އާމްދަނީގެ 20 ޕަސަންޓުގެ ބަދަލުގައި 10 ޕަސަންޓު ޑޮލަރު މާރުކުރަން ޓޫރިޒަމް ވިޔަފާރިތަކުން އެދިފައިވަނިކޮށް، އެ ކަމަށް އިޖާބަނުދީ މަޖިލީހުން ބޭރު ފައިސާގެ ބިލު ފާސްކުރީ، ޓޫރިޒަމް ސިނާއަތް ހަލާކުވިޔަސް ވަރިހަމަ ކަމަށް ނިންމައިގެން ކަމަށް އިދިކޮޅު އެމްޑީޕީގެ ޕީޖީ ލީޑަރު އިބްރާހީމް ނާޒިލް މިރޭ ވިދާޅުވެއްޖެއެވެ.
ޓޫރިޒަމް ވިޔަފާރިތަކުން ކަންބޮޑުވުން ފާޅުކުރަމުންދަނިކޮށް، ބޭރު ފައިސާއާ ބެހޭ ބިލު ރައްޔިތުންގެ މަޖިލީހުން ފާސްކުރީ މިއަދެވެ. އެ ބިލުގައިވާ ގޮތުން ޓޫރިސްޓު ރިޒޯޓުތަކުން ޚިދުމަތްދޭ ކޮންމެ ފަތުރުވެރިއެއްގެ ބޮލަކަށް 500 އެމެރިކާ ޑޮލަރު މާރުކުރަންޖެހޭނެއެވެ. އަދި ގެސްޓްހައުސްތަކުން ޚިދުމަތްދޭ ކޮންމެ ފަތުރުވެރިއެއްގެ ބޮލަކަށް 25 ޑޮލަރު މާރުކުރަން ޖެހޭނެއެވެ. ނުވަތަ ޖެހޭނީ އާމްދަނީގެ 20 ޕަސަންޓު މާރުކުރާށެވެ.
އެހެން ނަމަވެސް މާލީ ދަތިކަމެއް ހުރިނަމަ، އާމްދަނީގެ 20 ޕަސެންޓަށް ވުރެ މަދުން ޑޮލަރު މާރުކުރުމުގެ އިޚުތިޔާރު ދޭން މާލިއްޔަތު ކޮމިޓީން އިއްޔެ ވަނީ ބިލް އިސްލާހުކޮށްފައެވެ. އަދި ބިލް މަޖިލީހުން ފާސްކުރީ ވެސް އެ އިސްލާހާއެކުގައެވެ.
އެމްޑީޕީން މިރޭ ބާއްވާ ހަރުގެ ޖަލްސާގައި ވާހަކަ ދައްކަވަމުން ނާޒިލް ވިދާޅުވީ ބިލުގެ ދިރާސާއަށް އިއްޔެ މާލިއްޔަތު ކޮމިޓީއަށް ހާޒިރުކުރި މޯލްޑިވްސް އެސޯސިއޭޝަން ފޯ ޓޫރިޒަމް އިންޑަސްޓްރީ (މަޓީ)ން ފުރަތަމަ އެދުނީ އާމްދަނީގެ 10 ޕަސަންޓު މާރުކުރަންޖެހޭ ގޮތަށް އެ އަދަދު ކުޑަކޮށްދިނުމަށް ކަމަށެވެ. އަދި ފަހުން 15 ޕަސަންޓަށް ކުޑަކޮށްދޭން އެދުމުން ވެސް އެ ކަމަށް ސަރުކާރުން އިޖާބަނުދިންކަން އޭނާ ފާހަގަ ކުރެއްވިއެވެ.
އެމްޑީޕީގެ ޕީޖީ ލީޑަރު ނާޒިލް: އެމްޑީޕީން ގާނޫނު އަސާސީގެ ދިފާއުގައިގެ ނަމުގައި ބޭއްވި ޖަލްސާގައި، ގާނޫނު އަސާސީއަށް ގެނައި އިސްލާހު ބާތިލުކުރަން ގޮވާލާ ޕެޓިޝަނެއް އިއްވި -- ސަން ފޮޓޯ/ މޫސާ ނަދީމް
"އެ ބޭފުޅުން އެދިވަޑައިގެންނެވި މި ޑޮލަރު މާރުކުރުމުގެ ގޮތުން މި ގެންނަ ގާނޫނުގައި މިހިރަ ބައެއް މާއްދާތައް މިއަށްވުރެ ފުރިހަމަ ކުރެވޭނެ އަދި މި ސިނާއަތް މި ޓޫރިޒަމް ސިނާއަތް ފުނޑާނުލައި މިއާއެކީގައި ކުރިއަށް ދެވޭނެ ރަނގަޅު ގޮތްތަކެއް އެ ބޭފުޅުން ދެއްކެވި،" އޭނާ ވިދާޅުވިއެވެ.
އެކަމަކު ސަރުކާރުން ނިންމީ، ސިނާއަތް ފުނޑުނަސް އެ އަދަދު ކުޑަނުކުރަން ކަމަށް ނާޒިލް ވިދާޅުވިއެވެ.
ޓޫރިޒަމް ވިޔަފާރިތަކުން ޑޮލަރު މާރުކުރަންޖެހޭ ގޮތަށް މަރުކަޒީ ބޭންކު، އެމްއެމްއޭއިން އޮކްޓޯބަރު މަހުގެ އެކެއްގައި ތަންފީޒު ކުރަން ފެށި ގަވާއިދާ ގުޅިގެން އިންޑަސްޓްރީގެ ބޭފުޅުންވަނީ އެއަށް އަމަލު ކުރެވެން ނެތް ކަމަށް ވިދާޅުވެފައެވެ. އެއީ އާމްދަނީން ބޭރުން، ބޭންކަށް ޑޮލަރު މާރުކުރަން ޖެހޭގޮތަށް އެ ގަވާއިދު އޮތް ކަމަށް ބުނެއެވެ.
އެ ގަވާއިދާ ގުޅިގެން ވިޔަފާރިވެރިންގެ ބޮޑެތި ކަންބޮޑުވުންތަކެއް އޮއްވައި، ރައީސް ޑރ. މުހައްމަދު މުއިއްޒުވަނީ ސަރުކާރަށް އަހަރުފުރުން ފާހަގަކުރަން ބޭއްވި ރަސްމިއްޔާތުގައި، ގަވާއިދު ބަދަލު ނުކުރައްވާނެ ކަމަށް ޗެލެންޖު ކުރައްވައި ވިދާޅުވެފައެވެ.
ގާނޫނަށް އިސްލާހު ގެނެސްގެން އެ ބަދަލު ގެނައުމަށް، ބިލު ހުށަހެޅީ މި ހަފުތާގެ ހޯމައިގައެވެ.