އާމިރު ޚާންގެ ފިލްމު ކުންފުނި އާމިރު ޚާން ޕްރޮޑަކްޝަންސް އާއި ޖިއޯ ސްޓޫޑިއޯސް ގުޅިގެން މިދިޔަ އަހަރު ގެނެސްދިން ފިލްމު "ލާޕަތާ ލޭޑީސް" ޖަޕާނުގައި ބާއްވާ އެ ޤައުމުގެ އެކަޑަމީ ފިލްމު ޕްރައިޒްއަށް ޝޯޓުލިސްޓު ކުރެވިއްޖެއެވެ.
މި ފިލްމުގެ ޖަޕާންގެ މި އަހަރުގެ އެކަޑަމީ އެވޯޑަށް ޝޯޓުލިސްޓުކޮށްފައި މި ވަނީ އެ ޤައުމުގެ ތިއޭޓަރުތަކުގައި ފިލްމު ދައްކަމުން އަންނަތާ 17 ހަފުތާވީ ފަހުންނެވެ.
ޖަޕާން އެކަޑަމީ ފިލްމު ޕްރައިޒް 2024އަށް "ލާޕަތާ ލޭޑީސް" ޝޯޓްލިސްޓު ކޮށްފައި ވަނީ އެންމެ މޮޅު އިންޓަނޭޝަނަލް ފިލްމުގެ ކެޓަގަރީއިންނެވެ. މި އެވޯޑު ހަފްލާ ބޭއްވުމަށް ހަމަޖެހިފައި ވަނީ މި އަހަރުގެ މާޗް މަހުގެ 14 ވަނަ ދުވަހުއެވެ.
އިންޑިއާއިން މި އަހަރުގެ އޮސްކާ އެވޯޑްސްއަށް އެންމެ މޮޅު ބޭރު ފީޗާ ފިލްމު ކެޓަގަރީއިން ހުށަހެޅި "ލާޕަތާ ލޭޑީސް" ޖަޕާން އެކަޑަމީ ފިލްމު ޕްރައިޒްއަށް ހޮވިފައި މި ވަނީ މިދިޔަ އަހަރު އެ ޤައުމުގައި ރިލީޒް ކުރި 204 އިންޓަނޭޝަނަލް ފިލްމުތަކުގެ ތެރެއިން ހޮވި ފަސް ފިލްމާ އެކުއެވެ.
ފިލްމު "ލާޕަތާ ލޭޑީސް"ގެ ކާސްޓުން ޑައިރެކްޓަރު ކިރަން ރާއޯއާ އެކު--ފޮޓޯ/މިޑްޑޭ
ބައިނަލްއަޤްވާމީ ދުނިޔޭގެ ޕްލެޓްފޯމްތަކުން ފިލްމު "ލާޕަތާ ލޭޑީސް"އަށް ލިބެމުން އަންނަ ސަމާލުކަމާ އެކު މި ފިލްމުގެ ޑައިރެކްޓަރު ކިރަން ރާއޯއަށް ވަރަށް ގިނަ ބަޔަކު ވަނީ ތައުރީފުކޮށްފައެވެ.
ކިރަން ރާއޯ ފަދައިން އިންޑިއާގެ ސިނަމާގައި މަސައްކަތް ކުރާ އެހެން ފިލްމު ޑައިރެކްޓަރުންގެ ވިޝަންއަކަށް ވެސް ވާންވާނީ ބައިނަލް އަޤްވާމީ ޕްލެޓްފޯމްތަކުގައި އިންޑިއާގެ އުފެއްދުންތަކަށް ޖާގަ ހޯދޭނެ ފަދަ ގޮތަކަށް ކަމަށް ގިނަ ބަޔަކު ވަނީ ބުނެފައެވެ.
ބެލުންތެރިންގެ ބޮޑު ތަރުހީބެއް ލިބުނު ފިލްމު "ލާޕަތާ ލޭޑީސް" އަކީ ރަށްފުށުގައި ކުރެވޭ ކައިވެންޏަކަށް ފަހު، އަލަތު އަނބިމީހާ ގޮވައިގެން ފިރިމީހާ އާއިލާގެ ގާތަށް ދާ ދިޔުމުގައި އަނބިމީހާ އޮޅި އެހެން މީހެއްގެ އަންބެއް ގޮވައިގެން ދަތުރުކުރަން ޖެހުމުން ދިމާވާ ހެއްވާ މަޖާ ހާދިސާތަކެއް ފެންނާނެ ފިލްމެކެވެ.
މި ފިލްމުގެ މައިގަނޑު ރޯލުތައް ކުޅުނީ ނިތާންޝީ ގޮއެލް އާއި ސްޕާޝް ޝްރިވަސްތާވްގެ އިތުރުން ޕްރަތިބާ ރަތުނާ އެވެ.