ފުލުހެއްގެ ގޮތުގައި 18 އަހަރު ޚިދުމަތްކޮށްފައިވާ ޒުވާނަކު ރޭގެ ވަގުތެއްގައި ކުއްލި ގޮތަކަށް ނިޔާވެއްޖެއެވެ.
މިކަމާ ގުޅިގެން ފުލުހުންގެ ތަރުޖަމާނު އަހުމަދު ޝިފާން ކުރެއްވި ޓްވީޓެއްގައި ވަނީ ނިޔާވެފައިވަނީ، ތެމާ، ތ. ގުރައިދޫ، ސާޖަންޓް ފާތިމަތު ރިފާ، ކަމަށެވެ.
ޝިފާން ވިދާޅުވީ 37 އަހަރުގެ ރިފާއަކީ ތ. ގުރައިދޫ ޕޮލިސް ސްޓޭޝަންގައި މަސައްކަތްކުރަމުންދިޔަ ފުލުހެއް ކަމަށެވެ.
އޭނާ ނިޔާވީ ޑިއުޓީ ވަގުތުކަމެއް ނުވަތަ ނޫންކަމެއް އެނގިފައި ނުވާކަމަށް ވެސް ޝިފާން ވިދާޅުވިއެވެ.
ފުން ހިތާމައިގެ މި ދަނޑިވަޅުގައި، ހުރިހާ ފުލުހުންނާއި ފުލުހުންގެ މުއައްސަސާގައި މަސައްކަތްކުރާ މުވައްޒަފުންގެ ނަމުގައި މަރުހޫމާގެ އާއިލާއަށް ތައުޒިޔާ ރައްދުކުރާ ކަމަށް ޝިފާންގެ ޓްވީޓުގައި ވެއެވެ.
"އަދި މަރުޙޫމާގެ ފުރާނައަށް ސުވަރުގޭގެ ދާއިމީ ނިޢުމަތް މިންވަރު ކުރައްވައި ބަރުޒަޚުގެ ޢާލަމް ތަނަވަސް ކޮށްދެއްވުން އެދި މާތް ﷲ ގެ ޙަޟުރަތު ގައި ދުޢާ ދަންނަވަމެވެ،" ޓްވީޓުގައި ވެއެވެ.
ރިފާ ނިޔާވުމާ ގުޅިގެން ނައިބު ރައީސް ހުސައިން މުޙައްމަދު ލަތީފް އެކްސްގައި ކުރެއްވި ޕޯސްޓެއްގައި ވަނީ، ރިފާގެ މަރުގެ ޚަބަރު އެއްސެވީ ކުއްލި ހައިރާންކަމާއި ފުން ހިތާމައާއެކު ކަމަށެވެ.
ރިފާގެ އާއިލާއަށް ކެތްތެރިކަން ދެއްވުމަށް އެދި ނައިބު ރައީސް ވަނީ ދުއާ ދަންނަވާފައެވެ.
މީގެ ކުރިން ވެސް ފުލުހުން ކުއްލި ގޮތަކަށް މަރުވުމުގެ ހާދިސާތައް ހިނގާފައި ވެއެވެ. އަދި ފުލުހުންގެ ޓްރެއިނިންގެ ތެރެއިން ވެސް މީގެ ކުރިން އޮފިސަރުން މަރުވެފައި ވެއެވެ.