ސަރުކާރަށް ނުލިބިވާ ފައިސާގެ އަދަދު މަދުކުރަން މަސައްކަތްތަކެއް ކުރުމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އިން ސްޓްރެޓީޖިކް ޕްލޭންގައި ހިމަނައިފިއެވެ.
ކުރިޔަށް އޮތް ހަތަރު އަހަރަށް މީރާއިން އެކުލަވައިލި ސްޓްރެޓީޖިކް ޕްލޭންގައިވާ ގޮތުން، ޓެކްސް ފައިސާގެ ގޮތުގައި ދައުލަތަށް ނުލިބިވާ ފައިސާގެ އަދަދު އަހަރަކު 15 ޕަސެންޓަށް މަދުކުރުމަށް ޓަކައި، ޓެކްސް ހޯދުމުގެ މަސައްކަތް އަލުން ބައްޓަންކޮށް، އެ ކަމަށް ޚާއްސަ އުކުޅުތަކެއް ބޭނުން ކުރުމަށް ވަނީ ނިންމައިފައެވެ. އަދި ކަމާ ގުޅުންހުރި މިނިސްޓްރީތަކާ ގުޅިގެން, ޓެކްސް ނޫން އެހެނިހެން ގޮތްގޮތުން ދައުލަތަށް ނުލިބިވާ ފައިސާ، އަހަރަކު 10 ޕަސެންޓަށް ކުޑަކުރުމުގެ މަސައްކަތް ކުރަން ވެސް ވަނީ ކަނޑައަޅައިފައެވެ.
އެ ޕްލޭންގައި ކުރިޔަށް އޮތް ހަތަރު އަހަރު ދުވަހަށް، ނުވަތަ 2028އަށްވާއިރަށް ހާސިލް ކުރުމަށް ކަނޑައަޅާފައިވަނީ މައިގަނޑު ނުވަ ކަމެކެވެ. އެ އަމާޒުތައް ހާސިލް ކުރުމަށް ޓަކައި ކުރަންޖެހޭ 27 ކަމެއް އެ ޕްލޭންގައިވެއެވެ.
އެ ޕްލޭންގައި ވަނީ 2026ގެ ކުރިން މީރާގެ ޚިދުމަތުގެ ފެންވަރު ރަނގަޅުކޮށް، ޓެކްސް ދެއްކުން އިތުރަށް ފަސޭހަކުރުން ހިމަނައިފައެވެ. އަދި 2028 ވަނަ އަހަރުގެ ނިޔަލަށް މީރާގެ އޮންލައިން ޚިދުމަތްތަކުގައި ސެލްފް ސާވިސް ކެޕޭސިޓީ އިތުރުކުރުމަށް ވަނީ އަމާޒު ހިފައިފައެވެ. އަދި 2026 ވަނަ އަހަރު ނިމޭއިރު އިލެކްޓްރޯނިކް އިންވޮއިސިން ތަންފީޒުކޮށް، 2027 ވަނަ އަހަރު ނިމޭއިރު، ބޮޑެތި އަދަދުތަކުން ޓެކްސް ދައްކާ ފަރާތްތަކުގެ 90 ޕަސެންޓު އެ ނިޒާމުގެ ތެރެއަށް ވެއްދުން ވެސް ހިމެނެއެވެ.
މީރާއަށް ގާނުނީ ގޮތުން ކުރިމަތިވާ މައްސަލަތައް ހައްލުކުރެވޭ މިންވަރު، މަދުވެގެން އަހަރަކު ފަސް ޕަސެންޓަށް އިތުރުކުރުން ވެސް މީގެ ތެރޭގައި ހިމެނެއެވެ. އަދި ޓެކްސްގެ އާ ގާނޫނުތައް ތަންފީޒުކުރުމަށް ގާނޫނީ ގޮތުން ކަނޑައެޅިފައިވާ ޓައިމްލައިންތަކަށް ޓެކްސް ދައްކާ ފަރާތްތަކުން 100 ޕަސެންޓަށް ތަބާވާކަން ކަށަވަރު ކުރުމާއެކު، މިހާރު ހުރި ޓެކްސް ގާނޫނުތަކަށް އިސްލާހު ގެނައުމަށް ވެސް އެ ޕްލޭންގެ ދަށުން ހާސިލްކުރަންޖެހޭ ކަންކަމުގެ ތެރޭގައި އޮތީ ކަނޑައަޅައިފައެވެ. އަދި ރައްކާތެރި އަދި ފެންވަރު ރަނގަޅު ޚިދުމަތްތަކެއް ދިނުމަށްޓަކައި މީރާގެ މަސައްކަތްތައް އެ އިދާރާގެ އަމިއްލަ ފެސިލިޓީއަކަށް 2028ގެ ކުރިން ބަދަލު ކުރުން ހިމެނެއެވެ.
މީރާއިން ބުނީ، އެ އިދާރާގެ އަމާޒަކީ ޓެކްސްގެ ނިޒާމު ހަމަހަމަ ގޮތެއްގައި ވަރުގަދަކޮށް، ދިވެހީން ބާރުވެރި ކުރުވުން ކަމަށެވެ. އަދި ޓެކްސް ދައްކާ ފަރާތްތަކަށް އޮތް ބުރަ ކުޑަކޮށް، އެ ނިޒާމުން އެންމެނަށް ވެސް ފައިދާވާ މާހައުލެއް އުފެއްދުން ކަމަށެވެ.
ދައުލަތަށް ލިބެން ޖެހި، ނުލިބި ހުރި ފައިސާގެ އަދަދު އެތައް ބިލިއަނަކަށް އަރާއިރު، އެ ފައިސާ ހޯއްދަވާނެ ކަމަށް ރައީސް ޑރ. މުޙައްމަދު މުއިއްޒު ވަނީ ވިދާޅުވެފައެވެ.