ރާއްޖޭގެ ސްކޫލްތަކާއި މަދަރުސާތަކުގެ ދަރިވަރުން ބައިވެރިވާ މަތީސާނަވީ އިމްތިޙާނުތަކުން އެއްވަނަ ދަރަޖައިގައި ފާސްވެ، ހައި އެޗީވާސް ސްކޮލަޝިޕް ލިބޭ ދަރިވަރުން ކިޔަވަން ފަށާ ޕްރޮގްރާމް ވަކި ހިސާބަކުން ބަދަލު ކުރެވޭނެ ގޮތަށް އުސޫލު ބަދަލުކޮށް އިއްޔެ ގެޒެޓުކޮށްފިއެވެ.
މީގެ ކުރިން 2019ވަނަ އަހަރު ގެޒެޓް ކޮށްފައިވާ އުސޫލުގައި ވާގޮތުން ސްކޮލަޝިޕަށް ހޮވޭ ދަރިވަރުންނަށް އެ ދަރިވަރުން ކިޔަވާ ޕްރޮގްރާމް ބަދަލުކުރެވޭނީ ޕްރޮގްރާމަށް ފައިސާ ދެއްކުމުގެ ކުރިންނެވެ. ޕްރޮގްރާމަށް ފައިސާ ދެއްކުމަށްފަހު ބަދަލުކުރެވޭނެ އުސުލެއް ނޯވެއެވެ.
ނަމަވެސް ވޭތުވެދިޔަ ދުވަސްތަކުގައި މަތީތައުލީމު ހާސިލްކުރި ދަރިވަރުންގެ ތެރެއިން ގިނަ ދަރިވަރުންތަކެއް ވަނީ އެދަރިވަރުންނަށް ދިމާވާ އެކިއެކި ހާލަތުގެ ސަބަބުން، ކިޔަވާ ޕްރޮގްރާމް ބަދަލު ކުރުމަށް އެދިފައެވެ.
އިއްޔެ ގެޒެޓް ކޮށްފައިވާ އުސޫލުގައި ވަނީ ސްކޮލަޝިޕަށް ކިޔަވާ ދަރިވަރުންނަށް ޕްރޮގްރާމް ބަދަލުކުރެވޭނެ ތިން ހާލަތެއް ކަނޑަ އަޅާފައެވެ.
އެގޮތުން:
- ޕްރޮގްރާމް ބަދަލުކުރަން ހުށަހަޅާއިރު، ކުރިން ހުށަހެޅި ޕްލޭސްމަންޓް ލިބުނުކަމުގެ ލިސްޓުގައި ބަޔާންކޮއްފައިވާ، މަތީ ތަޢުލީމުދޭ މުއައްސަސާއަށް އެއްވެސް ޕޭމަންޓެއް ހަދާފައިނެތުން.
- ޕްރޮގުރާމު ބަދަލުކުރަން އެދޭއިރ،ު ކުރިން ހުށަހެޅި ޕްލޭސްމަންޓް ލިބުނުކަމުގެ ލިޔުމުގައި ބަޔާންކޮށްފައިވާ، މަތީ ތައުލީމު ދޭ މުއައްސަސާއަށް ޕޭމަންޓެއް ހަދައިފައިވަނިކޮށް ޕްރޮގްރާމު ބަދަލުކުރަން އެދޭ ނަމ،ަ ފުރިހަމަވާން ޖެހޭކަންކަން:
- ބަދަލުކުރަން ހުށަހެޅީ، ކިޔަވަންފެށި ޕްރޮގްރާމްގެ ފުރުތަމް ސެމިސްޓާ ނިމުމުގެ ކުރިން ކަމުގައިވުން.
- ދޫކޮއްލާ ޕްރޮގްރާމް ފުރިހަމަކުރުމަށް ދަރިވަރުގެ ޚަރަދުގައި ފުރިހަމަކޮއްފައިވާ ޕްރޮގްރާމްތަކަކީ، ބަދަލުވާ ޕްރޮގްރާމްގެ ޖުމްލަ ޚަރަދުން އުނިކުރެވޭނެ އެއްޗެއްކަމުގައި އެއްބަސްވުން
- ޕްރޮގްރާމް ބަދަލުކުރަންޖެހޭ ސަބަބު، އެކަންކުރުން މުޙިއްމުކަމަށް ބާރުދޭ، ކަމާބެހޭ ރަސްމީ ފަރާތްތަކާއެކު ހުށަހަޅާފައި އޮތުން
- ޕްރޮގްރާމް ބަދަލުވީ ނަމަވެސް، އެ ސްކޮލަޝިޕްގެ އުޞޫލުގެ އެއްވެސް މާއްދާއަކާއި ތަޢާރުޒުވުމެއްނެތުން
- ޕްރޮގްރާމް ބަދަލުކުރާ ފުރުތަމަ ފަހަރު ކަމުގައިވުން (އެއް ފަހަރަށްވުރެ ގިނަފަހަރު ބަދަލު ނުކުރެވޭނެ)
- ދޫކޮއްލާ ޕްރޮގްރާމް ފުރިހަމަކުރުމަށް ހިނގާ ޚަރަދަށްވުރެ، ޖުމްލަ ޚަރަދު ބޮޑު ނުވާ ޕްރޮގްރާމަކަށް ބަދަލުވާން އެދުން
3. ބަދަލުވާން އެދޭ ޕްރޮގްރާމަކީ، ފުރުތަމަ ޑިގްރީއަކާ ނުލައި، ސީދާ އެންޓްރީ ލިބޭ ހަތަރު އަހަރަށް ވުރެ ދިގު ނޫން މާސްޓާސް ޑިގްރީ ޕްރޮގްރާމެއް ކަމުގައިވާނަމަ މި ޙާލަތުގައި ފުރިހަމަވާން ޖެހޭކަންކަން:
- ސްކޮލަޝިޕްގެ ޖުމްލަ މުއްދަތުކަމުގައި ބަލަނީ ހަތަރު އަހަރު ދުވަސްކަމަށާއި، ބަދަލުވުމުން ސްކޮލަޝިޕުން ދެން ޚަރަދުކުރާނީ ބަދަލުވި އިރު އެ މުއްދަތުން ބާކީ އޮންނަ ދުވަސްތަށް ކަމަށް އެއްބަސްވުން
- ބަދަލުކުރަން އެދެނީ މި އުޞޫލަށް ޢަމަލުކުރަން ފެށިއިރު، ކިޔަވަމުންދާ ދަރިވަރެއްކަމުގައިވުން
- ޕްރޮގްރާމް ބަދަލުވީ ނަމަވެސް، އެ ސްކޮލަރޝިޕްގެ އުސޫލުގެ އެހެން
- އެއްވެސް މާއްދާއަކާއި ތައާރުޒުވުމެއްނެތުން.
މީގެ ކުރިން އާންމުކޮން މާސްޓާސްއަށް ދެވެނީ ބެޗްލާސް ސެޓިފިކެޓެއް އޮވެގެނެވެ. އެހެންނަމަވެސް މި އުސޫލުގެ ހަތްވަނަ މާއްދާގައި ބަޔާންކޮށްފައިވާ ގޮތުން ބެޗްލާސް ޑިގްރީއެއް ނެތިވެސް މާސްޓާސްއަށް ދިއުމުގެ ފުރުސަތު ފަހިވާނެއެވެ.