ރާއްޖެއަށް މިހާރު ކުރަމުންދާ ވިއްސާރައިގައި މޫސުން ގޯސްވެދާނެކަމަށް ލަފާކޮށް، މޯލްޑިވްސް މީޓިއޮރޮލޮޖިކަލް ސާވިސަސް (މެޓް އޮފީސް) އިން ޔެލޯ އެލާޓު ނެރެފިއެވެ.
މެޓް އޮފީހުން ޔެލޯ އެލާޓު ނެރުނީ ށ. އަތޮޅުން ފެށިގެން އދ. އަތޮޅާ ހަމަޔަށެވެ. އެއީ މިއަދު ހެނދުނު 7:15 އިން ފެށިގެން 11:15 އާ ހަމަޔަށެވެ.
މީގެ އިތުރުން އެ ގަޑިތަކުގައި ބޯކޮށް ވާރޭވެހި، ގުގުރާނެ ކަމަށްވެސް މެޓް އޮފީހުން ވަނީ ލަފާކޮށްފައިއެވެ.
މެޓުން ބުނީ މިއީ ރާއްޖެއަށް ހުޅަނގު މޫސުން ނިމި, އިރުވައި މޫސުން ފެށޭ ދުވަސްވަރު ކަމަށްވާއިރު މި ދުވަސްވަރު އާއްމުކޮށް ކޮޅިގަނޑުތައް އުފެދޭ ކަމަށެވެ. އެގޮތުން ބަންގާޅު ކަނޑުގައި ގޮޅިގަނޑެއް އުފެދި ކުރިއަށް އޮތް ދެ ދުވަހުގެ ތެރޭގައި ދެކުނު އިންޑިއާގެ ޓަމިލްނާޑޫއާ ދިމާލު އައްސޭރި ފަށަށް މިސްރާބު ޖަހާނެ ކަމަށް މެޓުން ބުނެއެވެ. އަދި މި ހަފުތާގެ ތެރޭގައި ރާއްޖޭގެ ދުރުން ދެކުނުގައި ވެސް ކޮޅިގަނޑެއް އުފެދޭނެ ކަމަށް މެޓުން ލަފާ ކުރެއެވެ.
މެޓުން ލަފާކުރާގޮތުގައި މާދަމާއިން ފެށިގެން ކުރިޔަށް އޮތް ފަސް ދުވަހު ވެސް ރާއްޖޭގެ ހުރިހާ ހިސާބުތަކަކަށް އާންމު ގޮތެއްގައި ވައި ބާރުވާނެއެވެ.
ކުރިޔަށް އޮތީ ސުކޫލް ބަންދުކަމުން ދަތުރުފަތުރު ކުރާ މީހުން ކަނޑުގަދަވާ ދުވަސްވަރު، ކަނޑު ދަތުރުކުރުމުގެ ކުރިން މެޓު އޮފީހުން ނެރޭ އެލާޓުތަކަށް ސަމާލުވުމަށް އެ އިދާރާއިން ވަނީ އިލްތިމާސް ކޮއްފައެވެ.