ހިފާފައިވާ ގޯލާންގެ ބިންތައް (9 ޑިސެންބަރު 2024) : ސޫރިޔާގެ އިދިކޮޅު ހަނގުރާމަ ވެރިން ވެރިރަށް ދިމިޝްގަށް އެރުމާއެކު ރައީސް ބައްޝާރުލް އަސަދުގެ ސަރުކާރު ވެއްޓިގެން ދިޔުމަކީ އިސްރާއީލު އުފާކުރާ ތާރީޚީ ކަމެއް ކަމަށް ސިފަކޮށް މިކަމުގެ ސަބަބުން އީރާން ލީޑް ކުރާ މެދުއިރުމަތީގެ ޝައިތާނީ ނާރެސް ހަލާކުވެގެންދާނެކަން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހާމަކޮށްފިއެވެ.
އިސްރާއީލު ގަދަބާރުން ވެރިވެގަނެގެން އުޅޭ ސޫރިޔާގެ ސަރަހައްދެއްކަމަށްވާ ގޯލާންގެ އުސްބިންތަކަށް ގޮސް އެތަނުގައި ހުރެގެން ދިން ބަޔާނެއްގައި ނަތަންޔާހޫ ވިދާޅުވީ ބައްޝާރުގެ ވެރިކަމުގައި ސޫރިޔާއަކީ މެދުއިރުމަތީގެ ޝައިތާނީ ނާރެސްގެ މަރުކަޒު ކަމުގައެވެ.
ނަތަންޔަހޫ އަކީ ޣާއްޒާގައި ގަތުލުއާންމު ހިންގަމުން ގެންދާ އަދި ޣައްޒާގެ އާންމުންގެ 45000 އަށް ވުރެ ގިނަ މީހުން މަރާލާފައިވާ ނުރައްކާތެރި ގާތިލެކެވެ. އޭނާއަކީ ދުނިޔޭގެ ފެންވަރުގެ ނުރައްކާތެރި ގާތިލަކަށްވާތީ އޭނާ ހައްޔަރުކުރުމުގެ އަމުރު ބައިނަލްއަގްވާމީ ޖިނާއީ ކޯޓުން ވަނީ ނެރެފައެވެ. ނަމަވެސް އެމެރިކާ ގެންދަނީ މި ނުރައްކާތެރި މުޖުރިމަށް ހިމާޔަތް ދިނުމަށް މަސައްކަތް ކުރަމުންނެވެ.
ނަތަންޔަހޫ ސިފަކުރި ގޮތުގައި މެދުއިރުމަތީގެ ޝައިތާނީ ނާރެސް އަކީ އީރާން، ހަމާސް އަދި ހިޒްބުﷲ ޖަމާއަތެވެ. މިނާރެހުގައި ހިމެނޭ ތިން ފަރާތް ގުޅުވައިދޭ މަރުކަޒީ ލިންކަކީ ބައްޝާރު ގެ ސަރުކާރެވެ. އެ ސަރުކާރު ވެއްޓުމާއެކު މި ލިންކް ކެނޑިގެން ދިޔުމަކީ ޝައިތާނީ ނާރެސް ބަލިކަށިވެގެންދާނެކަމެއް ކަމަށް ނަތަންޔާހޫ ސިފަކުރިއެވެ. އިސްރާއީލު އުފާވަނީ މިކަމުގެ ސަބަބުން ކަމަށް ވެސް ނަތަންޔާހޫ ވިދާޅުވިއެވެ.
ބައްޝާރުގެ ވެރިކަން ވެއްޓުނުފަހުން އިސްރާއީލުން ސޫރިޔާގެ ސައެންޓިފިކް ރީސާޗް މަރުކަޒުތަކަށް ހަމަލާދެނީ
ނަތަންޔާހޫ ވިދާޅުވިގޮތުގައި ބައްޝާރަކީ ސޫރިޔާގެ އާންމުން މަރައި ހަނގުރާމައިގެ ޖަރީމާ ހިންގާފައިވާ ބޮޑު މުޖްރިމެކެވެ. ބައްޝާރު ވެއްޓުނީ ހިޒްބުﷲ އަށް އިސްރާއީލު ދިން ހަމަަލާތަކާއެކު ހިޒްބުﷲ ވެސް ބަލިކަށިވެފައި ވުމުން ކަމަށާއި ބައްޝާރު ވައްޓާލުމުގައި އިސްރާއީލަށްވެސް ނުސީދާ ދައުރެއް އަދާކުރެވިއްޖެކަން ނަތަންޔާހޫ ފާހަގަ ކުރެއްވެވިއެވެ.
އެފަދަ މުޖްރިމުންނަށް މެދުއިރުމަތިން ޖާގަދެވިގެން ނުވާނެ އެވެ. ސޫރިޔާގެ އިދިކޮޅު ހަނގުރާމަވެރިން ވެރިރަށް ދިމިޝްގަށް ވަނުމުގެ ކުރިން ސޫރިޔާގެ ރައީސް ބައްޝާރުލް އަސަދާއި އޭނާގެ އާއިލާ ވަނީ ފިއްލަވައިގެން ރަޝިއާ އަށް ވަޑައިގެންފައެވެ.
ބައްޝާރު ރަޝިއާއަށް ވަޑައިގެންފައިވަނީ ސޫރިޔާގައި ހުންނަ ރަޝިއާގެ އަސްކަރީ ބޭސް އަކުންނެވެ. ބައްޝާރު ކުޑަ މަތިންދާ ބޯޓެއްގައި ފިއްލަވައިގެން ފުރަތަމަ ވަޑައިގަތްކަމަށްވަނީ ސޫރިޔާގެ އިންތާކިޔާ ޕްރޮވިންސްގައިވާ ރަޝިއާގެ ވައިގެ ބޭސް އެއްކަމަށްވާ ހަމީމީމް ވައިގެ ބޭސް އަށެވެ. އެތަނުން ރަޝިއާގެ އަސްކަރީ ޓްރާންސްޕޯޓް މަތިންދާ ބޯޓެއްގައި ބައްޝާރު ވަޑައިގެންނެވި ކަމަށް ވަނީ ރަޝިއާގެ ވެރިރަށް މޮސްކޯއަށެވެ.
ސޫރިޔާގެ އިދިކޮޅު ހަނގުރާމަވެރިން ވެރިރަށް ދިމިޝްގަށް ވަނުމުގެ ތިން ދުވަސް ކުރިން ބައްޝާރުގެ އާއިލާކަމަށްވާ އަނބިކަނބަލުން އަސްމާ އާއި ތިންދަރިން (އަންހެން ބޭފުޅަކާއި ފިރިހެން ދެބޭފުޅުން) ވަނީ ރަޝިއާ ސަރުކާރުގެ ހިމާޔަތުގައި ވެރިރަށް މޮސްކޯއަށް ވަޑައިގެންފައެވެ.
ބައްޝާރުލް އަސަދުގެ ސަރުކާރު ވެއްޓިގެން ދިޔުމަކީ އިސްރާއީލަށް ލިބުނު ބޮޑު ކާމިޔާބީ އެއްކަމަށް ނަތަންޔާހޫ ސިފަކުރެއްވިއިރު ބައްޝާރުގެ ވެރިކަން ވެއްޓުމާއެކު އިސްރާއީލުން ވަނީ ސޫރިޔާގެ ސައެންޓިފިކް ރީސާޗް ސެންޓަރުތަކަށާއި ޢަސްކަރީ ޓެކްނޮލޮޖީގެ ދިރާސާތަކާބެހޭ މަރުކަޒުތަކަށާއި ބަރުހަތިޔާރު ހުރި ގުދަންތަކަށް ވައިގެ ގިނަ ހަމަލާތަކެއްދީ އެތަންތަން ހަލާކުކޮށްލާފައެވެ.
ސޫރިޔާއިން ލިބޭ ޚަބަރުތައް ބުނާގޮތުން ސޫރިޔާގައިވާ މިފަދަ މަރުކަޒުތައް ހަލާކުކޮށްލުމަށް އިސްރާއީލުން އިއްޔެއިން ފެށިގެން މިހާތަނަށް 100 އަށް ވުރެ ގިނަ ހަމަލާވަނީ ދީފައެވެ.
އިސްރާއީލު ސިފައިން ބުނާގޮތުން މިއީ ސޫރިޔާގައިވާ އިސްރާއީލަށް ނުރައްކާވާނެ ތަންތަން ހަލާކުކޮށްލުމުގެ ގޮތުން ހިންގާ އޮޕަރޭޝަންގެ ބައެކެވެ. މީގެއިތުރުން އިސްރާއީލު ސިފައިން ވަނީ އިސްރާއީލު ވެރިވެގެންފައިވާ ސޫރިޔާގެ ގޯލާންގެ ބިންތަކާ އިންވެގެން އޮންނަ ސޫރިޔާގެ ފަރުބަދަމަތީ ސަރަހައްދެއްކަމަށްވާ ޖަބަލުއްޝައިޚް ސަރަހައްދަށްވެސް ވަދެގަނެ އެތަންވެސް ހިފާފައެވެ.
މުހައްލިލުން ބުނާގޮތުގައި ބައްޝާރުގެ ސަރުކާރު ވެއްޓުމަށްފަހު ދެން އިސްރާއީލު އެންމެ ބޮޑަށް މަސައްކަތްކުރާ ސޫރިޔާ ބައިބައި ކޮށްލެވޭތޯއެވެ. މިކަމަށްޓަކައި ސޫރިޔާގައި ސުންނީންނަށް ވަކި ދައުލަތެއް އަދި ބައިމަދު އެހެން ޖަމާއަތްތަކާއި އެހެން މަޒުހަބުތަކުގެ މީހުންނަށް ވަކި ދައުލަތެއް ހެދުމަށާއި ސޫރިޔާ ރައްޔިތުންނަކީ އަބަދު ތަޅާފޮޅައި ތިބޭ ބަޔަކަށް ހެދުމަށް އެމެރިކާއާ ގުޅިގެން އިސްރާއީލު ވަރަށް ބޮޑަށް މަސައްކަތް ކުރާނެއެވެ. ޚާއްސަކޮށް ސޫރިޔާގެ ބައިމަދު އަލަވީންނާއި ބައިގިނަ ސުންނީން ގެ މެދުގައި ފިތުނަ އުފައްދައި އިތުރަށް އެމީހުން ބައިބައި ކުރަން މަސައްކަތް ކުރާނެއެވެ.
ބައްޝާރުގެ ސަރުކާރު ވެއްޓުމުގެ ކުރިން އީރާނުން ހިޒްބުﷲ އަށް ހަތިޔާރު ފޯރުކޮށްދެނީ ސޫރިޔާގެ މަގުންނެވެ. ނަމަވެސް މިހާރު މި ފުރުސަތު އީރާނަށް ބަންދުވީއެވެ. އެހެންކަމުން ހިޒްބުﷲގެ އަސްކަރީ ގާބިލްކަމަށް މިކަމުގެ ނޭދެވޭ އަސަރު މުސްތަގްބަލްގައި ކުރާނެއެވެ.
ނަމަވެސް އިސްރާއީލުގެ ނުރައްކާ ބޮޑުވަމުންދާނަމަ އަދި އީރާނަށް އެމެރިކާގެ ޕްރެޝަރު އާދަޔާ ޚިލާފަށް ބޮޑުވާނަމަ ނިއުކްލިޔާ ހަތިޔާރު އުފައްދައި ނިއުކްލިޔާ ބާރަކަށް ވުމަކީ އީރާން ކޮށްފާނެކަމެއްކަމަށް މުހައްލިލުން ދެކެއެވެ.