ކައުންސިލްތަކުގައި ފުލްޓައިމްކޮށް ޚިދުމަތްކުރާން ކައުންސިލުގެ ރައީސާއި، ނައިބު ރައީސް އެކަނި ތިބޭ ގޮތަށް ކަނޑައަޅައި، ބާކީ ކައުންސިލަރުންނަކީ ޕާޓްޓައިމް މެންބަރުންނަށް ހެދުމަކީ އެ މަނިކުފާނު ހުށަހަޅުއްވާ ޚިޔާލުކަމުގައި ވިދާޅުވެ، އެ ކަމުގައި އާންމުންގެ ޚިޔާލު ވެސް ފާޅުކުރެއްވުމަށް ރައީސުލް ޖުމްހޫރިއްޔާ ޑރ. މުޙައްމަދު މުއިއްޒު މިރޭ އެދިވަޑައިގެންފިއެވެ.
އެ މަނިކުފާނު މިހެން ވިދާޅުވީ ރައްޔިތުންނާ ބައްދަލުކުރެއްވުމަށް ރައީސް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން މިރޭ ގދ. ފިޔޯރީއަށް ވަޑައިގެން ވާހަކަފުޅުދައްކަވަމުންނެވެ.
މީގެ ކުރިން ވެސް ރައީސްވަނީ ދައުލަތުގެ ޚަރަދުކުޑަކުރަން ކައުންސިލްތައް އެކުލެވިގެންވާ އޮނިގަނޑަށް ބަދަލު ގެންނަން ޚިޔާލުފުޅު ފާޅުކުރައްވައިފައެވެ. އެއިރު ރައީސްގެ ވިސްނުންފުޅަކީ ކައުންސިލަރުންގެ އަދަދު މަދުކުރުމެވެ.
އެއާއެކު އިދިކޮޅުގެ އެމްޑީޕީގެ ފާޑުކިޔުމާއި، ކަންބޮޑުވުން ވަރަށް ބޮޑަށް އަމާޒުވިއެވެ. އަދި ބައެއް ކައުންސިލަރުންނާއި، ކައުންސިލްތަކުން ވެސް ކަންބޮޑުވުން ފާޅުކުރިއިރު އާންމުންގެ ތެރެއިން ވެސް ނުރުހުން އަމާޒުވިއެވެ.
އޭގެ ދުވަސްތަތަކަށްފަހު މިރޭ ވާހަކަދައްކަވަމުން ރައީސް ވިދާޅުވީ އެއިރު ލިބިވަޑައިގެންނެވި އެއް ކަންބޮޑުވުމަކީ ކައުންސިލަރުންގެ އަދަދު މަދުކޮށްފިނަމަ ޑިމޮކްރެޓިކް ރިޕްރެޒެންޓޭޝަނަށް އަސަރު ކޮށްފާނެކަމުގެ ކަންބޮޑުވުން ކަމަށެވެ.
ރައީސް ޑރ. މުޙައްމަދު މުއިއްޒު ގދ. ފިޔޯރީގައި ވާހަކަފުޅުދައްކަވަނީ -- ފޮޓޯ: ރައީސް އޮފީސް
ރައީސް ވިދާޅުވީ މި މަސައްކަތުގެ ތެރެއިން ބޭނުންފުޅުވަނީ ޚަރަދު ކުޑަކުރަން ކަމަށެވެ. އެގޮތުން ބަލާއިރު ކޮންމެ ރަށެއްގައި އެ ރަށުގެ އާބާދީއަށް ޚިދުމަތް ކުރަން ބޭނުންވާ އަދަދަށްވުރެ ގިނައިން، ފުލްޓައިމްކޮށް ގިނަ ކައުންސިލަރުން ތިބުމަކީ ޚަރަދު ބޮޑު ނިޒާމެއް ކަމަށް ރައީސް ވިދާޅުވިއެވެ.
އެހެންކަމުން އެ ކަންކަމަށް އަލިއަޅުވައިލައި، މި ނިޒާމު އިސްލާހު ކުރެވިދާނެ ގޮތެއްގެ ގޮތުގައި ފެނިވަޑައިގަންނަވަނީ ކައުންސިލަރުންގެ އަދަދު މަދުނުކޮށް، ފުލްޓައިމްކޮށް ކައުންސިލްގެ ރައީސާއި ނައިބު ރައީސް މަސައްކަތްކުރާ ގޮތަށް ކަނޑައެޅުން ކަމަށް އެ މަނިކުފާނު ވިދާޅުވިއެވެ.
"އިންތިޚާބުގައި ފުލްޓައިމް މަގާމަކަށް އިންތިޚާބުކުރާނީ ކައުންސިލްގެ ރައީސްގެ މަގާމަށާއި، ކައުންސިލްގެ ނައިބު ރައީސްގެ މަގާމަށް ނަގައި ދެ މީހުން ކަމަށް ކަނޑައަޅައި، ދެން ހަމަ މިހާރު ވެސް ތިބޭ އަދަދަށް ކައުންސިލަރުން އިންތިޚާބު ކުރާނީ، ނަމަވެސް އެއީ ކޮންމެ ޖަލްސާއަކަށް ވަކި އެލަވެންސެއް ލިބޭ ގޮތަށް، ސިޓިންއަށް އެލަވެންސް ދޭ ގޮތަށް،" ރައީސް ވިދާޅުވިއެވެ.
ރައީސް ވިދާޅުވީ އެއީ ތަރައްގީވެފައިވާ ގައުމުތަކުގައި އެ ކަން އޮންނަ ގޮތް ކަމަށާއި އެ ބަދަލު ގެނައުމުން ޑިމޮކްރެޓިކް ރިޕްރެޒެންޓޭޝަނަށް ވެސް ބަދަލެއް ނާންނާނެ ކަމަށެވެ.
"މިހާރު ތިބި އަދަދަށް ކައުންސިލަރުން ތިބޭނެ. އެހެން ނަމަވެސް އޮފީހުގަ ފުލްޓައިމްކޮށް ގާއިމްވެ، އޮފީސް ހިންގަން ތިބޭނީ ރައީސާއި ނައިބު ރައީސް،" ރައީސް ވިދާޅުވިއެވެ.
މީގެ އިތުރުން ރައީސް ވިދާޅުވީ ކައުންސިލްގެ ރައީސްކަމުގެ މަގާމަށް ކުރިމަތިލާ މީހާއާއި އެކުގައި އިތުރު މީހަކު ރަނިންމޭޓްކަމަށް ކުރިމަތިލާ ގޮތަށް ވެސް އެ ކަން ކުރެވިދާނެ ކަމަށެވެ. އަދި މިގޮތަށް އަންހެނުންގެ ތަރައްގީއަށް މަސައްކަތްކުރާ ކޮމެޓީ (ޑަބްލިއުޑީސީ) ވެސް ބަދަލު ކުރެވިދާނެ ކަމަށް ރައީސް ވަނީ ވިދާޅުވެފައެވެ.
ރައީސް ވިދާޅުވީ މިހެން ކަންކޮށްފިނަމަ ހިންގުމުގެ ޚަރަދު ވަރަށް ބޮޑުތަނުން ކުޑަވާނެކަމަށެވެ. ނަމަވެސް ޑިމޮކްރެޓިކް ރިޕްރެޒެންޓޭޝަން ނުވަތަ ކައުންސިލަރުން ހޮވަންވާ އަދަދަށް ބަދަލެއް ނާންނަކަމަަށް ތަކުރާރުކޮށް ފާހަގަކުރެއްވިއެވެ.
ރައީސް ވަނީ އެކަން އެގޮތަށް ކުރަން ރައްޔިތުންނަށް ފެންނަނަަމަ ރައްޔިތުންގެ ތެރޭ އެކަމާ މެދު ބަހުސްކުރަން އެދިލައްވާ ކަމަށް ވިދާޅުވެފައެވެ.