ދައުލަތުގެ މީޑިއާ (ޕީއެސްއެމް)އިން ވަގުތުން ގެނެސްދިން އިވެންޓެއްގައި ޤުރުއާނުން ބައެއް އުނިވީ ޓެކްނިކަލް މައްސަލައެއްގެ ސަބަބުން ކަމަށާއި އެ ކަމުގައި އިހުމާލުވި މުވައްޒަފުން މިހާރު ވަޒީފާގެ މަސްއޫލިއްޔަތުތަކުން އެކަހެރިކޮށްފައިވާ ކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު ސައީދު މިއަދު ވިދާޅުވެއްޖެއެވެ.
މިދިޔަ ހަފުތާގައި ރައީސް ޑރ. މުހައްމަދު މުއިއްޒު އއ. އަތޮޅާއި ކ. އަތޮޅުގެ ބައެއް ރަށްތަކަށް ކުރެއްވި ދަތުރުފުޅުގެ ތެރެއިން ބޭއްވި ޖަލްސާއެއް ފެށުމަށް ޤުރުއާން ކިޔެވިއިރު ޖަލްސާގެ ލައިވުން ބައެއް އުނިވިއެވެ. އެހެންވެ، އެ މައްސަލައިގައި މިއަދު މަޖިލީހަށް ކުއްލި މައްސަލައެއް ވެސް ހުށަހަޅައި، ބަހުސްކުރިއެވެ.
އެ މައްސަލައިގައި ޕީއެސްއެމްގެ މެނޭޖިން ޑިރެކްޓަރު ވިދާޅުވީ، ޤުރުއާނުން ބައެއް އެ ލައިވުން އުނިވެފައިވާތީ ވަރަށް ސީރިއަސް މައްސަލައެއްގެ ގޮތުގައި އެ ކަން ބަލާފައިވާ ކަމަށެވެ.
ސައީދު ވިދާޅުވި ގޮތުގައި ޤުރުއާނުން ބައެއް އުނިވީ އެޑިޓްކުރުމުގެ ސަބަބަކުން ނޫނެވެ. އެއީ، ލައިވް އެއް ކޮންޓްރޯލް ރޫމުން އަނެއް ކޮންޓްރޯލް ރޫމަށް ބަދަލުކުރުމުގެ ތެރޭގައި ދިމާވި ޓެކްނިކަލް މައްސަލައެއް ކަމަށް އޭނާ ވިދާޅުވިއެވެ.
"ލައިވްކޮށް ގެނެސްދޭ ޕްރޮގްރާމެއްގެ ސިގްނަލް، އެއް ކޮންޓްރޯލް ރޫމުން އަނެއް ކޮންޓްރޯލް ރޫމަށް ބަދަލުކުރުމަކީ އާއްމުގޮތެއްގައި ކުރާކަމެއް. އެހެންނަމަވެސް، އެ ފަދަ ހާލަތްތަކުގައި ސިގްނަލް ބަދަލުކުރަނީ މީހަކު ވާހަކަދައްކާ ގަޑިއެއްގައި ނޫން. އެހެންނަމަވެސް، މި ދެންނެވި ކޮންޓެންޓް އެއް ކޮންޓްރޯލް ރޫމުން އަނެއް ކޮންޓްރޯލް ރޫމަށް ބަދަލުކުރެވުނީ ކީރިތި ޤުރުއާން ކިޔަވަމުން ދަނިކޮށް،" އޭނާ ވިދާޅުވިއެވެ.
އެހެންވެ، އެ ވަގުތު ކޮންޓްރޯލް ރޫމްގައި ތިބި މުވައްޒަފުން މިހާރު އެ މުވައްޒަފުންގެ މަސްއޫލިއްޔަތުން އެކަހެރިކޮށްފައިވާ ކަމަށް އޭނާ ވިދާޅުވިއެވެ. އަދި، އެކަން ދިމާވީ އެޑިޓްކުރުމުގެ ސަބަބުންތޯ ބަލައިދޭން ބްރޯޑްކާސްޓިން ކޮމިޝަންގައި އެދިފައިވާ ކަމަށް ވެސް އޭނާ ވިދާޅުވިއެވެ.
ޕީއެސްއެމުން ބުނީ، މި ފަދަ ކަމެއް ތަކުރާރުނުވާނެ ގޮތްތައް އިންތިޒާމުކުރުމުގެ މަސައްކަތް ކުރަމުން އަންނަ ކަމަށެވެ.
ޤުރުއާނުން ބައެއް އުނިވުމުން ގިނަ ބަޔަކު އަންނަނީ މީސްމީޑިއާގައި އެކަން ފާހަގަކުރަމުންނެވެ. އެ މައްސަލައާ ގުޅިގެން މިއަދު މަޖިލީހުގައި ވެސް އިދިކޮޅު މެންބަރުން ވަނީ ކުއްލި މައްސަލައަށް ބަހުސްކުރަމުން ނުރުހުން ފާޅުކޮށްފައެވެ.