ރަޝިއާއިން ކެންސަރު ބަލީގެ ވެކްސިނެއް އުފައްދައިފައިވާ ކަމަށް އެގައުމުގެ ހެލްތު މިނިސްޓްރީއާ ހަވާލާދީ، އެގައުމުގެ ނޫސްތަކުން ރިޕޯޓުކޮށްފިއެވެ.
ރަޝިއާގެ ސަރުކާރުގެ ނޫސް އެޖެންސީ ޓާސްގެ ރިޕޯޓެއްގައި ބުނެފައިވާ ގޮތުގައި، މި ވެކްސިން ތައްޔާރުކުރެވިފައިވާ ކަމުގެ ޚަބަރު ދީފައިވަނީ ރަޝިއާގެ ސިއްޙީ ވުޒާރާގެ ދަށުން ހިންގާ ރޭޑިއޮލޮޖީ މެޑިކަލް ރިސާޗް ސެންޓަރުގެ ޑިރެކްޓަރު ޖެނެރަލް އެންޑްރޭ ކަޕްރިންއެވެ. އޭނާ މި މައުލޫމާތު ދީފައިވަނީ ރަޝިއާގެ ރޭޑިއޯއަކަށެވެ.
މި ވެކްސިނަކީ ކެންސަރު ބަލި ޖެހިފައިވާ މީހުންނަށް ދިނުމަށް ތައްޔާރުކޮށްފައިވާ އެއްޗެއް ކަމަށާއި، މިއީ ކެންސަރު ޖެހުނަ ނުދިނުމަށް ދޭ އެއްޗެއް ނޫން ކަމަށް ވެސް ބުނެފައިވެއެވެ. އަދި މި ވެކްސިނަކީ ކޮންމެ ބަލިމީހަކަށް ވެސް އެ މީހެއްގެ ހާލަތަށް ޚާއްޞަކޮށްގެން ތައްޔާރުކުރާނެ ވެކްސިނެއް ކަމަށް އެ ނޫހުގައިވެއެވެ.
މީގެ ކުރިން، މޮސްކޯގައި ހުންނަ ގަމަލޭޔާ ނެޝަނަލް ރިސާޗް ސެންޓަ ފޯ އެޕިޑެމިއޮލޮޖީ އެންޑް މައިކްރޯބައޮލޮޖީގެ ޑިރެކްޓަރު އަލެކްސެންޑާ ގިންޓްސްބާގް ވަނީ މި ވެކްސިނުން ހަށިގަނޑުގައި ކެންސަރު ފެތުރުން ހުއްޓުވޭނެ ކަމަށް ބުނެފައެވެ.
ނަމަވެސް، މި ވެކްސިނުން ފަރުވާ ދެވޭނީ ކޮން ބާވަތެއްގެ ކެންސަރުތަކަކަށް ކަމާއި އޭގެ ނަތީޖާއާ ގުޅޭ ގޮތުން މިހާތަނަށް މައުލޫމާތު ހިއްސާކޮށްފައިނުވެއެވެ.
ކެންސަރު ބައްޔަށް ވެކްސިނެއް ތައްޔާރުކުރުމަށް މަސައްކަތް ކުރަމުން އަންނަ ކަމަށް މީގެ ކުރިން އެހެން ގައުމުތަކުން ވެސް ބުނެފައިވެއެވެ.
މިސާލެއްގެ ގޮތުން، މިދިޔަ އަހަރު ޔޫކޭ ސަރުކާރުން ވަނީ ކޮންމެ މީހަކަށް ޚާއްޞަކޮށްގެން ކެންސަރުގެ ފަރުވާ ތައްޔާރުކުރުމަށް ޖަރުމަނުގެ ބަޔޯއެންޓެކް ކުންފުންޏަކާއެކު އެއްބަސްވުމެއްގައި ސޮއިކޮށްފައެވެ. މީގެ އިތުރުން، މޮޑާނާ އަދި މާކް އެންޑް ކޯ ފަދަ ބޮޑެތި ބޭސް ކުންފުނިތަކުން ވެސް ހަމުގެ ކެންސަރަށް ވެކްސިނެއް ތައްޔާރުކުރުމުގެ މަސައްކަތް ކުރަމުންދެއެވެ.
މިހާރު ވެސް ބާޒާރުގައި ވިއްކަމުންދާ ބައެއް ވެކްސިންތަކުން ކެންސަރު ޖެހުނަ ނުދިނުމަށް އެހީތެރިވެދެއެވެ. މިގޮތުން، އެޗްޕީވީ (ހިއުމަން ޕެޕިލޯމާ ވައިރަސް)އަށް ދެވޭ ވެކްސިނުން އަންހެނުންގެ ރަހިމުގެ ކެންސަރު ޖެހުނަ ނުދިނުމަށް އެހީތެރިވެދެއެވެ.
އެމެރިކާގައި، ފްލޮރިޑާ ޔުނިވާސިޓީގެ ނިއުރޯ ސައިންޓިސްޓުން ވެސް ވަނީ ސިކުނޑީގެ ކެންސަރަށް އެމްއާރްއެންއޭ ވެކްސިނެއް ތަޖުރިބާކުރަމުން ގެންދާ ކަމަށް ބުނެފައެވެ.
މި އަހަރުގެ މޭ މަހު ސެލް ޖާނަލްގައި ޝާއިޢުކުރި ރިޕޯޓެއްގައި ބުނެފައިވާ ގޮތުން، މި ފަރުވާ ކެންސަރު ޖެހިފައިވާ ހަތަރު މީހަކު ބައިވެރިކޮށްގެން ތަޖުރިބާކޮށްފައިވެއެވެ. މީގެ ކުރިން މި ފަރުވާ ވަނީ ކެންސަރު ޖެހިގެން މަރުވާން ކައިރިވެފައި އޮތް ކުއްތާތަކަކަށް ވެސް ތަޖުރިބާކޮށްފައެވެ.
މި ފަރުވާ ދެނީ، ކެންސަރު ޖެހިފައިވާ މީހާގެ ހަށިގަނޑުން ނަގާ ކެންސަރުގެ ސެލްތަކުން އާރްއެންއޭ (ޖެނެޓިކް މެޓީރިއަލް) ނަގައިގެންނެވެ.
އެ ފަރުވާގެ ދިރާސާތަކުން ދައްކާ ގޮތުގައި، އެ ފަރުވާ ދިނުމުން ދެ ދުވަހަށްވުރެ ކުރު މުއްދަތެއްގެ ތެރޭގައި، ބަލިމީހާގެ އިމިއުން ސިސްޓަމުން ކެންސަރުގެ ސެލްތަކަށް ރެސްޕޮންޑްކޮށް، އެ ސެލްތަކާ ދެކޮޅަށް ހަނގުރާމަ ކުރަން ފަށައެވެ.
މި ދިރާސާގައި ބައިވެރިވި ހުރިހާ ބަލިމީހުން ވެސް، އުންމީދުކުރި ވަރަށްވުރެ ގިނަ ދުވަހު ދިރިތިބި ކަމަށް ދިރާސާގައިވެއެވެ.
މި ދިރާސާ ކުރި ސައިންޓިސްޓުން ނިންމީ މި ފަރުވާއަކީ މުސްތަގުބަލުގައި އިމިއުނޮތެރަޕީގެ ގޮތުގައި ބޭނުންކުރެވިދާނެ އޮޕްޝަނެއް ކަމަށެވެ.