އަންނަ އަހަރުގެ އޮސްކާ އެވޯޑަށް އިންޑިއާއިން ރަސްމީކޮށް ނޮމިނޭޓް ކުރި ފިލްމު "ލާޕަތާ ލޭޑީސް" ޝޯޓު ލިސްޓު ނުވެ އޮސްކާގައި ވާދަކުރުމަށް ލިބުނު ފުރުސަތު ގެއްލިއްޖެއެވެ.
އޮސްކާ އެވޯޑުގައި އަންނަ އަހަރު ވާދަކުރާނެ 15 ފިލްމެއް އެކަޑެމީ އޮފް މޯޝަން ޕިކްޗާސް، އާޓްސް އެންޑް ސައިންސްއިން އިން މިދިޔަ އަންގާރަ ދުވަހު އިއުލާނުކުރި އިރު ފިލްމު "ލާޕަތާ ލޭޑީސް" އެ ލިސްޓުގައި ނުހިމެނެއެވެ. އިންޑިއާގެ ފިލްމެއް ޝޯޓު ލިސްޓު ނުވިތާ ނޮމިނޭޓް ވެސް ނުވުމުން ވަރަށް ގިނަ ބަޔަކު ވަނީ އިންޑިއާގެ ފިލްމު ފެޑަރޭޝަންއަށް ނިސްބަތްވާ ގޮތަށް ނުރުހުން ފާޅުކޮށްފައެވެ.
ފިލްމު ފެޑަރޭޝަނަށް ލިބުނު ފުރުސަތުގެ ބޭނުން ރަނގަޅު ގޮތުގައި ނުހިފި ކަމަށާއި އިންޑިއާގެ ސިނަމާ ރަނގަޅަށް ދަންނަ ބަޔަކު ފިލްމު ފެޑަރޭޝަންގެ މަގާމުތަކަށް އަލުން ގެންނަން ގިނަ ބަޔަކު އަންނަނީ ސޯޝަލް މީޑިއާގައި ގޮވާލަމުންނެވެ. އޮސްކާއަށް އިންޑިއާއިން ހުށަހަޅާނެ ފިލްމު ހޮވުމުގެ އެންމެ މުހިއްމު ދައުރެއް އަދާކުރާ ފިލްމު ފެޑަރޭޝަން އޮފް އިންޑިއާ އަކީ އެ މަސައްކަތް ކުރުމަށް އެކަޑަމީއިން ހަވާލުކޮށްފައިވާ މިނިވަން މުއައްސަސާއެކެވެ.
ފިލްމު "ލާޕަތާ ލޭޑީސް"ގެ ކާސްޓުން ޑައިރެކްޓަރު ކިރަން ރާއޯއާ އެކު--ފޮޓޯ/ޕިންކްވިލާ
ފިލްމު "ލާޕަތާ ލޭޑީސް"އަށް އޮސްކާ އެވޯޑު ލިބުމުގެ ފުރުސަތު ގެއްލުމާ ގުޅިގެން ފިލްމުގެ ޕްރޮޑިއުސަރު އާމިރު ޚާންގެ ފަރާތުން ނެރުނު ބަޔާނެއްގައި ބުނެފައި ވަނީ އޮސްކާ އެވޯޑު ކާމިޔާބުކުރުމަށް ލިބުނު ފުރުސަތު ގެއްލުމުން މާޔޫސްވި ކަމަށެވެ.
އެހެންނަމަވެސް ފިލްމު ފެޑަރޭޝަންގެ ޖޫރީ މެމްބަރުން "ލާޕަތާ ލެޑީސް"ގެ ޓީމަށް ކުރި އިތުބާރަށް ޝުކުރުވެރިވާ ކަމަށާއި އޮސްކާ އެވޯޑު ލިބުމުގެ ގާބިލުކަން ފިލްމަށް ލިބިގެންވާ ކަމަށް އެ ފަރާތްތަކުން ގަބޫލުކުރި ގަބޫލުކުރުމަކީ ވެސް ލިބުނު ވަރަށް ބޮޑު ޝަރަފެއް ކަމަށް އާމިރު ޚާން ޕްރޮޑަކްޝަންސް އާއި ޖިއޯ ސްޓޫޑިއޯސް ގުޅިގެން ނެރުނު ބަޔާނުގައި ވަނީ ބުނެފައެވެ.
އާމިރު ޚާންގެ ކުރީގެ އަންހެނުން ކިރަން ރާއޯ ޑައިރެކްޓް ކުރި ފިލްމު "ލާޕަތާ ލޭޑީސް"އަކީ ވަރަށް ސާދާ ވާހަކައެއްގެ މައްޗަށް ބިނާކޮށް އުފެއްދި ފިލްމެކެވެ. މި ފިލްމުގެ ވާހަކަ ބިނާކޮށްފައި ވަނީ އިންޑިއާގެ ރަށްފުށުގައި އުޅޭ އާއިލާއެއްގެ ފިރިހެނަކު އަލަށް ކައިވެނިކޮށް އަނބިމީހާ އޭނާގެ އަވަށަށް ގެންދާ ދަތުރުގައި އަނބިމީހާ ގެއްލި އޭނާ ހޯދުމަށް ކުރާ މަސައްކަތްތައް ދައްކުވައިދޭ ހާދިސާތަކުގެ މައްޗަށެވެ.