އިޒްރޭލުގެ ރައްޔިތުން ޒަރޫރީ ސަބަބެއް އޮވެގެން ނޫނީ ރާއްޖެއަށް ދަތުރުނުކުރުމަށް އަންގައި، އިޒްރޭލުގެ ގައުމީ ސަލާމަތީ ބެހޭ މަޖިލީހުން އެލާޓެއް ނެރެފިއެވެ.
އިޒްރޭލުގެ ދަތުރުވެރިންގެ ސަލާމަތާއި ރައްކާތެރި ކަމަށް ބަލައި ދެ ގައުމަކަށް ނެރެފައިވާ އެލާޓްތައް މިއަދު ވަނީ މަތިކޮށްފައެވެ. އޭގެ ތެރޭގައި ރާއްޖެ ހިމެނޭއިރު، ރާއްޖޭގެ އެލާޓް ވަނީ ދެ ވަނަ ލެވްލެއިން ތިން ވަނަ ލެވެލްއަށް މަތިކޮށްފައެވެ.
ދެވަނަ ލެވެލްގައި ބުނަނީ ދަތުރުކުރުމުގައި ރައްކާތެރިވުމުގެ އިތުރު ފިޔަވަޅުތައް އެޅުމަށެވެ. ނަމަވެސް އެ ގައުމަކަށް ދަތުރުނުކުރުމަށް ނުވަތަ ގައުމުން ފޭބުމަށް އިލްތިމާސެއް ނުކުރެއެވެ.
އެއާ ޚިލާފަށް ތިން ވަނަ ލެވެލްގައި އަންގަނީ ކޮންމެހެން ކުރަން ޖެހޭ ދަތުރެއް ނޫނީ އެ ސަރަހައްދަކަށް ނުކުރުމަށެވެ.
އިޒްރޭލުން ބުނެފައިވަނީ ރާއްޖޭގެ އެލާޓް ލެވެލް މަތިކުރަން ޖެހުނީ، 'ޓެރަރިސްޓުންނަށް' ތާއިދު ކުރާ ފަރާތްތައް ރާއްޖޭގައި ތިބުމުންނާއި އިޒްރޭލުގެ ރައްޔިތުންނާއި ޔަހޫދީންނާ ދެކޮޅު ފިކުރު އިތުރުވާތީ ކަމަށެވެ.
ރާއްޖޭގެ އިތުރުން އިޒްރޭލުގެ ދަތުރުވެރިން ސަމާލުވުމަށް އަންގައިފައިވަނީ އަރުމީނިއާއަށް ދަތުރުކުރުމުގައެވެ. އެގޮތުން އެ ގައުމުގެ އެލާޓް ލެވެލް ވަނީ އެކަކު ދެއަކަށް މަތިކޮށްފައެވެ. އެއީ އަރުމީނިއާގައި ވެސް އިޒްރޭލުގެ ރައްޔިތުންނާއި ޔަހޫދީންނަށް ނުރައްކާ އޮތް ކަމަށް ބުނެއެވެ.
ރާއްޖެއަށް މަދުން ނަމަވެސް އިޒްރޭލުގެ ފަތުރުވެރިން އާދެއެވެ. އެގޮތުން މިދިޔަ އަހަރުގެ އޮކްޓޯބަރުގެ ނިޔަލަށް 517 އައިސްފައިވާއިރު، މި އަހަރު އެ އަަދަދު ވަނީ 62އަށް ވެއްޓިފައެވެ.
އިޒްރޭލުން މިދިޔަ އަހަރުގެ އޮކްޓޯބަރު މަހުން ފެށިގެން ޣައްޒާގައި ހިންގަމުންދާ ގަތުލުއާންމާ ދެކޮޅަށް ރާއްޖޭގައި އެއްވުންތައް ބާއްވައި، ނުރުހުން ފާޅުކުރަމުންދެއެވެ. އަދި އިޒްރޭލު ޕާސްޕޯޓް އޮންނަ މީހުންނަށް ރާއްޖެ ނާދެވޭ ގޮތަށް ހެދުމަށް ވެސް ގިނަ ބަޔަކު އަންނަނީ ގޮވައިލަމުންނެވެ.
އިޒްރޭލު ޕާސްޕޯޓް މަނާ ކުރާނެ ކަމަށް މި ސަރުކާރުން ބުނާއިރު، އެ މައްސަލަ މިހާރު އޮތީ ރައްޔިތުންގެ މަޖިލީހުގެ ކޮމިޓީ މަރުހަލާގައެވެ.
އެ މައްސަލައިގައި ސަރުކާރަށް ފާޑުކިޔުން އަމާޒުވެފައިވާއިރު، ޕާސްޕޯޓް މަނާކުރުމާ ގުޅޭ ގޮތުން މިހާރު ޕީއެންސީގެ މެންބަރުންގެ ރާގު ބަދަލުވެ، މުޅިން މަނާނުކުރާ ގޮތަށް ވާހަކަ ދައްކަވަމުންދާތީ ވެސް ގިނަ ބަޔަކު އަންނަނީ ނުރުހުން ފާޅުކުރަމުންނެވެ.