ފަންސާސް ފަސް ކައުންސިލެއްގެ އިމާރާތްތައް އަލުން އިމާރާތްކުރުމުގެ މަޝްރޫއު މިހާރު އޮތީ އެގްރިމެންޓާ ހަމައިގައި ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން މިނިސްޓަރު ވިދާޅުވީ ރަަށްރަށުން ރިކުއެސްޓު އައުމުން 187 ރަށެއްގައި ކައުންސިލްގެ އިދާރާތައް އަޅަން ޖެހިފައިވާ ކަމަށެވެ. އެހެންކަމުން ކުރިން އޮތީ ކައުންސިލްތަކަށް ވަރަށް ބޮޑަށް އަޅާނުލެވިކަން މިނިސްޓަރު ވަނީ ފާހަގަކުރައްވާފައެވެ.
މިނިސްޓަރު ވިދާޅުވީ ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ނިންމެވީ އެމަނިކުފާނުގެ ޒާމަތުގައި 55 ކައުންސިލް އިމާރާތް އުމްރާނީ ގޮތުން ތަރައްގީ ކުރުމަށް ކަމަށެވެ.
އަދި އެއާއެކު ޕީއެސްއައިޕީގެ ދަށުން ކޮންޓްރެކްޓް ފައިނޭންސްގެ އުސޫލުން 55 ކައުންސިލެއްގެ އިމާރާތް ނިންމެވުމަށް މިހާރު މަސައްކަތް ކުރިއަށް ގެންދާކަން މިނިސްޓަރު ވަނީ ފާހަގަކުރައްވާފައެވެ.
މިނިސްޓަރު ވިދާޅުވީ މިހާރު 55 ކައުންސިލް އިމާރާތް ކުރުމުގެ މަޝްރޫއު އިކޮނޮމިކް ކައުންސިލުން ފާސްކޮށްފައިވާ ކަމަށެވެ.
އަޅުގަނޑު މިރޭ ވެސް ހަމަ ވަރަށް އުފަލާއެކު ދަންނަވާލާނަން ބޭނުން މިހާރު 55 ކައުންސިލް އިމާރާތްކުރުމުގެ މަޝްރޫއު އިކޮނޮމިކް ކައުންސިލުން ވެސް މިވަނީ އެއްކޮށް ފާސް ކޮށްދެއްވާފައި މީގެ ދެ ދުވަސް ކުރީން. މިހާރު މި އޮތީ އެޓާނީ ޖެނެރަލްގެ އޮފީހަށް އެގްރިމެންޓް ފޮނުވިފައި. އަޅުގަނޑުމެންނަށް އިރާދަކުރެއްވިއްޔާ މާދަމާ އެޓާނީ ޖެނަރަލްގެ އޮފީހުން ލިބޭނެ ކަމަށް މި އުންމީދު ކުރަނީ. މިނިސްޓަރު އާދަމް ޝަރީފް އުމަރު
މިނިސްޓަރު ވިދާޅުވީ މެލޭޝިއާ ކުންފުންޏަކާ މަސައްކަތް ހަވާލުކުރާއިރު އެ ކުންފުނީގެ ފަރާތުން ރާއްޖެ ވަޑައިގެންހާ އަވަހަކަށް އެ މަޝްރޫގެ އެއްބަސްވުމުގައި ސޮއި ކުރެވޭނެ ކަމަށެވެ.
އަދި އެ ހިސާބުން ފެށިގެން ކައުންސިލް އިމާރާތްތައް މަރާމާތުކުރުމުގެ މަސައްކަތް ފެށިގެންދާނެ ކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު ވަނީ ވޭތުވެދިޔަ އަހަރުތަކުގައި ކައުންސިލްތަކުގެ އުމްރާނީ ހާލަތު ހުރީ ވަރަށް ދައްކޮށް ކަމަށާއި އެތަންތަން ހުރީ އެތަންތަން ފެނުމުން ''އަސަރު ކުރާ ވަރުގައި'' ކަމަށް ވިދާޅުވެފައެވެ.
އަދި ބައެއް ކައުންސިލްތަކުގެ އިމާރާތްތައް ހުރީ ''ބޮލަށް ވެއްޓޭ'' ހާލުގައިކަމަށް ވެސް މިނިސްޓަރު ވަނީ ފާހަގަކުރައްވައިފައެވެ.