މާލޭގެ ޕާކިން ޒޯނެއްގައި ޕާކުކޮށްފައި އޮތް ކާރެއްގައި ރޯކޮށްލީ ދެ ބައެއްގެ ދެމެދުގައި ހިނގި ހަމަނުޖެހުމެއްގެ ތެރެއިންކަން ފާހަގަކޮށް އެކަމުގެ ތުހުމަތުގައި ހައްޔަރުކުރި ދެ މީހުންގެ ބަންދުގެ މުއްދަތު އިއްޔެ އިތުރުކޮށްފިއެވެ.
މި މައްސަލައިގައި މ. އަރާރަތްކުރި، ޚާލިދު މަޙްމޫދު (35އ) އަދި، އދ. މާމިގިލީ، ބްލޫވިންޑް ހަސަން ނަސީމް (31އ) ހައްޔަރުކުރީ މިދިޔަ މަހުގެ 28ވަނަ ދުވަހެވެ. އެއަށްފަހު 29ވަނަ ދުވަހު އެމީހުންގެ ބަންދަށް ކްރިމިނަލް ކޯޓުން 15 ދުވަސް ޖެހިއެވެ.
އެމީހުންގެ ބަންދުގެ މުއްދަތު އިތުރުކުރުމަށް އިއްޔެ ވަނީ ކޯޓަށް ހާޒިރުކޮށްފައެވެ. އަދި ބަންދުގެ މުއްދަތަށް 15 ދުވަސް އިތުރުކޮށްފައިވާއިރު، ކޯޓު އަމުރުގައި ވާގޮތުން ކާރުގައި ރޯކުރީ ދެބައެއްގެ ދެމެދުގައި ހިނގި ހަމަނުޖެހުމެއްގެ ތެރެއިންކަމަށް ބެލެވެއެވެ.
މި މައްސަލައިގައި ހެކީގެ ގޮތުގައި ސީސީޓީވީ ފުޓޭޖް ހުށަހަޅާފައި ވާއިރު، ދެމީހަކު ވެގެން ކާރުގައި ރޯކޮށްލުމަށްފަހު ދުވެފައި ދާ މަންޒަރު މި ފުޓޭޖުން ފެނެއެވެ.
މީގެ އިތުރުން ވެސް ހެކީގެ ގޮތުގައި ވަނީ، އިންޓެލިޖެންސް ރިޕޯޓާއި ހެކިންގެ ބަޔާން ހުށަހަޅާފައެވެ. މި ހާދިސާގައި ކާރު ބޭނުން ނުކުރެވޭ ވަރަށް އަނދާފައި ވާކަން ކޯޓު އަމުރުގައި ފާހަގަކޮށްފައި ވެއެވެ.
މި މީހުން ބަންދުގައި ބަހައްޓަންޖެހޭ ހާލަތެއްކަމަށް ބަޔާންކޮށްފައި ވަނީ، ކުށްކުރުމުގައި އަމަލީގޮތުން ބައިވެރިވެފައި ވާތީއެވެ. އަދި މީހެއްގެ އަގު ބޮޑު މުދަލަށް ގެއްލުން ދިނުމަކީ ވަރަށް ބޮޑު އަނިޔާއަކަށް ވުމުންނެވެ.
މިދިޔަ ބުދަ ދުވަހު ވެސް ވަނީ މާލޭގެ މެރީބްރައުން ކައިރީ އޮތް ކާރެއްގައި އަލިފާން ރޯވެފައެވެ. މި އަލިފާންގަނޑު ސިފައިން ނިވާލާފައި ވާއިރު، އެއްވެސް މީހަކަށް އަނިޔާވެފައި ނުވާކަމަށް ބުނެފައި ވެއެވެ.
އެ ކާރުގައި ރޯވި ސަބަބެއް އެމްއެންޑީއެފުން މިހާތަނަށް ހާމަކޮށްފައިނުވެއެވެ.