތެރޭގައި ހިމެނޭ އެންމެ އުއްމީދީ އެއް ފިލްމެވެ.