ބޮލީވުޑްގެ ޒުވާން އެކްޝަން ތަރި ޓައިގާ ޝްރޮފް ލީޑް ރޯލް ކުޅޭ ފިލްމު "ބާޣީ 4"ގެ ބަތަލާއިންނަކީ މިސް ޔުނިވާސް ހަރްނާޒް ސަންދޫ އަދި ބަތަލާ ސޯނަމް ބަޖްވާ ކަމަށް ރިޕޯޓުތައް ބުނެފިއެވެ.
މި ފިލްމަށް ހަރްނާޒް އާއި ސޯނަމް ސޮއިކުރިކަން ފިލްމު ގެނެސްދޭ ކުންފުނި ނަދިއަދުވާލާ ގްރޭންޑް ސަން އެންޓަޓެއިންމަންޓްއިން ވެސް ވަނީ އިއުލާނުކޮށްފައެވެ. ޓައިގާ ޝްރޮފްގެ ކެރިއަރުގެ އެންމެ މަގުބޫލު ފިލްމުތަކުގެތެރޭ ހިމެނޭ ފްރެންޗައިސްގެ ދަށުން ގެނެސްދޭ "ބާޣީ 4" ވާނީ 2021ވަނަ އަހަރު އިންޑިއާއަށް މިސް ޔުނިވާސްގެ ތާޖު ހާސިލުކޮށްދިން ހަރްނާޒްގެ ފުރަތަމަ ބޮލީވުޑް ފިލްމަށެވެ.
ހަރްނާޒް މީގެކުރިން ވަނީ ޕަންޖާބް ދެ ފިލްމެއްގައި މަސައްކަތް ކޮށްފައެވެ. މީގެއިތުރުން ބައެއް މިއުޒިކް ވީޑިއޯތަކުގައި ވެސް ހަރްނާޒް ވަނީ މަސައްކަތްކޮށްފައެވެ.
ޕަންޖާބު ބަތަލާ ސޯނަމް ބަޖްވާ--ފޮޓޯ/އެމްއެސްއެން
ހަރްނާޒް ސަންދޫގެ އިތުރުން ދެން ފިލްމަށް ގެނައިކަން އިއުލާނުކުރި ބަތަލާ ސޯނަމް ބަޖްވާ އަކީ ޕްރޮޑިއުސަރު ސާޖިދު ނަދިއަދުވާލާ ބޮޑު ކާސްޓަކާ އެކު މަސައްކަތް ފަށާފައިވާ ފިލްމު "ހައުސްފުލް 5"ގެ ކާސްޓުގައި ވެސް ހިމެނޭ ބަތަލާއެކެވެ. ސޯނަމް އަކީ ވެސް އާއްމުކޮށް ޕަންޖާބީ ފިލްމުތަކުންނާއި މިއުޒިކު ވީޑިއޯތަކުން ފެންނަ ބަތަލާއެކެވެ.
އަންނަ އަހަރުގެ ސެޕްޓެމްބަރު މަހުގެ ފަސް ވަނަ ދުވަހު ސިނަމާތަކަށް ގެންނަން ތާވަލުކުރެވިފައި އޮތް ފިލްމު "ބާޣީ 4"ގެ އާ ޕޯސްޓަރުތަކެއް ދާދިފަހުން ރިލީޒްކޮށްފައިވާއިރު މި ފިލްމުގެ ވިލެންގެ ރޯލުން ފެންނާނީ ތަޖުރިބާކާރު އެކްޓަރު ސަންޖޭ ދަތުއެވެ.