ރައީސް ޑރ. މުޙައްމަދު މުއިއްޒުގެ މެނިފެސްޓޯގައި ހިމަނުއްވާފައިވާ، ރާއްޖޭގެ 20 އަހަރުގެ ތަރައްގީގެ ޕްލޭން ހެދުމުގެ މަސައްކަތް ކޮށްދޭނެ ލޯކަލް ކޮންސަލްޓެންސީ ފާމެއް ހޯދަން ފިނޭންސް މިނިސްޓްރީން ހުޅުވާލި ފުރުސަތުގެ މުއްދަތު މިއަދު އިތުރުކޮށްފިއެވެ.
އެގޮތުން 20 އަހަރުގެ ޤައުމީ ތަރައްޤީގެ ޕްލޭނެއް އެކުލަވާލުމުގެ މަސައްކަތް ކޮށްދޭނެ ލޯކަލް ކޮންސަލްޓެންސީ ފާމުތައް މިސައްކަތަށް "އެކްސްޕްރެޝަން އޮފް އިންޓްރެސްޓް" (އީއޯއައި) ހުށަހެޅުމަށް ފުރަތަމަ ހުޅުވައިލީ މި މަހުގެ އެއްވަނަ ދުވަހެވެ.
އެއިރު ކުރި އިއުލާނުގައި އީއޯއައި ހުށަހެޅުމުގެ ސުންގަޑިއަކީ މިއަދު 14:00 އެވެ. ނަމަވެސް އަންނަ މަހުގެ ހަތްވަނަ ދުވަހަށް މުއްދަތު އިތުރުކޮށް މިއަދު ވަނީ އަލުން އިއުލާނު ކޮށްފައެވެ.
މިނިސްޓްރީން ބުނީ މި މަސައްކަތުގެ މަޤްސަދަކީ ކުރިއަށް އޮތް 20 އަހަރު ދުވަހުގެ ތެރޭގައި ރާއްޖޭގެ ދެމެހެއްޓެނިވި އިޤްތިޞާދީ، އިޖްތިމާޢީ، ތިމާވެށި، އަދި އާބަން ޑިވެލޮޕްމަންޓުގެ ޤައުމީ ތަރައްޤީގެ ޕްލޭނެއް އެކުލަވާލުން ކަމަށެވެ.
އަދި މި ޕްލޭންގައި، ނޭޝަނަލް ޑިވެލޮޕްމަންޓް ޕްލޭން ފައިދާހުރި ގޮތެއްގައި ތަންފީޒުކުރުމާއި، މޮނީޓަރުކުރުމާއި، އިވެލުއޭޓްކުރެވޭނެ މެކޭނިޒަމްތައް ހިމަނަންވާނެ ކަމަށް ބުނެފައިވެއެވެ.
އެ މަސައްކަތައް ޝަޢުޤުވެރިވާ ފަރާތްތަކުން މަސައްކަތް ކުރުމުގެ ޤާބިލްކަން ސާބިތުކޮށްދޭ ލިޔެކިޔުން ހުށަހަޅަން ވާނެ ކަމަށް ވެސް ބުންޏެވެ.
އެގޮތުން ކުންފުނީގެ ފަންނީ ޤާބިލު ކަން، ދާއިރާއިން ކޮށްފައިވާ މަސައްކަތްތަކުގެ ތަފްސީލް މަސައްކަތްތަކުގެ އަގު އެނގޭނޭހެން، އަދި ކުންފުނީގެ މުވައްޒަފުންގެ މިފަދަ މަސައްކަތްތަކުގެ ހުނަރާއި ޤާބިލުކަން އަދި ކުންފުނީގެ މިފަދަ މަސައްކަތުގެ މަޢުލޫމާތު ހިމަނަން ޖެހެއެވެ.
ޕްރޮޕޯސަލް ހުށަހެޅުމުގެ ދަޢުވަތު ދެނީ މި މަސައްކަތްތަކަށް ޝައުގުވެރިކަން ފާޅުކުރާ ފަރާތްތަކުގެ ތެރެއިން ޝޯޓް ލިސްޓް ކުރެވޭ ފަރާތްތަކަށެވެ.
މި މަސައްކަތްތަކާއި ގުޅޭ މަޢުލޫމާތު ހިމެނޭ ގޮތަށް ތައްޔާރުކުރެވިފައިވާ ޓާރމްސް އޮފް ރިފަރެންސް (ޓީއޯއާރް) މި މިނިސްޓްރީގެ ވެބްސައިޓުން ލިބެން ހުންނާނެއެވެ.
ވީމާ، މަސައްކަތަށް ޝައުޤުވެރިވެލައްވާ ފަރާތްތަކުން އަންނަ މަހުގެ ހަތްވަނަ ދުވަހުގެ 14:00 ގެ ކުރިން، "އެކްސްޕްރެޝަން އޮފް އިންޓަރެސްޓް" މެއިލް ނުވަތަ އީމެއިލް މެދުވެރިކޮށް ފޮނުވަން ވަނީ އެދިފައެވެ.
މި ސަރުކާރުން ވަނީ ދިގު މުއްދަތަކަށް ކުރިއަށްގެންދާ ތަރައްގީގެ ބިޔަ މަޝްރޫއުތަކެއް އިއުލާންކޮށްފައެވެ. އޭގެ ތެރެއިން، ވެލާނާ އިންޓަނޭޝަނަލް އެއާޕޯޓު ތަރައްގީކުރުމަށް 20 އަހަރުގެ ޕްލޭނެއް ޖެނުއަރީ މަހު ރައީސް އިފުތިތާހުކުރެއްވިއެވެ.
މީގެ އިތުރުން ފުށިދިއްގަރުފަޅު ހިއްކައިގެން ކުރިއަށްގެންދާ ބޯހިޔާވަހިކަމުގެ އެންމެ ބޮޑު މަޝްރޫއު މިދިޔަ އަހަރުގެ ޑިސެމްބަރު މަހު ވަނީ ފަށައިފައެވެ.