މާލޭ މަގުމަތީގައި ކޯރާޑިއެއް ހިފައިގެން ބަޔަކު ފަހައި ދުވި ކަމަށް ތުހުމަތުވާ މީހަކު ކްރިމިނަލް ކޯޓުން މިއަދު މިނިވަންވެއްޖެއެވެ.
މި މައްސަލައަކީ ގއ. މާމެންދޫ ގުލޭރަންމާގޭ އަހްމަދު ރަބީއު، ކޯރާޑިއެއް ހިފައިގެން މަގު މަތީގައި ބަޔަކު ފަހައި ދުވި ކަމަށް ބުނާ މައްސަލައެކެވެ. މި މައްސަލައިގައި އޭނާގެ މައްޗަށް އުފުލާފައި ވަނީ، މަގުބޫލު ސަބަބެއް ނެތި، އާންމު ތަނެއްގައި ނުރައްކާތެރި ހަތިޔާރު ގެންގުޅުމުގެ ކުށުގެ ދައުވާއެވެ.
ދައުވާގައި ބުނެފައިވާ ގޮތުން، މިދިޔަ 2021ވަނަ އަހަރުގެ އޮކްޓޫބަރު 29ވަނަ ދުވަހު، މެންދުރުފަހު 14:14 އެހާކަންހާއިރު، މާލޭ މުރަނގަމަގުގައި ހުންނަ ފޫޑޯސް ކައިރިން ރަބީއު ވަނީ ކޯރާޑިއެއް ހިފައިގެން ބަޔަކު ފަހައި ދުވެފައެވެ.
މި މައްސަލަ އެ ދުވަހު ފުލުހުންނަށް ރިޕޯޓުކުރީ އާންމު ފަރާތަކުންނެވެ. އެއީ ތޫނު ހަތިޔާރު ބޭނުންކޮށްގެން މާރާމާރީ ހިންގަން އުޅުނު ކަމަށް ބުނެއެވެ. އެއާއެކު، ނޮވެންބަރުމަހުގެ އަށްވަނަ ދުވަހު ރަބީއު ފުލުހުންގެ ބެލުމުގެ ދަށަށް ގެންދިޔައެވެ. ފުލުހުން ކޯޓުގައި ބުނެފައިވާ ގޮތުގައި މި މައްސަލައިގެ ތަހުގީގަށް ރަބީއުއާ ސުވާލު ކުރުމުން އޭނާ ވަނީ ހަނު ހުރެފައެވެ.
މި މައްސަލައިގައި ރަބީއު ވަނީ އޭނާގެ މައްޗަށް ކޮށްފައިވާ ދައުވާއަށް ޝަރީއަތުގައި އިންކާރުކޮށް، އެ ފަދަ އަމަލެއް އޭނާ ކޮށްފައިނުވާނެ ކަމަށް ބުނެފައެވެ.
މި މައްސަލައިގައި ވަނީ މައުސޫމް މުހައްމަދުދީދީ ނަމަކަށް ކިޔާ މީހެއްގެ މައްޗަށް ވެސް ދައުވާކޮށްފައެވެ. މި މައްސަލައިގައި ތުހުމަތުވާ ދެ މީހުންގެ ޝަރީއަތް ކްރިމިނަލް ކޯޓުން ކުރިޔަށް ގެންދިޔައީ ވަކިވަކިންނެވެ.
މި މައްސަލައިގައި ފުލުހުން ވަނީ ވީޑިއޯ ފުޓޭޖުތަކެއް ވެސް ހުށަހަޅައިފައެވެ. އެހެން ނަމަވެސް އެއިން ފެންނަނީ ރަބީއުކަން، ޝައްކެއް ނެތް މިންވަރަށް ސާބިތުކޮށްދެވިފައި ނުވާތީ، ކޯޓުން ނިންމީ ރަބީއުގެ މައްޗަށް ދައުވާ ސާބިތުނުވާ ކަމަށެވެ.
މަގުބޫލު ސަބަބެއް ނެތި އާންމު ތަނެއްގައި ނުރައްކާތެރި އެއްވެސް ބާވަތެއްގެ ތޫނު އެއްޗެއް ގެންގުޅުމަކީ މަނާ ކަމެކެވެ. މި ފަދަ ކުށެއް ކޮށްފިނަމަ، ހަ މަސްދުވަހާ 12 މަސްދުވަހާ ދެމެދު މުއްދަތަކަށް ޖަލަށްލެވޭނެއެވެ.
މި ފަހުން ރާއްޖޭގައި މާރާމާރީގެ މައްސަލަތައް އިތުރުވެފައިވާކަމަށް ފާހަގަ ކުރެވެއެވެ. އެގޮތުން ރޭގައި ވެސް މާލޭގައި ތިން މާރާމާރިއެއް ހިންގާފައި ވާކަމަށް ފުލުހުން ވަނީ މިއަދު ބުނެފައެވެ.