ޣައްޒާގެ ނުސައިރަތު ރެފިއުޖީ ކޭމްޕަށް އިސްރާއީލު ސިފައިން ދިން ހަމަލާއާއި ހިންގި ގަތުލުއާންމު ދިވެހި ސަރުކާރުން އެންމެ ހަރުކަށި އިބާރާތުން ކުށްވެރި ކޮށްފިއެވެ.
މިދިޔަ ބުރާސްފަތި ދުވަހު އިސްރާއިލުން ގައްޒާގެ ނުސައިރަތު ރެފިއުޖީ ކޭމްޕަށް ދިން ހަމަލާގައި ވަނީ 33 މީހުން ޝަހީދުކޮށްލައިފައެވެ. ގައްޒާގެ މީޑިއާ އޮފީހުން ބުނި ގޮތުގައި އިސްރާއިލުގެ އަސްކަރިއްޔާއިން މި ހަމަލާގައި ޓާގެޓުކުރީ ނުސައިރަތުގައި ތިބި ރައްޔިތުންނަށެވެ.
މި ކަން ކުށްވެރިކޮށް ދިވެހި ސަރުކާރުން މިއަދު ނެރުނު ބަޔާނުގައިވަނީ މި ހަމަލާ އެންމެ ހަރުކަށި އިބާރާތުން ކުށްވެރިކޮށްފައެވެ. އެ ބަޔާނުގައިވަނީ ބައިނަލްއަގުވާމީ ގާނޫނުތަކާއި ބައިނަލްއަގުވާމީ އިންސާނިއްޔަތާބެހޭ ގާނުތަކާ ޚިލާފަށް، އާންމުންނަށް އަމާޒުކޮށް އިސްރާއިލުން ދޭ މި ފަދަ ހަމަލާތަކުގެ ސަބަބުން ގައްޒާގެ އިންސާނީ ހާލަތު ގޯސްވެފައިވާކަން ފާހަގަކޮށްފައެވެ. އަދި މި ފަދަ އަމަލުތައް ހުއްޓުވުމަށް ބައިނަލްއަގުވާމީ މުޖުތަމައުން އަވަސް، އަދި ހަރުދަނާ ފިޔަވަޅުތަކެއް އަޅަންޖެހޭނެކަން ރާއްޖޭން ދެކޭކަމަށް ބަޔާނުގައިވެއެވެ.
އިސްރާއީލުގެ ހަރުކަށި ހަމަލާތައް ހުއްޓުވުމަށާއި ހަމަނުޖެހުންތައް ނައްތާލައި، ކުށެއް ނެތް އާންމުން ހިމާޔަތްކޮށް، މެދުއިރުމަތީ ސަރަޙައްދުގައި ދެމެހެއްޓެނިވި ސުލްހަ ގާއިމުކުރުމަށް އަޅަންޖެހޭ އަވަސް ފިޔަވަޅުތައް އެޅުމަށް ދިވެހި ސަރުކާރުން ވަނީ ތަކުރާރުކޮށް ބައިނަލްއަގުވާމީ މުޖުތަމައަށް ގޮވާލައިފައެވެ.
ސަރުކާރުން ބުނީ، ފަލަސްތީނުގެ ރައްޔިތުން އަދުލުއިންސާފު ހޯދުމަށާއި، މިނިވަން ދައުލަތެއް ގާއިމު ކުރުމަށް ކުރަމުންދާ މިންނެތް މަސައްކަތުގައި، އެ ރައްޔިތުންނާއެކު ރާއްޖޭން އަބަދު ވެސް ދެމިއޮންނާނޭ ކަމުގެ ޔަގީންކަން ދީފައެވެ.
މިދިޔަ އަހަރުގެ އޮކްޓޫބަރުން ފެށިގެން އިސްރާއިލުން އަންނަނީ ގައްޒާއަށް ހަމަލާތައް ދެމުންނެވެ. މިހާތަނަށް މި ހަމަލާތަކުގައި 44،835އަށްވުރެ ގިނަ މީހުން ޝަހީދުކޮށްލާފައިވާއިރު، 106،356އަށްވުރެ ގިނަ މީހުން ވަނީ ޒަޚަމް ކޮށްލައިފައެވެ.
އިސްރާއިލުން ފަލަސްތީނަށް ދެމުންގެންދާ ހަމަލާތަކާ ގުޅިގެން އެ ކަން ކުށްވެރިކޮށް، ދިވެހި ސަރުކާރުގެ ފަރާތުން އަޅާ ފިޔަވަޅެއްގެ ގޮތުގައި އިސްރާއިލުގެ ޕާސްޕޯޓު މަނާކުރަން އޮތީ ނިންމައިފައެވެ. ސަރުކާރުން އެކަން އިއުލާނުކުރީ ޖޫން މަހުގެ ދެވަނަ ދުވަހެވެ. އެ ކަމަށް މުޅި ދުނިޔޭގެ ސަމާލުކަން ލިބުނެވެ.
އޭގެ ފަހުން އިސްރާއިލުގެ ޕާސްޕޯޓު މަނާކުރުމަށް، ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް މަޖިލީހަށް ބިލެއް ވެސް ހުށަހެޅުއްވިއެވެ. ޕީއެންސީގެ ވެސް ފުރިހަމަ ތާއީދާ އެކު، އޭރު އެ ބިލު މަޖިލީހުން ބަލައިގަނެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އަށް ފޮނުވީ ޖޫން 10 ގައެވެ.
އެ ބިލުގެ މަސައްކަތް މަޑުޖެހި އެތައް ދުވަހެއް ވެފައިވާއިރު، މި ފަހުން އެ ބިލާމެދު ސަރުކާރުގެ ރާގުވަނީ ބަދަލުވެފައެވެ. އެ ބިލުގެ މަސައްކަތް މަޑުޖެހިފައި އޮތުމާ ގުޅިގެން ރައްޔިތުންނާ އިދިކޮޅުގެ ފާޑުކިޔުން ސަރުކާރަށް އަމާޒުވަމުންދިޔަ ނަމަވެސް، މިދިޔަ ބުރާސްފަތި ދުވަހު މަޖިލިސް ޗުއްޓީއަށް ދިޔައީ ވެސް އެ ބިލުގެ މަސައްކަތް ބާއްވައިފައެވެ.