ފުލުހުން ބާއްވާ ސައިބާ އެކްސްޕޯ 2024ގެ އެކްސްކްލޫސިވް ޑިޖިޓަލް ޕާޓްނަރުގެ ގޮތުގައި ދިރާގުން ސޮއިކޮށްފިއެވެ.
އެ އެކްސްޕޯ އޮންނާނީ މިރެއިން ފެށިގެން އަންނަ ހުކުރު ދުވަހުގެ ނިޔަލަށް ހުޅުމާލޭގެ ސެންޓްރަލް ޕާކުގައެވެ.
އެ އެކްސްޕޯގެ މަގުސަދަކީ ސައިބާސެކިއުރިޓީ ވަރުގަދަ ކުރުމާއި އެ ދާއިރާއާ ގުޅުންހުރި ކުރިއެރުންތަކާ ގުޅޭ ގޮތުން ވާހަކަދައްކައި، މަޝްވަރާކުރުމަށް ކަމާ ގުޅުން ހުރި ފަރާތްތަކަށް ޕްލެޓްފޯމެއް ފޯރުކޮށްދިނުން ކަމަށް ދިރާގުން ބުންޏެވެ.
އެ އެކްސްޕޯގައި ދާއިރާގެ ބޭފުޅުންގެ ކީނޯޓް ސްޕީޗުތަކާއި، ޕެނަލް ޑިސްކަޝަންތަކާއި 'ކެޕްޗާ ދަ ފްލެގް' މުބާރާތެއް ވެސް ކުރިއަށްގެންދާނެއެވެ. ޓެކްނޮލޮޖީއާ ގުޅުންހުރި ގޭމްތައް ހިމެނޭ އެ މުބާރާތުން ކާމިޔާބު ހޯދާ ފަރާތްތަކަށް ބޮޑެތި އިނާމުތައް ވެސް ލިބޭނެއެވެ.
ދިރާގަކީ ސައިބާސެކިއުރިޓީއާ ގުޅުންހުރި ހޭލުންތެރިކަން ޕްރޮމޯޓްކޮށް، ފަހުގެ ޓެކްނޮލޮޖީ ތައާރަފުކުރުމަށް މަސައްކަތްކުރާ ކުންފުންޏެއްކަން އެ ކުންފުނިން ފާހަގަކުރިއެވެ.
އެ އެކްސްޕޯގައި ކީނޯޓް ސްޕީޗް ދެއްވާ ބޭފުޅުންގެ ތެރޭގައި ދިރާގުގެ ހެޑް އޮފް ސައިބާސެކިއުރިޓީ އިސްމާއީލް ފައިޒް ވެސް ހިމެނިވަޑައިގަންނަވާނެއެވެ. އެކްސްޕޯގެ ދެވަނަ ދުވަހު ދައްކަވާ ވާހަކައިގެ މައުޟޫއަކީ 'ދިރާގު ނެޓްޕްރޮޓެކްޓް: ސޭފްގާޑް ޔުއާ ޗައިލްޑްސް އޮންލައިން ވޯލްޑް' އެވެ. އަދި ދިރާގުގެ އުފެއްދުންތަކާއި ސައިބާސެކިއުރިޓީއާ ގުޅޭ މައުލޫމާތު ފޯރުކޮށްދީ، ވިޔަފާރިތަކުގެ ގުޅުން ބަދަހިކުރުމަށް ފަހިކޮށްދޭ ޚާއްސަ ސްޓޯލެއް ވެސް އެކްސްޕޯގައި ހުންނާނެއެވެ.