މިހިނގާ 2026ވަނަ އަހަރަށް ކަނޑައަޅާފައިވާ ބަޖެޓުން ރައްޔިތުންނާ ގުޅުންހުރި ޚިދުމަތްތައް ދިނުމަށް ހުރަސްއެޅޭނެ ކަމަށާއި، މި ބަޖެޓަކީ ކުރިއަށް އޮތް ތިންމަހަށް ބެލިކަމުގައިވިޔަސް އެކަށީގެންވާ ވަރަށް ވުރެ ކުޑަ ބަޖެޓެއް ކަމަށް، ހއ. އަތޮޅު ކައުންސިލުން ބުނެފިއެވެ.
ދައުލަތުގެ ބަޖެޓުގައި ކޮންމެ އަހަރަކު ކައުންސިލުތަކަށް ކަނޑައަޅައިފައި އޮންނަ ބްލޮކް ގްރާންޓް، ނުވަތަ ކައުންސިލްތަކަށް ދޭ މާލީ އެހީގެ ދަށުން ހއ. އަތޮޅު ކައުންސިލަށް މިއަހަރު ދޫކުރީ 2.65 މިލިއަން ރުފިޔާއެވެ.
އެ ކައުންސިލުން މިއަދު ނެރުނު ބަޔާނެއްގައި ވަނީ، މިހިނގާ އަހަރަށް ކަނޑައެޅި ބަޖެޓަކީ ކުރިއަށް އޮތް ތިން މަހަށް ބެލިޔަސް، ކައުންސިލް މުވައްޒަަފުންގެ މުސާރައާއި އޮފީސް ހިންގުމަށް ކޮންމެހެން ކުރަންޖެހޭ ޚަރަދުތައް ކުރުމަށް އެކަށީގެންވާ ވަރުގެ ބަޖެޓެއް ނޫން ކަމަށެވެ.
ވުމާއެކު، އިދާރީ ގޮތުން ކައުންސިލް ހިންގަން ދަތިވެ، ރައްޔިތުންނަށް މިއަހަރު ދޭން ޖެހޭ ޚިދުމަތްތައް ދިނުމަށް ދަތިވާނެ ކަމަށް، ހއ. އަތޮޅުގެ ކައުންސިލުން ބުންޏެވެ.
ކައުންސިލުން މިއަހަރަށް ފާސްކުރި ބަޖެޓުގައި ރައްޔިތުންނާ ގުޅުންހުރި، އަދި މާލީގޮތުން ފައިދާވާނެ ކަންކަމަށް ޚަރަދުކުރަން ހިމަނާފައިވާނެ ކަމަށްވެސް ކައުންސިލުން ބުންޏެވެ. ނަމަވެސް އެއިން އެއްވެސް ހަރަކާތެއްގެ ތަފުސީލެއް ކައުންސިލުގެ ބަޔާނުގައި ނެތެވެ.
އެހެންވެ، އެ ހަރަކާތްތައް ކުރިއަށް ގެންދިއުމަށްޓަކައި ކައުންސިލުގެ ބަޖެޓަށް ދިމާވެފައިވާ ދަތިތައް ހައްލުކޮށްދިނުމަށް އެދި، ލޯކަލް ގަވަމަންޓް އޮތޯރިޓީ (އެލްޖީއޭ)ގެ ލަފާގެ މަތިން ފިނޭންސް މިނިސްޓްރީއަށް މިދިޔަ ބުދަ ދުވަހު ސިޓީއެއް ފޮނުވި ނަމަވެސް، އެ ހަރަކާތްތައް ކުރިއަށް ނުގެންދަން މިނިސްޓްރީން އެންގި ކަމަށްވެސް ކައުންސިލުން ބުންޏެވެ.
އެހެންކަމުން، ލާމަރުކަޒީ ނިޒާމުގެ ރޫހާ އެއްގޮތަށް ކައުންސިލުން ފޯރުކޮށްދޭންޖެހޭ ޚިދުމަތްތައް މެދުނުކެނޑި ކުރިއަށް ގެންދިއުމަށްޓަކައި ކައުންސިލްގެ ހަރަކާތްތައް ހިންގޭނެ ގޮތަށް، ބަޖެޓަށް ދިމާވެފައިވާ ދަތިތައް ހައްލުކޮށްދޭން ގޮވާލާ ކަމަށް، އެ ބަޔާނުގައިވެއެވެ.
ފާހަގަކުރެވޭ ގޮތުގައި އަތޮޅު ކައުންސިލްތައް އުވާލަން ސަރުކާރުން ގާނޫނުއަސާސީއަށާއި ގާނޫނާއި ގަވައިދުތަކަށް އިސްލާހު ގެނެސް ތަސްދީގުކުރީ މިދިޔަ ޑިސެންބަރު މަހުގެ ފުރަތަމަ ދުވަހެވެ. އަދި ކައުންސިލަރުންގެ އަދަދު މަދުކުރަންވެސް ވަނީ ގާނޫނު އިސްލާހުކޮށްފައެވެ.