އިއްޔެ ހިނގި އަލިފާނުގެ ހާދިސާގައި ގެއްލުންވި ތިން މިނިސްޓްރީގެ މަސައްކަތްތައް ދަރުބާރުގެއަށް ބަދަލު ކުރަން ނިންމައިފިއެވެ.
އެ ހާދިސާގައި ހައުސިން މިނިސްޓްރީއާއި އިންފްރާންސްޓަކްޗަރު މިނިސްޓްރީގެ އިތުރުން އެންވަޔަރަމެންޓް މިނިސްޓްރީ ހިންގާ އިމާރާތަށް ބޮޑެތި ގެއްލުންތަކެއް ލިބި، އެ މިނިސްޓްރީތަކުގެ ޚިދުމަތް ވަގުތީ ގޮތުން ވަނީ މެދުކެނޑިފައެވެ. އަދި، އެ އިމާރާތުގައި ހިންގި މާލެ ސިޓީ ކައުންސިލްގެ ބަޔަކަށް ވެސް ގެއްލުންތަކެއް ލިބި، އެކަައުންސިލްގެ ޚިދުމަތްތަކަށް ވެސް ވަނީ ބުރޫއަރާފައެވެ.
އެހެންވެ، ގެއްލުން ލިބުނު މިނިސްޓްރީތަކުގެ މަސައްކަތްތައް ދަރުބާރުގެއަށް ބަދަލު ކުރުމުގެ މަސައްކަތް ކުރަމުން އަންނަ ކަން ހައުސިން މިނިސްޓްރީން 'ސަން'އަށް ވަނީ ކަށަވަރުކޮށްދީފައެވެ.
އިއްޔެ ހިނގި ހާދިސާގައި ގެއްލުންވި އިމާރާތް: އެ ހާދިސާގައި ގެއްލުންވި މިނިސްޓްރީތަކުގެ މަސައްކަތް ދަރުބާރުގެއަށް ބަދަލު ކުރަނީ --- ސަން ފޮޓޯ/ ނާއިޝް ނާހިދު
މިކަމާ ގުޅިގެން މާލެ ސިޓީ ކައުންސިލުގެ އެކްސް އެކައުންޓުން ރޭ ކުރި ޕޯސްޓެއްގައި ވަނީ، އެ ހާދިސާގައި އެ ކައުންސިލުގެ ބައެއް ހިންގަމުން އައި އިމާރާތަށް ލިބުނު ގެއްލުމާ ގުޅިގެން މާލެ ރައްޔިތުންނަށް ދެމުން އައި އެއްވެސް ޚިދުމަތަކަށް ބުރޫ ނާރާނެހެން ކަންކަން އިންތިޒާމު ކުރަމުން އަންނަ ކަމަށް ބުނެފައެވެ. އެ ކައުންސިލްގެ އޮފީހުން ދެމުންއައި ޚިދުމަތްތައް ވަގުތީ ގޮތުން ވަނީ ހުޅުމާލެއަށް ބަދަލުކޮށްފައެވެ.
މި ހާދިސާގައި އެ އިމާރާތް ބޭނުން ނުކުރެވޭ ވަރަށް އަނދައިފައިވާއިރު، މި ހާދިސާގައި އެއްވެސް މީހަކަށް އަނިޔާވެފައެއް ނުވެއެވެ.
އަލިފާނުގެ ހާދިސާއާ ގުޅިގެން އެ ސަރަހައްދުގައި ހުރި ގެތަކުން ނުކުންނަން ޖެހިފައިވާ 50 މީހަކަށް ސޯޝަލް ސެންޓަރުން ވަގުތީ ގޮތުން ބޯހިޔާވަހިކަން ވަނީ ފޯރުކޮށްދީފައެވެ.
މި ހާދިސާ ހިނގަން މެދުވެރިވި ސަބަބު އަދިއެއް ނޭނގެއެވެ.