އެސްޓީއޯއިން ރާއްޖެއަށް ކާޑާއި ބޭސް އެތެރެކުރުމުގެ ނަމުގައި 50 މިލިއަން ޑޮލަރުގެ ލޯނެއް ނަގައިފިއެވެ.
އިއްޔެ ރައްޔިތުންގެ މަޖިލީހުގެ މާލިއްޔަތު ކޮމިޓީގައި ރިޔާސަތުގައި އިންނެވި ނައިބު މުގައްރިރު އަދި، މަޖިލީހުގެ އޭދަފުށީ ދާއިރާގެ މެންބަރު އަހުމަދު ސަލީމް (ރެޑްވޭވް ސަލީމް) ވަނީ އެސްޓީއޯއިން ނަގާފައިވާ ލޯނަކާ ގުޅުވައި ފިނޭންސް މިނިސްޓްރީން ފޮނުވި ސިޓީއެއް މެންބަރުންނަށް އިއްވާފައެވެ.
އެ ސިޓީއާ ހަވަލާދެއްވައި ސަލީމް ވިދާޅުވީ، އެސްޓީއޯއިން ލޯނު ނަގާފައި އޮތީ ކާޑާ ބޭހުގެ އިތުރުން ޒަރޫރީ ތަކެތި އެތެރެކުރުމަށް ކަމަށެވެ.
ނަމަވެސް، އެ ހިސާބަށް ސަލީމަށް ވިދާޅުވެވުނު ތަނާހެން، މައިކުގެ އަޑު ކަނޑާލުމުން ލޯނުގެ އިތުރު ތަފްސީލެއް ކޮމިޓީގެ ލައިވަށް އަރާފައެއް ނުވެއެވެ.
ނަމަވެސް މި ލޯނާ ގުޅިގެން އެސްޓީއޯގެ އޮފިޝަލަކު "ސަން"އަށް ވިދާޅުވި ގޮތުގައި މިއީ ސަރުކާރު ޒިންމާވާ ގޮތަށް، ސަރުކާރުން ބޭނުންވެގެން، "ދައުލަތަށް" ނަގައިދިން ލޯނެއް ކަމަށެވެ.
ސަރުކާރު ކުންފުންޏެއްގެ ހައިސިއްޔަތުން މި ގޮތަށް ބައެއް ހާލަތްތަކުގައި އެސްޓީއޯއިން ކަން ކުރާ ކަމަށް ވެސް އޭނާ ވިދާޅުވިއެވެ.
އޭނާ ވިދާޅުވި ގޮތުގައި ލޯނުގެ އިންޓްރެސްޓް ރޭޓަކީ، 13.13 ޕަސެންޓެވެ. އަދި މިއީ ތިން އަހަރު ތެރޭ އަނބުރައި ދައްކައި ޚަލާސްކުރަންޖެހޭ ލޯނެކެވެ.