މިދިޔަ އަހަރާ އަޅައިބަލާއިރު ސައިބަކްރައިމްގެ މައްސަލަތައް މި އަހަރު ހުށަހެޅުނުވަރު ދެގުނަ އިތުރުވެފައިވާ ކަމަށް ޕޮލިސް ކޮމިޝަނަރު (ސީޕީ) އަލީ ޝުޖާއު މިރޭ ވިދާޅުވެއްޖެއެވެ.
ސީޕީ މިހެން ވިދާޅުވީ ހުޅުމާލޭ ސެންޓްރަލް ޕާކުގައި ސައިބާ އެކްސްޕޯ 2024 ފެށުމަށް މިރޭ ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ސީޕީ ވިދާޅުވި ގޮތުގައި މިދިޔަ އަހަރު ފުލުހުންނަށް ރިޕޯޓު ކުރެވިފައި އޮތީ ސައިބަކްރައިމްގެ 99 މައްސަލައެކެވެ. އެހެން ނަމަވެސް މި އަހަރުގެ މިހާތަނަށް 177 މައްސަލައެއް ހުށަހެޅިގެން، ތަހުގީގު ކުރަމުންދާ ކަމަށް ވިދާޅުވިއެވެ.
ސީޕީ ވިދާޅުވި ސައިބަކްރައިމްގެ ގޮތުގައި އެންމެ ގިނައިން ހުށަހެޅެނީ ހެކް ކުރުމުގެ މައްސަލަތަކެވެ. އެ ގޮތުން ބޭންކް އެކައުންޓް ހެކް ކުރުމާއި، ސޯޝަލް މީޑިއާ އެކައުންޓުތައް ހެކް ކުރުމުގެ އިތުރުން، ސަރުކާރާއި ބައެއް ޕްރައިވެޓް އޮފީސްތަކުގެ ވެބްސައިޓުތައް ހެކް ކުރުމުގެ މައްސަލަތައް މީގެ ތެރޭގައި ހިމެނެއެވެ.
މީގެ އިތުރުން ވެސް، ގަވާއިދާ ޚިލާފަށް ލިޔުންތައް ފޯޖު ކުރުމުގެ މައްސަލަތަކާއި، އޮންލައިން ވިޔަފާރީގެ ނަމުގައި ސޯޝަލް މީޑިއާގައި ޕޭޖުތައް ހަދައި، މަކަރާ ހީލަތުން އޮޅުވާލައިގެން ފައިސާ ހޯދުމާއި، ސޯޝަލް މީޑިއާއި ސްކޭމްކޮށްގެން ފައިސާ ހޯދަމުންދާ މައްސަލަތައް އިތުރުވަމުންދާ ކަމަށް ސީޕީ ވިދާޅުވިއެވެ.
މިއީ ކޮންމެ ފަރުދަކު ވެސް ހޭލުންތެރިވެ، ސަމާލުވާންޖެހޭ ކަންކަން ފާހަގަ ކުރައްވައި ސީޕީ ވިދާޅުވީ، މި ކަންކަން ހުއްޓުވޭނީ ހޭލުންތެރިވެ، ސަމާލުވެ ތިބެގެން، ސަރުކާރާއި ކަމާބެހޭ ފަރާތްތަތަކަށް އެއްބާރުލުން ދީގެން ކަމަށެވެ.
"މިއަދު ހުރިހާ މަސައްކަތެއް ވެސް ކުރެވެމުން މި ދަނީ ޑިޖިޓަލްކޮށް. މި ކަމުގެ ސަބަބުން މުޖުތަމައުގައި ދިރިއުޅޭ ބައެއް ފަރުދުން، މި ކަންކަމަށް ހޭލުންތެރިނުވުމުގެ ނަތީޖާއަކަށްވަނީ، ސައިބަކްރައިމްގެ ޝިކާރައަކަށްވެ، ފޫނުބެއްދޭވަރުގެ އަގުބޮޑެތި ގެއްލުންތައް ލިބި، ޑޭޓާތައް ގެއްލިގެން ދިއުން،" ސީޕީ ވިދާޅުވިއެވެ.
ސީޕީ ވިދާޅުވި ގޮތުގައި މި ކަން ހުއްޓުވުމަށް އެންމެ އެކުގައި މަސައްކަތް ކުރުމަށް އިހުނަށްވުރެ މިއަދު މުހިންމުވެފައެވެ.
މި ސައިބަރ އެކްސްޕޯއަކީ ސަރުކާރުގެ މުއައްސަސާތަކާއި ކުންފުނިތަކާއި އަމިއްލަ ކުންފުނިތަކާއި ފަންނީ ބޭފުޅުންނަށް ހުޅުވާލައިގެން ކުރިއަށް ގެންދިއުމަށް ހަމަޖެހިފައިވާ އެކްސްޕޯއެކެވެ.
މި އެސްޕޯއަކީ އެންމެން ގުޅިގެން ރައްކާތެރި ޑިޖިޓަލް މާހައުލެއް ގާއިމުކުރުމާއި އާންމު ރައްޔިތުން ސައިބަރ ސެކިއުރިޓީއަށް އަހުލުވެރިކުރުވުމަށް ބާއްވާ އެކްސްޕޯއެކެވެ.