އަމިއްލަ ބޭނުމަށް އއ. މާޅޮހު ކައުންސިލްގެ ގިނަ އަދަދެއްގެ ފައިސާ ބޭނުންކޮށްފައިވާތީ އެ މައްސަލައިގައި ފިޔަވަޅު އެޅުމަށް އޮޑިޓާ ޖެނެރަލް، ހުސައިން ނިޔާޒީ އަންގަވައިފިއެވެ.
މާޅޮހު ކައުންސިލްގެ އޮޑިޓު ރިޕޯޓު އާންމުކޮށްފައިވަނީ މިދިޔަ އާދިއްތައިގައެވެ.
އޮޑިޓު ރިޕޯޓުގައިވާ ގޮތުން މާޅޮހު ކައުންސިލްގެ ބޭންކް އެކައުންޓުތަކުންނާއި ތިޖޫރީން 2017 އަދި 2018ވަނަ އަހަރު ނަގާފައިވާ ފައިސާގެ ތެރެއިން 492،867 ރުފިޔާވަނީ ގެއްލިފައެވެ.
ގެއްލުނު ފައިސާގެ ތެރޭގައި ހިމެނެނީ
- ބޭންކް އެކައުންޓުން ނަގާފައިވާ ފައިސާގެ ތެރެއިން ތިޖޫރީއަށް ނުވައްދައި ހުރި 255،584 ރުފިޔާ
- ކައުންސިލް އިދާރާގެ އެކި ބޭނުންތައް ކުރުމުގެ ނަމުގައި ލިޔެކިޔުންތައް އޮޅުވާލައިގެން ބޭންކުން ނަގާފައިވާ 112،500 ރުފިޔާ
- މުސާރައިގެ ގޮތުގައި ދޭންޖެހޭ ވަރަށްވުރެ އިތުރަށް ތިޖޫރީއާއި ބޭންކް އެކައުންޓުން ނަގާފައިވާ 82،579 ރުފިޔާ
- ބޭންކް އެކައުންޓަށް ޖަމާކުރުމަށް ތިޖޫރީން ނަގާފައިވާ ފައިސާގެ ތެރެއިން ބޭންކަށް ޖަމާކޮށްފައިނުވާ 42،204 ރުފިޔާ
މީގެ ތެރޭގައި، ކައުންސިލް އިދާރާގެ ބޭންކް އެކައުންޓުން 2018ގައި އެކި ފަހަރުމަތުން އަށް ޗެކަކުން 255،584 ރުފިޔާ ނަގާފައިވާއިރު، އެ ފައިސާ ނެގި ބޭނުމާއި ޚަރަދުކުރި ބޭނުން އެނގޭނެ އެއްވެސް ލިޔެކިޔުމެއް ނެތްކަން އޮޑިޓު ރިޕޯޓުގައިވަނީ ފާހަގަކޮށްފައެވެ.
ރިޕޯޓުގައިވާ ގޮތުން ބޭންކަށް ޖަމާކުރުމަށް ނެގި 42،204 ރުފިޔާ ފިޔަވައި އެހެން ހުރިހާ ޗެކަކަށް ފައިސާ ނަގާފައިވަނީ އެ ކައުންސިލްގެ ކުރީގެ އެޑްމިން އޮފިސަރެވެ.
ކައުންސިލްގެ ބޭންކް އެކައުންޓުން 112،500 ރުފިޔާ އިތުރަށް ނެގުމަށްފަހު އެ ފައިސާ ތިޖޫރީއަށް ލާފައިނުވާކަން އޮޑިޓު ރިޕޯޓުން ހާމަވެއެވެ.
ރިޕޯޓުގައި ބުނެފައިވަނީ މި ފައިސާ ނަގާފައިވަނީ ލިޔެކިޔުންތައް ފޯޖުކޮށްގެންނާއި އޮޅުވާލުމަށްފަހު، ނަގަންޖެހޭ އަދަދަށްވުރެ ބޮޑު އަދަދެއް ޗެކުތަކުގައި ޖަހައިގެންނެވެ.
އިތުރަށް ފައިސާ ނެގުމަށް ޗެކުތަކުގެ ކައުންޓާފޮއިލްތަކުގައި ޖަހާފައިވާ އަދަދަށްވުރެ އިތުރު ފައިސާ އެ ޗެކްތައް ބޭނުންކޮށްގެން ބޭންކް އެކައުންޓުން ނަގާފައިވުމާއި ބައެއް ފަހަރު ޗެކުތަކުގެ ކައުންޓާފޮއިލްތަކުގައި ސޮއިނުކޮށް ބޭންކް އެކައުންޓުތަކުން ފައިސާ ނަގާފައިވާ ކަމަށް ވެސް އޮޑިޓު ރިޕޯޓުގައިވަނީ ފާހަގަކޮށްފައެވެ.
ކައުންސިލް މުވައްޒަފުންގެ މުސާރައާއި އެލަވަންސްގެ ގޮތުގައި، ވޭސްޓް މެނޭޖްމަންޓުގެ މުވައްޒަފުންގެ މުސާރައަށްވާ އަދަދުގެ އިތުރަށް 60،365 ރުފިޔާ، އަދި މިސްކިތު މުވައްޒަފުންނަށް މުސާރައިގެ ގޮތުގައި ދޭންޖެހޭ އަދަދަށްވުރެ އިތުރަށް، 22،214 ރުފިޔާ ނަގާފައިވާ ކަމަށް އޮޑިޓު ރިޕޯޓުގައި ބުނެފައިވެއެވެ.
އަދި މުސާރައާ އެލަވަންސް ދިނުމަށްފަހު ފައިސާ ލިބުނު ކަމަށް މުވައްޒަފުގެ ސޮއި ހޯދާފައި ނެތްކަމާއި، މުސާރައާއި އެލަވަންސް ދިނުމަށް ހުއްދަދޭ ފަރާތުގެ ސޮއި ވެސް ހޯދާފައިނުވާ ކަމަށް ބުނެފައިވެއެވެ.
މީގެ އިތުރުން، ކައުންސިލް އިދާރާގެ ތިޖޫރީ ބާކީ ކުރާފޮތުގައި ބޭންކަށް ޖަމާކުރުމަށް ކަމަށް ލިޔެ ނަގާފައިވާ 42،204 ރުފިޔާ ބޭންކަށް އަދި އަނބުރައި ތިޖޫރީއަށް ވެސް ޖަމާކޮށްފައިވާކަން އެނގެން ނެތް ކަމަށް އެ ރިޕޯޓުގައި ފާހަގަކޮށްފައިވެއެވެ.
އޮޑިޓު ރިޕޯޓުގައިވާ ގޮތުން، އެ ކައުންސިލްގެ އެޑްމިން އޮފިސަރުވަނީ ކައުންސިލްގެ ދެ ލައްކައެއްހާ ރުފިޔާ އަމިއްލަ ބޭނުމަށް ޚަރަދުކޮށްފައިވާ ކަމަށް އިއުތިރާފުވެފައެވެ.
އަދި ބޭންކުން ފައިސާ ނަގަންޖެހޭ އަދަދަށްވުރެ އިތުރަށް ނެގުމަށް، އަމިއްލައަށް ލިޔެލިޔުންތައް ތައްޔާރުކޮށް، ޗެކުގައި ކައުންސިލްގެ އިސްވެރިންގެ ސޮއި އަމިއްލައަށް ކޮށްފައިވާ ކަމަށް އިއުތިރާފުވެ، އޭނާ ބަޔާންދީފައިވާ ކަމަށް ރިޕޯޓުގައި ވަނީ ބުނެފައެވެ.
މި ކަމުގައި ކައުންސިލްގެ އިސްވެރިންގެ އިހުމާލު އޮތް ކަމަށް ވެސް ރިޕޯޓުގައި ފާހަގަކޮށްފައިވެއެވެ.
އެ ގޮތުން މި މައްސަލަ ތަހުގީގުކޮށް، މާލިއްޔަތު ގާނޫނާއި ގަވާއިދުގެ ދަށުން އިސްލާހީ ފިޔަވަޅު އެޅުމަށް ނަސޭހަތްދީ، ފިޔަވަޅު އެޅުމަށް އެ ރިޕޯޓުގައި ވަނީ އަންގައިފައެވެ.