ކައުންސިލްތަކަށް ފަޅުރަށް ލިބޭ ގޮތަށް ރައީސް ޑރ. މުހައްމަދު މުއިއްޒު އިއުލާނުކުރެއްވި ސިޔާސަތުގެ ދަށުން ޕްރޮޕޯސަލް ހުށަހެޅި ތިން ކައުންސިލަކަށް އެ ރަށްތައް ހަވާލުކުރަން ސަރުކާރުން މިއަދު ނިންމައިފިއެވެ.
އެކަން ހާމަކުރައްވައި، ލޯކަލް ގަވަނަންސް މިނިސްޓަރު އާދަމް ޝަރީފް އުމަރު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، އެ ކައުންސިލްތަކަށް ފަޅުރަށްތައް ހަވާލުކުރުމުގެ މަސައްކަތް ފިނޭންސް އެންޑް ޕްލޭނިން މިނިސްޓްރީއާއި ލޯކަލް ގަވަނަންސް މިނިސްޓްރީއާ ގުޅިގެން ކުރިއަށް ގެންދާނެ ކަމަށެވެ.
ޕްރޮޕޯސަލް ހުށަހެޅި ކައުންސިލްތަކާއި ފަޅުރަށްތަކުގެ ނަންތައް:
- ދ. އަތޮޅު ކައުންސިލުން ހުށަހެޅީ އެ އަތޮޅު މިނިމަސްގަލި އަދި ފެންފުށި ހޯދުމަށް
- ލ. މާވަށު ކައުންސިލުން އެދުނީ އެ އަތޮޅު ބޮޑުމާބުޅަލި ހޯދުމަށް
- ރ. އިނގުރައިދޫ ކައުންސިލުން ހުށަހެޅީ ރ. ނެޔޮ ހޯދުމަށް
މީގެއިތުރުން، އަންނަ ހަފުތާގައި ރައީސް އޮފީހަށް ރިޕޯޓު ހުށަހަޅާނެ ކަން މިނިސްޓަރު ވަނީ ފާހަގަކުރައްވާފައެވެ،
ފާހަގަކޮށްލެވޭ ގޮތުގައި، މިދިޔަ އަހަރުގެ ޖެނުއަރީ 24ގައި ވަނީ ކައުންސިލްތަކުގެ އިހްތިޞާސުގައި ނެތް ފަޅު ރަށްތައް ވެސް ލިބޭ ގޮތަށް މަސްވެރިކަމާއި ދަނޑުވެރިކަމާއި އިގްތިޞާދީ ބޭނުންތަކަށް ފިޔަވައި އެހެން ބޭނުންތަކަށް ފަޅުރަށްރަށް ދޫކުރުމާ ބެހޭ ގަވައިދެއް ގެޒެޓުކޮށްފައެވެ.
މި ގަވައިދުގައިވާ ގޮތުން އިދާރީ ދާއިރާއެއްގައި ހިމެނޭ ފަޅު ރަށްރަށުގެ ތެރެއިން ރަށެއްގެ ނުވަތަ ސިޓީއެއްގެ އިހްތިޞާސްގައި ނުހިމެނޭ ފަޅުރަށެއް ނުވަތަ ފަޅުރަށުން ބައެއް ހޯދުމަށް އެދި ކައުންސިލްތަކުން ހުށަހަޅާއިރު، އެ ރަށެއްގައި ކުރަން ބޭނުންވާ ކަމެއްގެ ތަފްސީލީ ރިޕޯޓެއް ހުށަހަޅަން ޖެހެއެވެ.
އެ ރިޕޯޓުގައި އެ ތަނެއްގައި ކުރާ މަސައްކަތަކާ ސަރުކާރުގެ ތަރައްގީގެ ޕްލޭނާ ގުޅުންހުރި މިންވަރު ވެސް ބަޔާންކުރަން ޖެހެއެވެ. އަދި، އިހްތިޞާސްގައި ނެތް ފަޅު ރަށެއް ކައުންސިލަކަށް ދޫކުރާނީ 10 އަހަރަށެވެ.
ބީލަމުގެ އުސޫލުން، އެންމެ ރަނގަޅު ހުށަހެޅުމެއް ހުށަހަޅާ ފަރާތަކަށް ނުވަތަ، ރަށުގައި ކުރަން ބޭނުންވާ ކަމަކާބެހޭ ތަފުސީލު ރިޕޯޓަކާއެކު އާންމު ފަރާތަކުން ފަޅުރަށެއް ހޯދަން އެދި، ހޮވިއްޖެނަމަ އެ ރަށެއް ދޫކުރަނީ 21 އަހަރަށެވެ.